23 ماۋسىم تاۋەلسىز قازاقستاننىڭ مەملەكەتتىك قىزمەتشىلەرى كاسىبي مەرەكەلەرىن اتاپ وتەدى. مەملەكەتتىك قىزمەتشىلەردىڭ ارقايسىسىنىڭ ادال جانە ءتيىمدى جۇمىسى, قورىتىندىلاي كەلگەندە, ءبىزدىڭ مەملەكەتىمىزدىڭ قالىپتاسۋىنا جانە دامۋىنا اسەر ەتەدى. مەملەكەتتىك قىزمەتشى ءوز ەلىندەگى تىكەلەي مىندەتتەرىن ورىنداۋدان باسقا, وتباسىندا, قورشاعان ورتاعا, ادامدارمەن ورتاق ءتىل تابىسۋعا جانە جان-جاقتىعا ۇلگى بولۋعا ءتيىس. بۇل – ءبىزدىڭ ەلباسىمىزدىڭ تالاپتارى. بۇگىن ءبىز نۇر-سۇلتان قالاسى بويىنشا مەملەكەتتىك قىزمەتتەگى جاس مامانداردى, ولاردىڭ اتقارىپ جاتقان قىزمەتتەرى مەن جەتىستىكتەرى تۋرالى بولىسۋگە شاقىردىق.
ەسىركەپ ساكەن زيابەكۇلى, نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى:
– مەن مەملەكەتتىك قىزمەتتە 8 جىلعا جۋىق ەڭبەك ەتىپ كەلەمىن. العاش 2012 جىلى استانا قالاسى ءدىن ىستەرى دەپارتامەنتىندە ءبىر جىل جەتەكشى مامان, كەيىن قالالىق ىشكى ساياسات باسقارماسىندا ءۇش جىل باس مامان, ءۇش جىل ءبولىم باسشىسى رەتىندە قىزمەت ەتتىم.
2018 جىلى تامىز ايىندا قالالىق تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى بولىپ قازىرگى قىزمەتىمە كىرىستىم. «ۇلت جوسپارى – بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام» باعدارلاماسىندا باياندالعان «مەريتوكراتيا قاعيداتىن نىعايتۋ» ۇدەرىسىن جەكە باسىمنان وتكەرىپ كەلەمىن.
مەملەكەتتىك قىزمەت – ەڭ اۋەلى ۇلكەن جاۋاپكەرشىلىك, بىلىكتىلىك پەن ۇنەمى شىڭدالۋدى تالاپ ەتەدى. ادام جەكە تۇلعا رەتىندە ءوزىن-ءوزى تۇراقتى جەتىلدىرىپ, العا ۇمتىلىپ وتىرۋى قاجەت. بۇل رەتتە, قاي سالادا ەڭبەك ەتسەك تە, كەيىن سوڭىمىزدا ءوزىمىز ۇيالمايتىنداي, ۇلگى بولارلىق ءىس قالدىرعانىمىز ءجون. قازاقتا ءجيى ايتىلاتىن «نانىڭدى ادال تاۋىپ جەۋ» قاعيداسى وسىعان سايادى.
مەن مەملەكەتتىك قىزمەتكە كەلمەي تۇرىپ, مەملەكەتتىك ورگانداردىڭ قىزمەتىن ءجيى سىنايتىنمىن. كونسترۋكتيۆتى سىن بار جەردە ىلگەرىلەۋ, دامۋ بار ەكەنىن جوققا شىعارمايمىن. بىراق ءوزىم مەملەكەتتىك قىزمەتكە كەلىپ, ءوزىم سىناپ جۇرگەن سالالاردا تەوريالىق ەمەس, پراكتيكالىق ماسەلەمەن اينالىسۋ ءبىراز ماسەلەگە جاڭاشا قىردان قاراۋ مۇمكىندىگىن سىيلادى. پايدالى ويدى, سانالى سىندى لايىقتى ىسپەن ۇشتاي ءبىلۋ – ىسكەرلىكتىڭ ءبىر سيپاتى.
