بيىل ەلورداداعى مەملەكەتتىك تىلدە دارىندى بالالارعا ءبىلىم بەرەتىن №9 «زەردە» مەكتەبىنىڭ اشىلعانىنا 10 جىل تولدى. تالاي تالانتتى تۇلەپ ۇشىرعان التىن ۇيانىڭ وسى جىلدار ىشىندە قول جەتكىزگەن جەتىستىگى جايلى اۋىز تولتىرىپ ايتۋعا بولادى.
ەلىمىز بويىنشا «ۇزدىك 100 مەكتەپ» قاتارىنان كورىنگەن وقۋ ورداسى جەتكىنشەكتەرگە جاراتىلىستانۋ-ماتەماتيكا باعدارىنداعى ماتەماتيكا, فيزيكا پاندەرىن تەرەڭدەتىپ وقىتادى. بۇگىنگى تاڭدا ءبىلىم وشاعىندا 320 وقۋشى وقيدى. بالالاردىڭ دەنى – جوعارىدا اتالعان ءپان بويىنشا ءتۇرلى وليمپيادالارعا قاتىسىپ, ۇزدىكتەر قاتارىنان كورىنگەندەر. مەكتەپتە 50 مۇعالىم قىزمەت اتقارادى. ولاردىڭ قاتارىندا ەكى عىلىم كانديداتى, ەكى عىلىم ماگيسترى بار. ءبىلىم بەرۋ سالاسىنىڭ قۇرمەتتى قىزمەتكەرى دەگەن مارتەبەلى اتاقتى سەگىز ۇستاز يەلەنگەن.
بۇگىنگى دەيىن مەكتەپتەن 275 تۇلەك تۇلەپ ۇشسا, ولاردىڭ 68-ءى «التىن بەلگى» يەگەرى اتانعان. قازىرگى كۇندە وسى ۇيادان قاناتتانعان جاستاردىڭ بىرقاتارى استاناداعى نازارباەۆ ۋنيۆەرسيتەتى مەن ماسكەۋ مەملەكەتتىك ۋنيۆەرسيەتەتىندە جانە شەتەلدەگى موينى وزىق جوعارى وقۋ ورىندارىندا ءبىلىم الۋدا.
وسى ون جىل ارالىعىندا №9 «زەردە» مەكتەبىنىڭ وقۋشىلارى استانا قالاسىنداعى ءبىلىم بەرۋ مەكەمەلەرى اراسىندا ۇلتتىق بىرىڭعاي تەستىلەۋدەن ۇنەمى جوعارى بالل جيناپ, العاشقى ورىندا قارا ۇزدىرمەي كەلەدى. سونداي-اق, 2009 جىلى قر ءبىلىم جانە عىلىم مينيسترلىگىنىڭ «ەڭ ۇزدىك جاڭاشىل مەكتەپ» اتاعىنا يە بولدى. 2014 جىلى ەلىمىز كولەمىندە ۇبت-دان 116, 9 ۇپاي جيناپ, ءبىرىنشى ورىنعا كوتەرىلدى.
– بۇگىن ءبىز ءۇشىن ۇلكەن قۋانىشتى كۇن. مەكتەبىمىزدىڭ 10 جىلدىعىن اتاپ ءوتىپ وتىرمىز. ءبىزدىڭ ءبىلىم بەرۋ مەكەمەسى 2005 جىلى دارىندى بالالارعا ارناپ اشىلعان. سودان بەرى جەمىستى جۇمىس ىستەپ كەلەدى. رەسپۋبليكا كولەمىندەگى ۇزدىك ون مەكتەپتىڭ قاتارىندامىز. قالا بويىنشا الدىڭعى ورىندامىز. ۇلتتىق بىرىڭعاي تەستىلەۋ بويىنشا ۇنەمى جوعارى كورسەتكىش كورسەتىپ كەلەمىز. وتكەن جىلى وقۋشىلار 112 بالل جينادى. جەتكىنشەكتەر ماتەماتيكانى تەرەڭدەتىپ وقيدى.
وسى باعىتتاعى ساباق بەرەتىن ۇستازدارىمىز دا مىقتى. مىسالى, تەردىكباي كۇشاي دەگەن مۇعالىم بۇكىل رەسپۋبليكاعا تانىمال. بىرنەشە وقۋ ادىستەمەلىك قۇرالدارىن شىعارعان. سول وقۋلىقتارمەن ەلوردا مەكتەپتەرى عانا ەمەس, باسقا دا ءبىلىم مەكەمەلەرى وقىتىلۋدا. ىرىسبەك ءماۋىتتى دە ەرەكشە ايتقىم كەلەدى. ونىڭ شاكىرتتەرى – رەسپۋبليكالىق ءبىلىم بايگەلەرىنىڭ جەڭىمپازدارى. تاياۋدا باقداۋرەن نارباەۆ پەن سەرىكبولسىن مەيرام دەگەن ەكى وقۋشىمىز حالىقارالىق وليمپيادادان جۇلدەمەن ورالدى. ول دا – ۇلكەن ماقتانىش. بىلتىرعى جىلدان باستاپ اعىلشىن تىلىندە پاندەردى وقىتۋدى تاجىريبەگە ەنگىزدىك. قىسقاسى, الدىمىزعا قويعان ماقسات تا, مىندەت تە جەتەرلىك, – دەيدى مەكتەپ ديرەكتورى ءاليا سەكسەنوۆا.
ون جىل ىشىندە ويداعىداي جەتىستىككە جەتىپ, تالاي تالانتتى باپتاپ ۇشىرعان ءبىلىم ۇياسىنىڭ الار اسۋى ءالى دە بيىكتەي بەرمەك.
ازامات ەسەنجول
