ەلوردا تورىندە ءوتىپ جاتقان كورمەنىڭ ميلليونىنشى قوناعى بەلگىلى بولدى. ول استانا قالاسىنىڭ 27 جاستاعى تۇرعىنى – گۇلجيھان جاڭابەرگەنوۆا.
11 شىلدە, كەشكى ساعات 18:06 كەزىندە وپەراتسيالىق ورتالىق قىزمەتكەرلەرى ءتورت كىرەبەرىس بويىنشا باقىلاي وتىرىپ, ميلليونىنشى تىركەلگەن كەلۋشىنى انىقتادى. تاۋەلسىزدىك مونۋمەنتى جاعىنان كىرگەن قوناق №76 مەكتەپ-ليتسەيىنىڭ مۇعالىمى. ول كورمەنى تاماشالاۋعا جۇبايى جانە قىزىمەن بىرگە كەلگەن ەكەن.
«ەلىمىزدە ءوتىپ جاتقان كورمەنى تاماشالاۋ ءۇشىن ەكىنشى رەت كەلگەن ەدىم. حالىقتىڭ كوپ بولعانى سونشا, العاش كەلگەن كەزدە «نۇر الەم» پاۆيلونىن كورە الماي كەتكەن ەدىم. مىنە, ەكىنشى مارتە كەلگەندە ءوزىمنىڭ ميلليونىنشى قوناق ەكەنىمدى ءبىلىپ, تاڭ قالدىم. ارينە, قۋانىشتىمىن. ەلىمىزدىڭ ابىرويىن اسقاقتاتاتىن حالىقارالىق شاراعا كەلۋشىلەر قاتارى ميلليوننان دا كوپ بولسىن دەپ تىلەيمىن» دەيدى ول.
گۇلجيھان جاڭابەرگەنوۆانى قۇتتىقتاۋدى «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ تە ۇمىتپادى. ول وتباسىمەن كەلگەن مەيمانعا باعالى سىيلىق تاپسىرىپ, كورمەنىڭ ەڭ كەرەمەت شوۋى – اتاقتى ديۋ سولەي تسيركىنىڭ قويىلىمىنا بيلەتتەر تارتۋ ەتتى.
«حالىقتىڭ كورمەگە دەگەن قىزىعۋشىلىعى كۇن ساناپ ارتىپ كەلەدى. وسىدان ەكى اي ۋاقىت بۇرىن 500 مىڭىنشى قوناق تىركەلسە, بۇگىندە تاماشالاۋشىلاردىڭ سانى ميلليون قوناققا جەتتى» دەيدى احمەتجان ەسىموۆ.
گۇلميرا ايماعانبەت