مەملەكەتتىك قىزمەتتە ءجۇرىپ ءوز ىسىنە جاۋاپكەرشىلىكپەن قارايتىن, ءبىلىمدى جانە ەڭبەكقور ازاماتتارمەن كوپ تانىستىم. «ۇلتقا قىزمەت ەتۋ – مىنەزدەن» دەپ ۇلىلارىمىز ايتقانداي, ەل مۇددەسىنىڭ ۇدەسىنەن شىعۋدى الدىمىزعا ميسسيا رەتىندە قويا الساق, اركىم ءوزى قىزمەت ەتىپ جۇرگەن سالادا ۇزدىك, بىلىكتى مامان بولسا, ەلدىڭ دە كەلەشەگى كەمەل بولماق.
ءسوز سوڭىندا, بارشا ارىپتەستەرىمدى كاسىبي مەرەكەلەرى – مەملەكەتتىك قىزمەتشىلەر كۇنىمەن قۇتتىقتايمىن!
تاستەمىر اقۇلان وسەرۇلى, «نۇر-سۇلتان قالاسىنىڭ قوعامدىق دامۋ ىستەرى باسقارماسى» مم جاستارمەن جۇمىس ءبولىمىنىڭ باس مامانى:
– مەن جاستار ساياساتى سالاسىنداعى مەملەكەتتىك قىزمەتكەر رەتىندە وزىمە ارتىلاتىن جۇك پەن جاۋاپكەرشىلىكتىڭ جوعارى ەكەنىن بىلەمىن. وسىعان وراي بويىمداعى بار ءبىلىمىم مەن تاجىريبەمدى پايدالانا وتىرىپ, ءوز مىندەتىمدى ادال, ابىرويمەن اتقارۋعا تىرىسامىن. سەبەبى ەلباسى ن.ءا.نازارباەۆ 2019 «جاستار جىلى» ەكەندىگىن مالىمدەدى, سونىڭ اياسىندا ەل بولاشاعى – جاستاردى قولداۋ جانە ولاردىڭ جان-جاقتى دامۋىنا جاعداي جاساۋىمىز قاجەت.
ەلىمىزدىڭ بارلىق مەملەكەتتىك قىزمەتكەرلەرىن كاسىبي مەرەكەمەن شىن جۇرەكتەن قۇتتىقتايمىن. ەلىمىزدىڭ الەۋەتىنىڭ ارتىپ, قارىشتاپ دامۋى ءۇشىن ايانباي قىزمەت اتقارىپ, بيىك بەلەستەردى باعىندىرىپ, جەتىستىكتەرگە جەتۋلەرىڭىزگە تىلەكتەسپىن.
سەرعازينا ينارا ماراتقىزى, نۇر-سۇلتان قالاسى ەسىل اۋدانى اكىمى اپپاراتىنىڭ پەرسونالدى باسقارۋ قىزمەتىنىڭ باسشىسى:
– اپپاراتتا جۇمىس جاساۋدى ۋنيۆەرسيتەت بىتىرگەن سوڭ باستادىم. العاشقى ءۇش جىل بويى الەۋمەتتىك سالا جانە ىشكى ساياسات بولىمىندە كەلىسىمشارت نەگىزىندە جۇمىس جاسادىم. بۇل جۇمىس ماعان تاجىريبە جيناۋعا, جاۋاپكەرشىلىكتى ارتتىرۋ, شەشىم قابىلداۋدى ۇيرەنۋ, ۇقىپتىلىق, مۇقياتتىلىق سەكىلدى قاسيەتتەردى دامىتۋدى ۇيرەتتى. مەنىڭ ويىمشا, جينالعان بارلىق تاجىريبە تەست تاپسىرىپ, زور سەنىممەن كونكۋرس بويىنشا اڭگىمەلەسۋدەن ءوتىپ, باس مامان رەتىندە قابىلدانۋعا كومەك بەردى.
ىشكى ساياسات جانە ۇيىمداستىرۋ-باقىلاۋ ءبولىمىنىڭ باس مامانى بولىپ جۇمىس جاساي كەلە, اتالعان مەملەكەتتىك ۇيىمنىڭ قىزمەتكەرلەرى اراسىندا پەرسونالدى باسقارۋ قىزمەتىنىڭ باسشىسى بوس لاۋازىمىنا جاريالانعان ىشكى كونكۋرسقا قاتىسۋ شەشىمىن قابىلدادىم. سول ۋاقىتتان بەرى اتالعان لاۋازىمدا قىزمەت جاساۋدامىن. باسىنداعى قيىندىققا قاراماستان, قازىر سول ۋاقىتتا باسشى قىزمەتىندە بولۋ شەشىمىمە بىردە-ءبىر رەت وكىنگەن ەمەسپىن.
