انە-مىنە دەگەنشە تاعى ءبىر وقۋ جىلى اياقتالىپ قالدى. ەندى از كۇننەن كەيىن وقۋشىلار قىزىققا تولى كانيكۋلعا شىعادى. استانا قالالىق ءبىلىم باسقارماسى بالالاردىڭ جازعى دەمالىسىن جاراسىمدى وتكىزۋگە ەرەكشە نازار اۋدارىپ وتىر.
ەلوردالىق ءبىلىم باسقارماسى جاريالاعان مالىمەت بويىنشا جەتكىنشەكتەرگە ارنالعان جازعى دەمالىس ورىندارى قازىردەن باستاپ, دايىندىق قامىنا كىرىسكەن. بالالار ءۇشىن بارلىق قاجەتتىلىكتى قامتاماسىز ەتۋگە ءازىر دەسە بولادى.
ايتالىق, 6 ماۋسىم مەن 12 تامىز ارالىعىندا اقمولا وبلىسى اقكول اۋدانىندا ورنالاسقان «ارمان» سپورتتىق-ساۋىقتىرۋ لاگەرى 5 اۋىسىم بويىنشا جۇمىس ىستەيدى. وعان ءار اۋىسىمعا 330 بالا تارتىلىپ, جالپى, جازعى ۋاقىتتا 1650 وقۋشى قامتىلادى دەپ جوسپارلانۋدا. ماسەلەن, بەس اۋىسىمنىڭ ۇشەۋى تۇرمىسى تومەن جانە كوپبالالى وتباسىلاردىڭ بالعىندارى مەن اتا-اناسى جوق بالالارعا جانە وسىنداي الەۋمەتتىك توپتارعا ارنالىپ ۇيىمداستىرىلماق. ماۋسىمدىق جولدامانىڭ قۇنى 12 كۇنگە 32 مىڭ تەڭگەنى قۇرايدى. وعان جول شىعىندارى, بەس رەت تاماقتانۋ, مادەني-بۇقارالىق جانە سپورتتىق-ساۋىقتىرۋ شارالارى كىرەدى. دەمالىس اۋماعىندا باسسەين, ساۋنا جۇمىس ىستەيدى.
سونداي-اق, اقمولا وبلىسىنىڭ ەرەيمەنتاۋ اۋدانىنداعى العاباس اۋىلىندا ىرگە تەپكەن «باتىر» پالاتالىق لاگەرىن ايتۋعا بولادى. ول جەردە 14 ماۋسىم مەن 14 شىلدە ارالىعىندا ءۇش اۋىسىم بويىنشا 375 اتا-اناسى جوق جەتكىنشەكتەر مەن از قامتىلعان وتباسىنان شىققان بالالار تەگىن دەمالادى. لاگەر جاسوسپىرىمدەردى تۋعان جەردىڭ تاريحىمەن تانىسىپ, تابيعاتتى ايالاۋعا ۇندەيتىن تاعىلىمدىق- تاربيەلىك شارالارعا باعىتتايدى.
سونىمەن بىرگە 1 ماۋسىمنان باستاپ, 8 شىلدەگە دەيىن ەلوردالىق 85 مەكتەپتىڭ جانىنان جازعى لاگەر اشىلىپ, ءۇش اۋىسىم ىشىندە 1-4 سىنىپتا وقيتىن 45 000 وقۋشىنى قابىلداماق. وندا بالالار تەك تاماق ءۇشىن عانا اقى تولەيدى. اتالعان لاگەردىڭ ماقساتى – باستاۋىش سىنىپتا وقيتىن بالالاردىڭ شىعارماشىلىق قابىلەتىن دامىتىپ, سالاۋاتتى ءومىر سالتىن قالىپتاستىرىپ, كانيكۋلدى تاماشا ءبىر اسەردە وتكىزۋدى كوزدەيدى. «ديدارلى جاز» دەپ اتالاتىن ءبىلىم بەرۋ ۇيىمدارى جانىنان قولعا الىنعان سپورتتىق-ويىن الاڭدارى 1-8 شىلدە ارالىعىندا 5-7 سىنىپتىڭ 4000-نان اسا وقۋشىسىن قابىلدايدى. ولار تەگىن قىزمەت كورسەتەدى. «ايبىندى ماۋسىم» اتتى اسكەري-سپورتتىق الاڭدارى 8-10 سىنىپ وقۋشىلارىنا تەگىن دەمالىس ۇيىمداستىرماق. سونداي-اق, 160 بالالار ءۇيىنىڭ تاربيەلەنۋشىلەرى مەن اتا-انانىڭ قامقورلىعىنسىز قالعان جاسوسپىرىمدەر اقمولا وبلىسىندا ورنالاسقان «بوروۆيچوك» دەمالىس ورنىندا ساۋىعادى.
استاناداعى باۋىرجان مومىشۇلى داڭعىلى بويىنداعى وقۋشىلار سارايى جانىنان 1 ماۋسىم مەن 8 شىلدە ارالىعىندا «جازعى دەمالىس اكادەمياسى» ۇيىمداستىرىلماق. ونىڭ ءبىر ماۋسىمداعى (10 كۇن) قۇنى 20 مىڭ تەڭگە بولادى. اكادەمياعا قاتىسۋ باعدارلاماسىندا بالالار تاماقتانۋ, سۋدا ءجۇزۋ, مۇزدا سىرعاناۋ, لينگۆيستيكا ساباقتارى, شاحمات جانە تەاتر ستۋدياسىنا قاتىسۋ سەكىلدى ءتۇرلى ۇيىرمەلەرگە جازىلا الادى. ماحامبەت وتەمىسوۆ اتىنداعى وقۋشىلار سارايى دا 1 ماۋسىم جانە 10 شىلدە ارالىعىندا «شىعارماشىلىقتىڭ جازعى مەكتەبى» جوباسىن قولعا الادى. ونىڭ دا ءبىر ماۋسىمداعى (10 كۇن) قۇنى 20 مىڭ تەڭگەنى قۇرايدى. يگى شارا ماقساتى – جەتكىنشەكتەردىڭ شىعارماشىلىق, تانىمدىق جانە زياتكەرلىك قابىلەتتەرىن دامىتىپ, ونەر-بىلىمگە دەگەن قىزىعۋشىلىقتارىن ارتتىرۋ.
تاعى دا كانيكۋل اياسىندا مەكتەپتەر مەن قوسىمشا ءبىلىم بەرۋ ۇيىمدارىندا وقۋ وشاعىنىڭ اۋماعىن اباتتاندىرۋعا باعىتتالعان كوگالداندىرۋ بريگادالارى, جوندەۋ بريگادالارى, ينتەللەكتۋالدىق, شىعارماشىلىق جانە ءتىل ۇيىرمەلەرى, رەسپۋبليكالىق جانە حالىقارالىق ءپان وليمپيادالارىنا قاتىسۋ, شىعارماشىلىق بايقاۋلار جانە سپورتتىق جارىستار ۇيىمداستىرىلادى.
قىسقاسى, ەلوردالىق وقۋشىلاردىڭ جازعى دەمالىسى شاتتىققا تولى اسەرىمەن, عاجايىپ ساتتەرىمەن, اسەم كورىنىستەرىمەن ەستە قالماق.
ازامات ەسەنجول
