30 شىلدەدە ساعات 13:31 شاماسىندا استانا قالاسى ىشكى ىستەر دەپارتامەنتىنە اتى-ءجونى بەلگىسىز قىز بالادان «ساپارجاي» اۆتوبەكەتىندە جارىلىس بولاتىندىعىن حابارلاعان قوڭىراۋ ءتۇستى.
شۇعىل ارەكەت ەتۋ ناتيجەسىندە اۆتوبەكەتتىڭ جۇمىسى ۋاقىتشا توقتاتىلىپ, ەكى مىڭعا جۋىق جولاۋشى, 13 قالارالىق قاتىناستاعى اۆتوبۋس پەن 12 جەڭىل كولىك اۋلاققا شىعارىلدى. الايدا, «ارلان» ارناۋلى جاساعى مەن كينولوگيالىق ورتالىقتىڭ ءىز كەسكىش يتتەرى قانشا تىنتىگەنىمەن, ەشقانداي جارىلعىش زات تابىلمادى.
جەدەل تەرگەۋ امالدارى اقمولا وبلىسىندا تۇراتىن 25 جاسار قىز بالا جۇرتتى تەككە ابىگەرگە سالعانىن انىقتاپ, تۇتقىنعا الدى.
قاساقانا جالعان حابار تاراتىپ, بۇزاقىلىق جاساعانىن مويىنداعان قىزدىڭ ايتۋىنشا, ول تەرروريزمنەن قورعانۋ تۋرالى بۋكلەت سىرتىنداعى تەلەفوندى كورىپ قالىپ, ۆوكزال ىشىندەگى تەلەفون اۆتوماتىنان شۇعىل ارەكەت قىزمەتتەرىنىڭ جەدەلدىگىن تەكسەرىپ كورمەك بولىپتى.
اتالعان فاكتى بويىنشا قر قىلمىستىق كودەكسىنىڭ 242-ءشى بابىنا («تەررورلىق اكت تۋرالى قاساقانا جالعان اقپارات تاراتۋ») سۇيەنە وتىرىپ قىلمىستىق ءىس قوزعالدى. ۋاقىتشا تەرگەۋ يزولياتورىنا توعىتىلعان ءتارتىپ بۇزۋشىدان سوت ارقىلى كەلتىرىلگەن ماتەريالدىق شىعىن تولىقتاي ءوندىرىلىنىپ الىنادى.
استانا قالالىق ىشكى ىستەر دەپارتامەنتى وسىلايشا وتپەن ويناپ, تەرروريزم تۋرالى جالعان اقپارات تاراتقاندارعا جازا 2012 جىلدان بەرى قاتاڭداتىلعانىن ەسكەرتەدى. ەگەر, بۇرىن سانكتسيا بويىنشا 200-دەن 500 اەك-كە دەيىن ايىپپۇل تولەتتىرىپ نەمەسە ەكى جىلعا تۇزەتۋ جۇمىستارىنا سالۋ, التى ايعا تۇرمەگە وتىرعىزۋ سياقتى جەڭىل-جەلپى جازالار قولدانىلسا, بۇدان بىلاي زاڭ مۇنداي بۇزاقىلىق ءۇشىن التى جىلعا دەيىن باس بوستاندىعىنان ايىرا الادى.
ەدىل بوكەەۆ