مەملەكەتتىك قىزمەت باعا جەتپەس تاجىريبەدەن بولەك, ءوزىمنىڭ كوپتەگەن جەكە قاسيەتتەرىمدى دامىتۋعا, ال ەڭ باستىسى, مەنى كۇندەلىكتى جاقسىلىققا ۇمتىلدىراتىن ارىپتەستەر اراسىندا دوستار مەن تالىمگەرلەر تابۋعا كومەكتەستى.
ايگەرىم اڭساعانوۆا, قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتىنىڭ باس مامانى:
– ماماندىق تاڭداۋ – ءاربىر ادامنىڭ ومىرىندەگى ماڭىزدى شەشىمدەردىڭ ءبىرى ەكەنى ءسوزسىز. ويتكەنى بۇل تاڭداۋ ءومىر بويى قانداي ىسپەن اينالىساتىنىڭىزدى ايقىنداپ, بولاشاعىڭىزعا باعدار بەرەدى. ارينە, ماماندىق تاڭداۋدا ءار ادام ءوزىنىڭ قىزىعۋشىلىعىنا, قابىلەتىنە, بەيىمدىلىگىنە, قالاۋىنا سۇيەنۋ كەرەك.
مەنىڭ بالا كۇنىمدەگى ارمانىم – مەملەكەتتىك قىزمەتشى بولۋ. مەملەكەتتىك قىزمەت – بۇل بارلىق مەملەكەتتىك باسقارۋدى ۇيىمداستىرۋداعى جەتەكشى ءرولدى اتقاراتىن مەملەكەت جۇيەسىنىڭ ەڭ ماڭىزدى تەتىكتەرىنىڭ ءبىرى. كەز كەلگەن قوعام مەملەكەتتىك باسقارۋسىز, ياعني مەملەكەتتىك قىزمەتشىلەرسىز ارەكەت ەتۋى مۇمكىن ەمەس. بيلىككە دەگەن سەنىم قازىرگى قوعامنىڭ تالاپتارىنا ساي مەملەكەتتىك قىزمەتشىدەن باستالادى.
بۇگىنگى تاڭدا اتالعان مەملەكەتتىك ورگاننىڭ سىبايلاس جەمقورلىقتى الدىن الۋ باسقارماسىندا قىزمەت ەتۋدەمىن. جەمقورلىقپەن كۇرەس بۇگىندە ەلىمىزدە مەملەكەتتىك ماڭىزى بار تۇيتكىلدى ماسەلەگە اينالىپ وتىرعاندىعى شىندىق. ەلدىڭ ەرتەڭى ءۇشىن, بولاشاق كەلەر ۇرپاق الدىندا ەڭسەمىزدىڭ بەك كوتەرىلىپ ءجۇرۋ ءۇشىن, جەمقورلىق ىندەتىمەن بەلسەنە كۇرەسىپ, ءتۇپ-تامىرىمەن جويۋ قاجەت. بۇل – ىندەت ادامزات بالاسىنا جات قاسيەت. مەن قىزمەت ەتەتىن باسقارمادا جەمقورلىق اتتى كەسەلدى الدىن الۋ ءۇشىن ءارتۇرلى فورماتتاعى ءىس-شارالار وتكىزىلەدى. جاس مەملەكەتتىك قىزمەتشى رەتىندە مەملەكەتتىڭ گۇلدەنۋىنە, اتالعان ىندەتپەن كۇرەسۋ جولىندا ءوز ۇلەسىمدى قوسىپ جۇرگەنىمدى ماقتانىش كورەمىن.
