قاريالار مارقايىپ قالدى
استانا قالاسى قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەسىندە مەنەدجمەنت جانە بيزنەس كوللەدجىنىڭ ۇيىمداستىرۋىمەن «مەيىرىمدى قولداردان ماحابباتپەن» اتتى قايىرىمدىلىق اكتسياسى ءوتتى. استانا كۇنىنە وراي ۇيىمداستىرىلعان شاراعا قاتىسۋشىلار – ارناۋلى وقۋ ورنى ۇستازدارى مەن شاشتاراز جانە ساندىك كوسمەتيكا ماماندىعىنىڭ ستۋدەنتتەرى.
باسقوسۋ بارىسىندا ستۋدەنتتەر مەكەمە تۇرعىندارىنىڭ شاشىن قيىپ, ساندەپ, ءتۇرلى شاش ۇلگىلەرىن جاساپ بەردى. قاريالار بىلىكتى شاشتاراز قىزمەتىنە ءدان ريزا بولىپ, اق تىلەكتەرىن جاۋدىردى. ارداگەر جۋرناليست بۋراباي بابيەۆ وسى ىسپەتتى يگى شارالار, اسىرەسە, الەۋمەتتىك مەكەمەلەردە ءوتىپ تۇرسا, قۇبا-قۇپ بولاتىندىعىن ايتتى.
«ءبىز بۇگىن قارتتارعا قۋانىش, مەيىرىم سىيلايىق, قايىرىمدى ءىس جاسايىق دەپ كەلدىك. بۇل – كوللەدجدىڭ جىل سايىنعى ءداستۇرى دەسەك تە بولادى. بيىل ەكىنشى رەت كەلىپ وتىرمىز. ءتورت جىلدان بەرى يگى باستامامىزدىڭ ارا-جىگى ۇزىلمەي, جالعاسىن تاۋىپ كەلەدى. بۇگىنگى شارانى وتكىزۋدەگى باستى ماقساتىمىز – جاس ۇرپاقتى ۇلكەندەردى سىيلاۋعا, قۇرمەتتەۋگە تاربيەلەۋ» دەيدى اكتسيانىڭ وتكىزىلۋىنە مۇرىندىق بولعان كوللەدج ديرەكتورىنىڭ تاربيە ءىسى جونىندەگى ورىنباسارى راۋشان بەكتۇرسىنوۆا.
بولاشاق شاشتاراز ماماندار ەكى-ەكىدەن بىرىگىپ, قارتتاردىڭ ارقايسىنىڭ بولمەسىنە كىرىپ, قىزمەتتەرىن زور ىقىلاسپەن ورىندادى. قاريالاردىڭ ءبىرى رايسا يۆانوۆنانىڭ بولمەسىنە تىلەۋلەس, ماحاببات ەسىمدى ستۋدەنتتەر باس سۇققاندا, رياسىز ءماز بولىپ, شىن جۇرەكتەن قۋاندى. قىزدار ءوز جۇمىسىنا كىرىسكەن ساتتە-اق اق جاۋلىقتى اجە اڭگىمەسىن ايتىپ, كوڭىل حوشىنىڭ جوعارى ەكەنىن ءبىلدىردى.
ايگۇل وزەكوۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى