مەرەيى وسكەن ءمادي
بالالار اراسىندا وتكەن «Memoriad Las-Vegas-2016» (WORLD KIDS CUP) حالىقارالىق وليمپياداسىنىڭ جەڭىمپازى, 27 ەلدەن كەلگەن قارسىلاستارىنان العا شىعىپ, دارا كورىنگەن دارىندى بالا ءمادي ەرداۋلەتتى استانا قالالىق ءبىلىم باسقارماسىنىڭ باسشىسى قاسىمحان سەنعازىەۆ قۇتتىقتاپ, وعان پلانشەت سىيلادى.
بۇگىندە ءمادي ەرداۋلەت ەلورداداعى №54 مەكتەپ-ليتسەيىنىڭ 4-سىنىبىندا وقيدى. ءوز قاتارىنىڭ الدى اتانعان بالا وقۋعا دا جۇيرىك. اسىرەسە, ماتەماتيكا ءپانىنىڭ كۇردەلى ەسەپتەرىنە قامشى سالدىرمايدى. ايتا كەتەيىك, بيىلعى «Memoriad-2016» حالىقارالىق زياتكەرلىك وليمپياداسى لاس-ۆەگاستا ءوتتى. ءمادي ەرداۋلەت «مەنتالدى اريفمەتيكا مەگاسى» بويىنشا ءىى رەسپۋبليكالىق وليمپياداسىنىڭ جەڭىمپازى اتانىپ, وتكەن ماۋسىمدا حالىقارالىق وليمپياداعا جولداما ۇتىپ العان بولاتىن. ماديمەن بىرگە كوماندادا الماتىدان مارعۇلان بايجاقىپ (جالپى ەسەپتە 10-ورىندا), ستەپنوگوردان ءازيز كامەليدەن (21-ءشى) جانە استانادان داليلا ساقانوۆ بولدى.
«Memoriad» ەسەپتى ويشا شىعارۋ جانە جىلدام وقۋ بويىنشا دۇنيەجۇزىلىك وليمپيادا سانالادى. ول وسىنداي جارىستارعا ارنالعان الەمدەگى جالعىز ءبىلىم سايىسى دەسەك بولادى. الەمنىڭ 148 ەلىندە تىركەلگەن. وليمپيادا ءتورت جىلدا ءبىر رەت وتەدى.
سونىمەن, وسىنداي جاھاننىڭ ەڭ دارىندى دەگەن بالالارى باس قوسقان ءبىلىم بايگەسىنەن ماڭدايى جارقىراپ, قازاق بالاسىنىڭ وزىپ كەلۋى – ءبوركىمىزدى اسپانعا اتىپ, قۋانارلىق جاعداي. الداعى تاڭدا ماديگە جاڭا جەڭىستەر تىلەيمىز!
ازامات ەسەنجول