استانا قالاسىندا «ەڭبەك ميگرانتتارى اراسىنداعى تۋبەركۋلەز ماسەلەسىن بۇقارالىق اقپارات قۇرالدارى ارقىلى كوتەرۋ» تاقىرىبىندا سەمينار-ترەنينگ ءوتتى.
ەكى كۇنگە سوزىلعان شارادا ەڭبەك ميگرانتتارى اراسىنداعى تۋبەركۋلەز ماسەلەسى جانە وسى ماقساتتا قولعا الىنىپ جاتقان جوبالارعا قولداۋ ءبىلدىرىپ كەلە جاتقان جاھاندىق قور تۋرالى جۇرتشىلىقتى حاباردار ەتتى. سونداي-اق, وسى تاقىرىپتا جازىپ جۇرگەن جۋرناليستەردىڭ پراكتيكالىق داعدىلارىن جاقسارتۋ جايى ءسوز بولدى.
رەسمي دەرەكتەرگە سۇيەنسەك, ەلىمىزگە جىلىنا ءبىر ميلليونعا جۋىق ەڭبەك ميگرانتى كەلەدى ەكەن. جۇمىس ىزدەپ كەلۋشىلەردىڭ باسىم بولىگىن قىتاي, وزبەكستان, قىرعىزستان, رەسەي, تۇركيا ازاماتتارى قۇرايدى. ەڭبەك ميگرانتتارى سانىنىڭ ارتۋى ءوز كەزەگىندە بەزگەك, تۋبەركۋلەز, ايتۆ سەكىلدى بىرقاتار اۋرۋلاردىڭ كوبەيۋىنە اسەر ەتىپ وتىرعانى بەلگىلى. وسى ماقساتتا ەلىمىزدە بىلتىردان بەرى Project HOPE حالىقارالىق دەنساۋلىق ساقتاۋ ۇيىمىنىڭ قارجىلاي قولداۋىمەن گاستاربايتەرلەرگە تەگىن مەديتسينالىق كومەك كورسەتۋ شارالارى قولعا الىندى. استانا, الماتى,
اقتاۋ, اقتوبە, قاراعاندى,
شىمكەنت جانە الماتى وبلىسى سەكىلدى ەلىمىزدىڭ 7 وڭىرىندە تۋبەركۋلەزگە قارسى ءۇش جىلعا جوسپارلانعان ءىس-شارالار ءجۇرگىزىلىپ, دەنساۋلىق ساقتاۋ جانە الەۋمەتتىك دامۋ مينيسترلىگى ماماندارى ەڭبەك ميگرانتتارى اراسىندا تۋبەركۋلەزدەن ساقتانۋ جولدارى تۋرالى ناسيحات جۇمىستارىن جۇرگىزىپ, تەگىن مەديتسينالىق تەكسەرۋ وتكىزۋدە. ءبىر عانا استانا قالاسىنىڭ وزىندە 10 ەمحانا حالىقارالىق دەنساۋلىق ساقتاۋ ۇيىمىمەن كەلىسىم شارت جاساسىپ, سىرتتان كەلگەن ميگرانتتارعا تەگىن كومەك كورسەتىپ وتىر. جۇمسالعان قارجىنى حالىقارالىق قور تولەيدى.
«وكىنىشكە قاراي, ەڭبەك ميگرانتتارى ەلىمىزدە تەگىن ەم بار ەكەنىن بىلمەيدى. ۇكىمەتتىك ەمەس ۇيىمدار سونداي ازاماتتاردى ىزدەپ تاۋىپ, بىزگە اكەلىپ جاتىر. وتكەن جىلى وسىنداي شارالاردىڭ ارقاسىندا ورتالىعىمىزدا 22 ناۋقاس انىقتالسا, بيىل جىل باسىنان بەرى تاعى 15 ميگرانت ەمدەلىپ شىقتى» دەيدى استانا قالالىق تۋبەركۋلەزگە قارسى ديسپانسەردىڭ باس دارىگەرى اننا تسەپكە.
بۇركىت نۇراسىل
