استانا قالاسىنداعى «قوبىز» مەيرامحاناسىندا د.قوناەۆ اتىنداعى ۋنيۆەرسيتەت كوللەدجىنىڭ 2013-2014 وقۋ جىلىن تامامداعان ءۇش جۇزدەن استام تۇلەگىنە سالتاناتتى تۇردە ديپلوم تاپسىرۋ ءراسىمى ءوتتى. جوعارى ءبىلىم ساپاسىن كورسەتكەن 62 تۇلەككە ەرەكشە ۇلگىدەگى ديپلومدار تابىستالدى.
سالتاناتتى ءىس-شارانى كوللەدج ديرەكتورى گۇلميرا مومبەكوۆا قۇتتىقتاۋ سوزبەن اشىپ, وقۋ ورىنىن ءبىتىرۋشى تۇلەكتەرگە كوپتەن كۇتكەن قۋانىشتى ءساتتىڭ كەلىپ جەتكەنىن حابارلادى. كوللەدجدى ءبىتىرۋشى تۇلەكتەردىڭ قۋانىشتى سەزىمدەرىمەن اتا-انالارى, تۋعان-تۋىسقاندارى, جولداستارى دا ءبولىستى. كوللەدج اكىمشىلىگى اتىنان اتا-انالارعا العىس حاتتار ۇسىنىلىپ, ايدانا ەرمەكباەۆا, ولجاس مولداشەۆ, اقتورە كوپباەۆ, ءاليا بايمۋرزينا, ەرحان ساعىندىق, جولداس ەسقالي, نارگيز مۇساقۇلوۆا, ازامات التىنبەكوۆ, باقىتجامال اۋباكيروۆا, كادىرالي قايىرگەلدينوۆ, كارينا شيمكو جانە ت.ب. وقۋ, تاربيە, قوعامدىق جۇمىستارعا بەلسەنە قاتىسقان تۇلەكتەر ماداقتامالارمەن ماراپاتتالدى.
گۇلميرا بەيسەنبەكقىزى د.قوناەۆ اتىنداعى ۋنيۆەرسيتەت كوللەدجى 2002 جىلدان باستاپ «قۇقىقتانۋ», «ەسەپ جانە اۋديت», «تۋريزم», «اۋدارما ءىسى», «باعدارلامامەن قامتاماسىز ەتۋ», «قوناق ءۇي شارۋاشىلىعىنا قىزمەت كورسەتۋ» ورتا كاسىپتىك ءبىلىم بەرۋ ماماندىقتارى بويىنشا كۇندىزگى جانە سىرتتاي وقۋ بولىمىنە وقۋشىلار قابىلداپ كەلە جاتقانىن, قازىرگى كەزدە كوللەدج قابىرعاسىندا 37 وقىتۋشى وقۋشىلارعا قازىرگى زامان تالابىنا ساي ءبىلىم مەن تاربيە بەرىپ جۇرگەنىن جەتكىزدى. ولاردىڭ ىشىندە جوعارى ساناتتى وقىتۋشىلار: گ.بەردەش, ج.مۋسينا, ر.شاياحمەتوۆ, گ.اۋباكيروۆا, ز.ماسيموۆا, گ.اپاروۆا جانە ت.ب. ساباقتان تىس ۋاقىتتا وقۋ-ادىستەمەلىك جانە عىلىمي ەڭبەكتەر جازۋمەن اينالىسادى. كوللەدج ديرەكتورىنىڭ ايتۋىنشا, گ.بەردەش ەكونوميكا ءپانى بويىنشا ادىستەمەلىك قۇرالدىڭ اۆتورى بولسا, ز.ماسيموۆا, گ.ەرىنبەت, ا.تۋشابەك, ن.سوپبەكوۆا ءوز پاندەرى بويىنشا وقۋ-ادىستەمەلىك وڭدەمەلى مەن ماقالالارىن ادىستەمەلىك-اقپاراتتىق باسىلىمدارعا جاريالاپ, ارىپتەستەرىمەن تاجىريبە بولىسۋدە. «جالپى, كوللەدج وقىتۋشىلارى شىعارماشىلىقپەن ەڭبەك ەتىپ جۇرگەن بىلىكتى ۇستازدار. ولار قازىرگى زامان تالاپتارىنا ساي جاڭا ادىستەمەلىك اقپاراتتاندىرىلعان تەحنولوگيالىق ءادىس-تاسىلدەرىن وقىتۋ ۇردىسىندە كۇندەلىكتى ساباقتا كەڭىنەن قولدانىپ كەلەدى» دەدى گ.مومبەكوۆا.
زامان تالابىنا ساي مامان دايىنداۋدا وقۋ ورنىمەن جۇمىس بەرۋشىلەردىڭ ءوزارا تىعىز بايلانىسى وتە ماڭىزدى. «قۇقىقتانۋ» ماماندىعىنىڭ وقۋشىلارى ەكىجاقتى كەلىسىمشارت نەگىزىندە قر جوعارعى سوتى, قر پروكۋراتۋراسى, قالالىق, اۋداندىق ىشكى ىستەر باسقارماسىندا وقۋ-وندىرىستىك, وقۋ-سوتتىق ءتاجىريبەدەن وتەدى. مەملەكەتىمىزدىڭ ماقتانىشى – مايتالمان مامانداردى دايارلاۋدا كوللەدج ۇجىمى اۋقىمدى ىستەر اتقارىپ, شىعارماشىلىق ىزدەنىستەردى جۇزەگە اسىرۋدا. شارا بارىسىندا سويلەگەندەردىڭ سوزىنەن ۇققانىمىز – وسى.
سالتاناتتى كەشتىڭ سوڭى كوللەدجدىڭ ءبىرىنشى جانە ەكىنشى كۋرس ستۋدەنتتەرىنىڭ كۇشىمەن دايىندالعان كونتسەرتكە ۇلاستى.
ءشايزات الماعامبەتوۆ,
د.قوناەۆ اتىنداعى كوللەدجدىڭ كاسىبي قازاق ءتىلى ءپانىنىڭ وقىتۋشىسى
