استانادا بەلگىلى اقىن, قر مادەنيەت قايراتكەرى مارفۋعا بەكتەمىروۆا تۇرعان ۇيگە ەسكەرتكىش-تاقتا ورناتىلدى.
ومىردەن ەرتە وتكەن قالامگەردىڭ ەسكەرتكىش-تاقتاسى ابىلايحان داڭعىلى, 49/3 مەكەنجايىندا ورناتىلدى. بۇل ۇيدە جازۋشىنىڭ قۇندى ەڭبەكتەرى ومىرگە كەلگەن ەدى.
ەسكەرتكىش-تاقتانى اشۋ سالتاناتىندا استانا قالاسى ءماسليحاتىنىڭ حاتشىسى ەرلان كاناليموۆ اققان جۇلدىزداي دۇنيەدەن ەرتە كەتكەن اقىننىڭ شىعارماشىلىق جولى حالىق جادىنان ۇمىتىلمايتىنىن اتاپ ءوتتى.
– مارفۋعا اپايىمىز قامشىنىڭ سابىنداي قىسقا عۇمىرىندا ەلدىك ماسەلەلەرگە بەلسەنە ارالاسىپ, تاماشا ولەڭدەر شىعارۋمەن قاتار پۋبليتسيستيكا جانرىندا دا وزىندىك قولتاڭباسىن قالدىرا ءبىلدى. شىعارمالارى قازاق پوەزياسىنىڭ ۇزدىك تۋىندىلارىنىڭ قاتارىنان ورىن الدى. بىلتىر ەلوردا تورىندە اقىندى ەسكە الۋعا ارنالعان ادەبي كەش ءوتىپ, ولەڭدەر جيناعى جارىققا شىققان بولاتىن.
قازاقتا «جاقسىنىڭ اتى, عالىمنىڭ حاتى ولمەيدى» دەگەن دانالىق بار. اعا بۋىندى ۇلىقتاۋ, ولاردىڭ قۇرمەتىنە ەسكەرتكىش ورناتۋ, مەموريالدىق تاقتا اشۋ – ءبىزدىڭ ولارعا دەگەن شىنايى قۇرمەتىمىز بەن ىستىق ءىلتيپاتىمىزدىڭ كورىنىسى. ءوزىنىڭ كۇش-قۋاتى مەن ءبىلىمىن تۋعان ەلىنىڭ يگىلىگىنە جۇمسايتىن اسىل ازاماتتاردى ۇلىقتاۋ ءىسى الداعى ۋاقىتتا دا جالعاسا بەرمەك, – دەدى ە.كاناليموۆ.
بۇقارا اقىننىڭ قازاق پوەزياسىنا تىڭ تىنىس, شالقار شابىت اكەلگەنىن جارىسا ايتتى. سولاردىڭ ءبىرى – 6 جىل مارفۋعا بەكتەمىروۆامەن جۋرناليستيكانىڭ قارا شاڭىراعى – قازاق ۇلتتىق ۋنيۆەرسيتەتىندە بىرگە ءبىلىم العان بەلدى پروزاشى, جۋرناليست الىبەك اسقار ەرەكشە ەستەلىكتەرىمەن ءبولىسىپ, اقىننىڭ شىعارمالارىن قازاق ادەبيەتىنە قوسىلعان كوركەم دۇنيەلەر دەپ اتاپ ءوتتى.
قالامگەر قاۋىم مەن ادەبيەت سۇيەر وقىرمان قاتىسقان جيىن بارىسىندا قر وقۋ-اعارتۋ ۆيتسە-ءمينيسترى عاني بەكتايۇلى, Amanat پارتياسى استانا قالالىق فيليالىنىڭ اتقارۋشى حاتشىسى بەرىك جاكەنوۆ, قازاقستان جازۋشىلار وداعىنىڭ حاتشىسى داۋلەتكەرەي كاپۇلى, اقمولا وبلىسى مادەنيەت باسقارماسىنىڭ باسشىسى ايگۇل ءسابيتوۆا مەن وزگە دە زيالى قاۋىم وكىلدەرى ءسوز سويلەدى.
