مۇگەدەك جاندار كومەككە مۇقتاج
قازاق ساڭىراۋلار قوعامىنىڭ استانالىق فيليالىندا مۇگەدەك ايەلدەردى الەۋمەتتىك قورعاۋ شارالارىن تالقىلاعان دوڭگەلەك ۇستەل وتىرىسى ءوتتى.
مۇمكىندىگى شەكتەۋلى جانداردىڭ, سونىڭ ىشىندە مۇگەدەك ايەلدەردى جۇمىسپەن قامتۋ – قوعامنىڭ وزەكتى ماسەلەلەردىڭ ءبىرى. بۇگىنگى تاڭدا استانادا 18666 مۇگەدەك تىركەلگەن, ونىڭ 8695-ءى ايەلدەر. ولاردىڭ ىشىندە ەڭبەك ەتۋگە قابىلەتتى ەكى مىڭعا تارتا ازاماتتاردىڭ تەڭ جارتىسى نازىك جاندى ازاماتتار.
ءار ادامنىڭ ەڭبەك ەتۋگە قاقى بار. الايدا, جۇمىس بەرۋشىلەر مۇمكىندىگى شەكتەۋلى ازاماتتاردى جۇمىسقا الۋعا اسا قۇلىقتى ەمەس. ونىڭ ءبىر سەبەبى – ولاردىڭ وسى ساناتتاعى جاندارمەن جۇمىس ىستەۋ تاجىريبەسى كەمدىگى بولسا, ەكىنشىسى – مۇگەدەك جاندارعا قولايلى جۇمىس ورنىن ۇيىمداستىرۋدىڭ قيىندىعى تاعى بار.
قالالىق ءماسليحات دەپۋتاتى قارشىعا قۇلمۇحانوۆ, «دوس» تاۋەلسىز ءومىر ورتالىعى» قوعامدىق بىرلەستىگىنىڭ ءتورايىمى دينا ەردىلدينوۆا, «قازاقستان ايەلدەر كەڭەسى» استانالىق فيليالىنىڭ جەتەكشىسى حانزادا بالتاەۆا, باقىلاۋ جانە الەۋمەتتىك قورعاۋ دەپارتامەنتىنىڭ باسشىسى دامەجان سادۋاقاسوۆا جۇمىسسىز ايەلدەرگە قاتىستى تۇرعىسىندا قوردالى ماسەلەلەردىڭ شەشىمىن تابۋ باعىتىندا بىرلەسە ارەكەت ەتۋدىڭ تيىمدىلىگىن العا تارتتى.
جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ولگا دەمۋشكان مۇگەدەكتەردى الەۋمەتتىك وڭالتۋ باعدارلاماسى شەڭبەرىندە اتقارىلعان جۇمىستارعا توقتالىپ ءوتتى. ول جۇمىسسىز ايەلدەردىڭ باسىم بولىگى الەۋمەتتىك كومەككە اسا مۇقتاجداردىڭ ساناتىنا جاتاتىنىن ايتتى. وتباسىندا مۇگەدەك بالا تاربيەلەپ وتىرعان كوپ بالالى انالار, كوپ ۋاقىت بويىندا جۇمىستان قول ءۇزىپ قالعان زەينەتالدى جاسقا جەتكەن ايەلدەرگە الەۋمەتتىك كومەكتىڭ اسا قاجەتتىلىگىن ايتتى.
ايگۇل ۋايسوۆا