بيىلعى ارحەولوگيالىق قازبا جۇمىستارى كەزىندە تۇركىستان شاھارىنىڭ ەڭ ەجەلگى بولىگى – كۇلتوبە قالاجۇرتىندا عالىمدار حاناكا دەپ اتايتىن ەجەلگى سوپىلىق ءمىناجات ەتۋ عيماراتى تابىلدى.
بۇل ەرەكشە ولجانى Eurasian Resources Group (ERG) قارجىلىق قولداۋىمەن جۇزەگە اسىرىلىپ جاتقان «كۇلتوبە قالاجۇرتىنىڭ تاريحي نىساندارىن قالپىنا كەلتىرۋ» جوباسى اياسىندا قازاق مادەنيەت عىلىمي-زەرتتەۋ ينستيتۋتىنىڭ عالىمدارى تاپقان.
مامانداردىڭ پىكىرىنشە, كۇلتوبەلىك حاناكا – XV عاسىردان XIX عاسىرعا دەيىنگى ارالىقتا قىزمەت ەتكەن ءمىناجات ەتۋ جانە جەرلەۋ راسىمدەرى وتكەن ساۋلەت ەسكەرتكىشى. ويتكەنى مۇندا كەشەننىڭ بارلىق ءۇي-جايلارى مەن عۇرىپتىق زالدارىنىڭ قالدىقتارى عانا ەمەس, ءدارۋىش وردەنىنە قىزمەت ەتكەندەردىڭ سۇيەگى تابىلدى. مۇنداي ەسكەرتكىشتەر تۇركىستان وبلىسىنداعى وتىرار جانە قايالىق قالاجۇرتتارىنداعى ەكى حاناكانى ەسەپكە الماعاندا, وتاندىق عىلىمدا ءىس جۇزىندە ءالى بەلگىسىز جانە از زەرتتەلگەن.
كۇلتوبە قالا جۇرتىنداعى حاناكا – جىلىتۋ پەشتەرى مەن كىشكەنتاي تاندىرلارى بار 10 بولمەدەن تۇراتىن كەشەن. عيماراتتىڭ وڭتۇستىك-شىعىس بولىگىندە 7 جەرلەنگەن جەراستى تابىتى بار تىكبۇرىشتى ءپىشىندى كەسەنە ورنالاسقان.