ءوز ەلىمنىڭ گۇلدەنۋ جولىندا قىزمەت ەتۋ مەن ءۇشىن ۇلكەن ماقتانىش جانە ابىروي دەپ بىلەمىن. مەملەكەتتىك قىزمەت قاشاندا ءمىنسىز بولۋى ءتيىس. سەبەبى ەلدىڭ ەرتەڭى بىزگە بايلانىستى. ءبىر سوزبەن ايتقاندا, بيلىك پەن قاراپايىم حالىق اراسىن جالعايتىن التىن كوپىرگە اينالۋى ءتيىستى. بۇگىندە مەملەكەتتىك سالاداعى مامانداردىڭ ءبىلىم-بىلىكتىلىگىنەن بۇرىن, ادامگەرشىلىك اسىل قاسيەت پەن انانىڭ سۇتىمەن كەلەتىن ءتالىم-تاربيەنى دە تالاپ ەتىلەتىندىگى انىق. مەنىڭ ويىمشا, مەملەكەتتىك قىزمەتشى تەك ءبىلىمدى عانا ەمەس, جوعارى مورالدىق جاۋاپكەرشىلىك پەن ءوز ىسىنە دەگەن ادىلدىك, ادالدىق, ادامگەرشىلىك قاسيەتتەرى قاعيدالاردى قاتاڭ ۇستانعاندا عانا ەلدىڭ ەرتەڭى نۇرلى بولادى.
بارلىق ارىپتەستەرىمدى 23 ماۋسىم – مەملەكەتتىك قىزمەتشىلەر كۇنىمەن قۇتتىقتاپ, اتقارىپ جاتقان جۇمىستارىنا تابىس, مەملەكەتىمىزدىڭ كوركەيۋىنە بىرگە ۇلەستەرىمىزدى قوسۋعا شىن جۇرەكتەن تىلەكتەسپىن!
سەرىك گۇلجان سەرىكقىزى, قر قارجى مينيسترلىگى مەملەكەتتىك مۇلىك جانە جەكەشەلەندىرۋ كوميتەتى نۇر-سۇلتان قالاسى بويىنشا دەپارتامەنتىنىڭ باس مامانى:
– مەن اكىمشىلىك مەملەكەتتىك قىزمەتكە ماگيستراتۋرانى بىتىرگەن كەزدە, ياعني 2016 جىلدىڭ كۇزىندە كەلدىم. بۇل قىزمەتكە كەلۋىمە ەشكىم دە, ەشتەڭە دە سەبەپ بولمادى. مەن مۇنى جۇرەگىمنىڭ قالاۋى دەپ بىلەمىن. ەڭ العاش رەت مەدەۋ اۋدانى اكىمدىگىندەگى وتكەن بوس لاۋازىم ورنىنا كونكۋرسقا تاپسىردىم. شىنى كەرەك, كونكۋرستىق پروتسەستىڭ قالاي وتەرىنەن مۇلدەم بەيحابار بولدىم. ءوزىم دە دايىندالماعاندىقتان, كونكۋرستان وڭ ناتيجە المادىم. بۇل مەن ءۇشىن ۇلكەن ساباق بولدى. كەلەسى جولى الماتى قالاسى ەنەرگەتيكا جانە كوممۋنالدىق شارۋاشىلىق باسقارماسىندا وتكەن بوس لاۋازىم ورنىنا وتكەن كونكۋرسقا باردىم. بۇل جولى مەندە تاجىريبە بولدى. مەن كونكۋرستان وڭ ناتيجە الىپ, العاش رەت اكىمشىلىك مەملەكەتتىك قىزمەتكەر اتاندىم. مەنىڭ مەملەكەتتىك قىزمەتىم كادر سالاسىنان باستالدى. كادر سالاسىن ءاربىر ورگاننىڭ جۇرەگى دەپ بىلەمىن. سەبەبى كادر قىزمەتكەرلەرى – قر زاڭدارى بەكىتكەن تالاپپەن جۇمىس ىستەي وتىرىپ, بۇكىل ورگاننىڭ ءتيىمدى جۇمىس ىستەۋىنە قىزمەت ىستەيتىن كادرلاردى جيناقتاپ, ورگانداعى جۇمىس احۋالىن قالىپتاستىراتىن بىردەن-ءبىر سالا. الىپ شاھار الماتىنىڭ باۋرايىندا وتكەن جۇمىسىم ساپالى قىزمەتكەر رەتىندە قالىپتاسۋىما ءوز پايداسىن تيگىزبەسە, زيانىن ەش تيگىزگەن ەمەس. مەن مەملەكەتتىك قىزمەتتە جۇمىس ىستەي وتىرىپ, ءوز ويىمدى 180 گرادۋسقا وزگەرتتىم. نەگە دەسەڭىز, مەملەكەتتىك قىزمەتكە كەلمەس بۇرىن مەن ورگانداعى قىزمەتكەرلەردە جۇمىس جوق دەپ ويلاعان بولاتىنمىن. قۇلاقپەن ەستىگەنگە ەمەس, كوزبەن كورگەنگە سەن دەگەن ءسوزدىڭ ءجۇز پايىزعا دۇرىس ەكەندىگىنە كوزىم جەتتى. مەملەكەتتىك قىزمەت – ناعىز قايناعان قازان ورتاسى. مەملەكەتتىك قىزمەت – حالىقپەن تىعىز بايلانىس ورناتاتىن وردا.
