وتكەن سەنبى كۇنى 2 كىشكەنتاي بالاسى بار جاس وتاۋ قوناققا شاقىردى. داستارقان باسىندا ءسوز كەزەگى كەلگەندە ءۇي يەسىنە العىسىمدى ءبىلدىرىپ, «بوتاقاندارىڭ وسە بەرسىن, كەلىن كوپبالالى انا بوپ, التىن القا السىن» دەپ تىلەك تىلەپ ەدىم, «مەنى دە اقوردانىڭ الدىنا بارىپ ارىز ايتىپ ءجۇرسىن دەيسىز بە؟!» دەپ كەلىن كۇلىپ قويدى.
وسىدان كەيىن تاقىرىپ تابيعي تۇردە كوپبالالى انالار جايىنا اۋىسىپ, اركىم ءارتۇرلى پىكىر ايتتى. بىرەۋ «كوپ بالا تاۋىپ نە كەرەك, ونى باعۋ دا وڭاي ەمەس» دەسە, ەندى بىرەۋلەر «كوپبالالىمىن دەپ ۇكىمەتكە الاقان جايعانشا, تۋماعان دۇرىس» دەپ كەرى تولعادى. وسى سوزدەرگە قاراپ, قازىر جۇرت اراسىندا «كوپبالالى انالار – قوعامداعى ەڭ وسال توپتىڭ ءبىرى» دەگەن كوزقاراس قالىپتاسىپ كەلە جاتقانىن بايقاۋعا بولاتىنداي.
باق بەتتەرىن اشساڭ دا «اكىم كوپبالالى انالاردى قابىلداپ, ولاردىڭ مۇڭ-مۇقتاجىن تىڭدادى», «كوپبالالى انالار شەرۋگە شىقتى», «كوپبالالى انالارعا مىناداي كومەك كورسەتىلدى» دەگەن اقپاراتقا شالىنىپ جىعىلاسىڭ. ياعني ءبىزدىڭ ەلدە كوپبالالى انالاردى جاعىمدى تۇرعىدان – ەلىمىزدىڭ دەموگرافيالىق وسۋىنە ۇلەس قوسىپ جاتقان التىن قۇرساق, پاتريوت انالار تۇرعىسىنان ناسيحاتتاۋدان گورى ولاردى كومەككە مۇقتاج, بەيشارا ەتىپ كورسەتۋ باسىم سياقتى. ءبىر اۋىز سوزبەن ايتقاندا, ولارعا بەرىلەتىن مەملەكەتتىك قاراجاتتىڭ ءوزى ولاردى ىنتالاندىرۋ تۇرعىسىنان ەمەس, مۇسىركەپ بەرىلەتىندەي اسەر ەتەدى. ايتارلىقتاي الەۋمەتتىك جەڭىلدىك جوق, بالا باققانى ءۇشىن كومەك تىم ماردىمسىز. ەندەشە ونى كورگەن جاس انالار قايدان كوپبالالى بولعىسى كەلسىن؟! «قوي, كوپبالالى بولىپ كوپتىڭ سوزىنە قالعانشا, ءبىر-ەكى بالا تاۋىپ جانىمدى باعايىن, قازاقتىڭ ءوسۋ-وسپەۋى ماعان قاراپ تۇرماعان شىعار» دەپ شەشەتىنى انىق. ال شىن مانىندە, ءبىزدىڭ ەلدەگى ەڭ قاستەرلى ادام كوپبالالى انالار بولۋعا ءتيىس. وكىنەرلىگى, ءبىزدىڭ انالار سول قۇرمەتتى شىنايى سەزىنە الماي وتىر. كەرىسىنشە, كوپبالالى انالاردى سول قۇرمەتتى ورنىن تالاپ ەتكەنى ءۇشىن «كومەككە مۇقتاج جانداي» كوزگە تۇرتكى قىلامىز. بۇل جاي نارسە سياقتانعانمەن, ەرتەڭ ەلدىڭ دەموگرافيالىق ءوسىمى قۇلدىراسا, ەسەلەپ اقشا بەرسەڭ دە, ەشكىمنىڭ تۋعىسى كەلمەيتىن جاعدايعا جەتۋىمىز مۇمكىن…
