ەل مەرەيىن اسقاقتاتقان رەسپۋبليكا كۇنى قارساڭىندا ەلوردالىق وقۋشىلار دا قالا دەڭگەيىندە اتقارىلىپ جاتقان شارالاردان شەت قالمادى. ماسەلەن, استانا قالاسى سارىارقا اۋدانىنا قاراستى جالپى ورتا ءبىلىم بەرەتىن مەكتەپتەردىڭ شاكىرتتەرى مەرەكە اياسىندا ۇلتتىق ونەردى ۇلىقتاۋعا ۇلەس قوسىپ, ونەرىن پاش ەتتى.
ءال-فارابي اتىنداعى وقۋشىلار سارايىندا «كۇمبىرلەگەن دومبىرا» تاقىرىبىمەن وتكەن شارادا دارىندى دا تالانتتى جاس ونەرپازدار ءبىر مەزەتتە كۇي اتاسى قۇرمانعازىنىڭ «بالبىراۋىن» كۇيىن ورىندادى. عيمارات ءىشىن ەرەكشە كۇيگە بولەگەن 100 ورىنداۋشىنىڭ بۇل باستاماسى ەلىمىزگە دەگەن ۇلاعات, بيىلدان باستاپ قايتا تويلانا باستاعان ۇلىق مەرەكەگە دەگەن قۇرمەت دەپ بىلەمىز.
سان عاسىرلىق تاريحى بار حالقىمىزدىڭ مادەني مۇراسىن ۇلىقتاۋ ارقىلى وسكەلەڭ ۇرپاقتى ۇلتجاندىلىققا, وتانىن قاستەرلەۋگە باۋلىپ كەلەمىز. مەملەكەت باسشىسى قاسىم-
جومارت توقاەۆ ءاردايىم جاستاردىڭ تولىققاندى ءبىلىم الۋىنا, رۋحاني جەتىلىپ, جاڭا قوعامدا باسەكەگە قابىلەتتى بولۋىنا ايرىقشا ءمان بەرىپ كەلەدى. سوندىقتان بۇگىنگى شارادا قۇرمانعازىنىڭ كۇيىن ناقىشىنا كەلتىرىپ ورىنداعان بۇل شاكىرتتەرىمىز بولاشاقتا دا «جاڭا قازاقستاننىڭ» دامۋىنا ءوز ۇلەسىن قوسىپ, اتا-بابا مۇراسىن ارداقتاپ وتەتىنىنە سەنىمىم مول.
جۇلدىز نايمانباەۆا,
ءا.مارعۇلان اتىنداعى №40 مەكتەپ-ليتسەيىنىڭ مۇعالىمى