مەملەكەتتىك قىزمەت دەگەن مەنىڭ تۇسىنىگىمدە – وتانعا قىزمەت ەتۋ. جاس اكىمشىلىك مەملەكەتتىك قىزمەتكەر بولا وتىرىپ, ەلىمنىڭ الپاۋىت مەملەكەتتەرمەن يىق تەڭەستىرە الۋىنا قىزمەت ەتىپ جۇرگەنىمە, ءوزىمنىڭ تامشىداي بولسىن سەپتىگىمنىڭ ءتيىپ جۇرگەنىنە قۋانامىن. قۋانىشىم وزگە ادامداردى ءتۇسىنۋ, جۇمىسقا دەگەن ماحاببات, مول جاۋاپكەرشىلىكتى سەزىنە وتىرىپ جۇمىس ىستەۋ سىندى قاراپايىم قاعيدالارعا سۇيەنگەن. اتالمىش قاعيدالاردىڭ بارلىعىن ءوز قىزمەتىمنەن تاۋىپ تا جۇرگەن جانمىن.
ءوزىمنىڭ جانە ارىپتەستەرىمنىڭ مەملەكەتىمىزدىڭ وركەندەۋىنە قىزمەت ەتىپ جۇرگەندىگى قۋانتادى. مەملەكەتتىك قىزمەتكەر بولعانىم ءۇشىن ماقتانامىن. بۇل – مەنىڭ تاڭداۋىم, بۇل – مەنىڭ جولىم!
ديۋسەمبين ەركەبۇلان ەربولۇلى, «نۇر-سۇلتان قالاسىنىڭ قالالىق ورتا ساپاسى جانە باقىلاۋ باسقارماسى» مم گاز ينسپەكتسيا جانە كوتەرگىش قۇرىلىمدارىن باقىلاۋ ءبولىمىنىڭ باس مامانى:
– قازىرگى قوعامدا جاستاردىڭ مەملەكەتتىك قىزمەتكە دەگەن پىكىرى ءارتۇرلى. كوبى جەكە كاسىپكەر بولۋدى, ءوز-وزىنە جۇمىس ىستەۋدى نەمەسە الپاۋىت كورپوراتسيالارعا بارىپ مول تابىس تابۋدى ويلايدى. مەن مەملەكەتتىك قىزمەتتى تاڭدادىم. وسىلايشا ەلىمىزدىڭ يگىلىگى مەن مۇددەسىنە ەڭبەك ەتۋدى ءجون كوردىم. مەملەكەتتىك قىزمەت, بۇل – تۇراقتىلىق, ەرتەڭگى كۇنگە دەگەن سەنىمدىلىك كەپىلى. مەن ءوز جولىمدى, بولاشاعىمدى دۇرىس تاپتىم دەپ ويلايمىن. بارىڭە تەك ساتتىلىك تىلەيمىن!
قۇرمەتتى ارىپتەستەر, جىل سايىن مەملەكەتتىك اپپاراتتىڭ جۇمىس ساپاسى جاقسارۋدا, وعان قوسا مەملەكەتتىك قىزمەتكەرگە قويىلاتىن تالاپتار دا جوعارىلاۋدا, سوندىقتان بارلىعى ءبىزدىڭ جوعارى كاسىبيلىگىمىز, جانقيارلىق ەڭبەك جانە تاڭداعان ىسىمىزگە دەگەن ادالدىعىمىزعا, پاتريوتيزم مەن بەلسەندى ازاماتتىق ۇستانىمىمىزعا بايلانىستى. كاسىبي مەرەكەلەرىڭىزبەن قۇتتىقتاي وتىرىپ, سىزدەرگە زور دەنساۋلىق, وتباسى اماندىعىن جانە كاسىبي ءوسۋ تىلەيمىز!
ىزگى تىلەكپەن, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتى.
