مينيسترلەر باتىرلار جىرىن بىلە مە؟
الەۋمەتتىك جەلى ارقىلى وقيعا قازىر تەز تارايتىنى ءمالىم. كەشە «قازاقستان» رترك» اق باسشىسى ەرلان قارين «الپامىس باتىر جىرىنان» شاعىن ءۇزىندى وقىپ, فەيسبۋكتەگى پاراقشاسىنا سالىپتى. مۇنى جەلىدە باتىرلار جىرىن جاتقا ايتۋدان ءوتىپ جاتقان «تۇلپار ءمىنىپ, تۋ العان» ۇلتتىق جوباسىن قولداۋ ماقساتىندا جاريالاعانىن ايتقان. ەستافەتانى بەلگىلى جۋرناليست, جامبىل وبلىسى اكىمدىگىنىڭ ىشكى ساياسات باسقارماسىنىڭ باسشىسى بەرىك ۋاليدەن قابىلداپتى.
جىردان ءۇزىندى وقىعان سوڭ ەرلان قارين جازباسىن «ەلىمىزدىڭ كونەدەن كەلە جاتقان مۇراسىن مەن دە ايتىپ بەردىم. ەندىگى ەستافەتانى ۇلتتىق ونەرىمىزدى ءاردايىم قولداپ, ناسيحاتتاپ جۇرگەن اقپارات جانە كوممۋنيكاتسيالار ءمينيسترى داۋرەن اباەۆقا جولدايمىن» دەپ اياقتاپتى.
ۇرپاق تاربيەسىنە ۇلەسى دە, ىقپالى دا مول باتىرلار جىرلارىن وسىنداي ايتۋلى ازاماتتار الەۋمەتتىك جەلى ارقىلى ناسيحاتتاپ, يگى ىسكە ءبىرىن-ءبىرى تارتىپ جاتقانى قۋانتقانى راس. ءبىز, البەتتە, اقپارات جانە كوممۋنيكاتسيالار مينيسترىنىڭ بۇل سىننان سۇرىنبەيتىنىنە سەنەمىز. الدا-جالدا داۋرەن اباەۆ ەستافەتانى وزىمەن ۇكىمەتتە يىق تەڭەستىرىپ جۇرگەن ارىپتەستەرى – ءبىلىم جانە عىلىم ءمينيسترى ەرلان ساعاديەۆكە, قورعانىس ءمينيسترى نۇرلان ەرمەكباەۆقا نەمەسە ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆاعا ياكي ادىلەت ءمينيسترى مارات بەكەتاەۆقا جولداسا, ولار قازاق رۋحاني مۇراسىنىڭ تۋىن جەلبىرەتىپ, ابىروي بيىگىنەن كورىنە الار ما ەدى؟
ەل الدىندا جۇرگەن اتقامىنەر ازاماتتارىمىز باتىرلار جىرىن بىلە مە؟ ادامدى ەڭبەكسۇيگىشتىككە, ادىلەتتىلىككە, باتىرلىققا, كەڭدىككە, بىلىمپازدىق پەن كورەگەندىككە – جالپى بيىك ازاماتتىققا ءۇندەيتىن ۇلتتىق رۋحاني مۇرالارىمىزبەن ولار ءوزى تانىس پا؟
ەستافەتا وزىنە جولدانسا, وزگە مينيسترلەر قايتەر ەكەن؟ مينيسترلەر «تۇلپار ءمىنىپ, تۋ ۇستاسا» ەل ىشىندەگى بەدەلى اسپانداپ وسەتىنى اقيقات. ءوسكەلەڭ ۇرپاق ولاردى ونەگە تۇتار ەدى…