كەشە استانادا كوشە جارىقتاندىرۋعا ارنالعان يننوۆاتسيالىق باعانالاردى جاساپ شىعاراتىن ەلىمىزدەگى تۇڭعىش زاۋىت ىسكە قوسىلدى.
باعانالار رەسەي مەن قىتايدان تاسىمالداناتىن شىنى پلاستيك پەن پوليەفيرلى شايىردىڭ قوسپاسىنان جاسالادى ەكەن. مامانداردىڭ ايتۋىنشا, مۇنداي ماتەريالداردان جاسالاتىن ونىمدەر ەلىمىزدە العاش رەت شىعارىلىپ وتىر. اتالمىش زاۋىت الداعى ۋاقىتتا تەك باعانا عانا ەمەس, ديامەترى 120 سم بولاتىن كارىز جۇيەلەرىنىڭ قۇبىرلارى مەن مۇناي وندىرۋدە قولدانىلاتىن سۇيىق وتىندى تسيستەرنالاردى دا جاساۋدى قولعا الماق. مۇنداعى رەسەيلىك تەحنولوگيانىڭ ەرەكشەلىگى – ءونىمدى يىلگىش نەمەسە قاتتى قىلىپ دايىنداۋعا قاۋقارلى.
– تەمىر باعانالارعا قاراعاندا مۇنىڭ ارتىقشىلىعى – ەكولوگيالىق تازالىعىندا. ياعني ءبىزدىڭ ونىمدەردىڭ قورشاعان ورتاعا زيانى جوق. ءارى جوندەۋگە دە وتە ىڭعايلى بولادى. قازىرگى ۋاقىتتا ەلىمىزدىڭ جانە رەسەيدىڭ بىرقاتار قۇرىلىس كومپانيالارىمەن كەلىسىمشارتقا وتىرىپ جاتىرمىز. ءونىم بولاشاقتا قازاقستاننىڭ بارلىق وڭىرلەرى مەن الىس-جاقىن شەتەلدەرگە دە ەكسپورتتالادى دەپ جوسپارلاپ وتىرمىز, – دەيدى «Maxvidl» جشس ديرەكتورى اسحات راحىموۆ.
زاۋىتتىڭ اشىلۋ سالتاناتىنا ينۆەستيتسيا جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ەرلان بەكمۇرزاەۆ پەن رەسەيلىك «ماشسپەتسستروي» كومپانيالار توبىنىڭ باس ديرەكتورى ولەگ شاكەلين قاتىستى. اسحات راحىموۆ مەيمانداردى وزدەرىنىڭ جۇمىسىمەن تانىستىردى. زاۋىتتا جىلىنا 10 مىڭ دانا ءونىم جاسالماق. قازىرگى ۋاقىتتا مۇندا 40 شاقتى ادام جۇمىسپەن قامتىلعان. ولاردىڭ ورتاشا جالاقىسى – 120-150 مىڭ تەڭگە.
