ەلوردا ءماسليحاتىنىڭ تۇراقتى كوميسسيالارى استاناداعى كەيبىر كوشەلەرگە اتاۋلار بەرۋ جانە قايتا اتاۋ ماسەلەلەرىن قارادى.
قالاداعى ونوماستيكالىق كوميسسيانىڭ مۇشەلەرى, اۋدان اكىمدەرىنىڭ ورىنباسارلارى, ەلوردا اكىمدىگىنە قاراستى باسقارمالار مەن قوعامدىق بىرلەستىكتەردىڭ وكىلدەرى قاتىسقان وتىرىستا تىلدەردى دامىتۋ باسقارماسىنىڭ باسشىسى ەربول تىلەشوۆ اتالمىش كوميسسياعا 2010-2012 جىلدارى قالالىق ونوماستيكا كوميسسياسىنا استانا قالاسىنىڭ كوشەلەرىنە اتاۋ بەرۋ تۋرالى 21 جانە قالا كوشەلەرىن قايتا اتاۋ تۋرالى ەكى ۇسىنىس كەلىپ تۇسكەنىن جەتكىزدى. ونىڭ ايتۋىنشا, بۇل ۇسىنىستاردى قازاقستان رەسپۋبليكاسى پارلامەنتىنىڭ دەپۋتاتتارى, استانا قالاسىنىڭ زيالى قاۋىم وكىلدەرى مەن باس قالامىزدىڭ تۇرعىندارى جاساعان. ولار استاناداعى كەي كوشەلەردى قىرعىزستان جانە قازاقستاننىڭ حالىق جازۋشىسى, مەملەكەت جانە قوعام قايراتكەرى شىڭعىس ايتماتوۆتىڭ, ۆەنگريا رەسپۋبليكاسىنىڭ استاناسى بۋداپەشت قالاسىنىڭ قۇرمەتىنە, ۇلت-ازاتتىق قوزعالىسىنىڭ باتىرى بۇقاربايدىڭ, مەملەكەت قايراتكەرى, ەتنوگراف عالىم وزبەكالى جانىبەكوۆتىڭ ەسىمىمەن اتاۋدى ۇسىنعان. سونداي-اق, الداعى ۋاقىتتا ەلوردادا اقىن كەنەن ازىرباەۆتىڭ, مەملەكەت جانە قوعام قايراتكەرى ءىلياس وماروۆتىڭ, جازۋشى دراماتۋرگ زەيىن شاشكين مەن قازاق كسر-ءنىڭ حالىق ءارتىسى ءامينا ومىرزاقوۆانىڭ اتىندا كوشە بولسا, استاناداعى دارابوز جانە توقپانوۆ كوشەلەرى كەلەشەكتە بىرىكتىرىلىپ, رەجيسسەر, پەداگوگ, قازاقستاننىڭ حالىق جازۋشىسى اسقار توقپانوۆتىڭ ەسىمىمەن اتالسا دەگەن وتىنىشتەر ءتۇستى. سونىمەن بىرگە, ميرزويان كوشەسىنىڭ تۇرعىندارى جانە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى وسى كوشەنى عالىم قانىش ساتباەۆتىڭ ەسىمىمەن قايتا اتاۋ جونىندە ۇسىنىس بىلدىرگەن.
سۇبەلى ءسوز
قابىكەن زاكاريانوۆ, «ادىلەت» تۇتىنۋشىلار قۇقىعىن قورعاۋ قوعامدىق بىرلەستىگىنىڭ توراعاسى:
– سوڭعى كەزدە قالادا قانشاما كوشە اتاۋى اۋىستىرىلدى. ارينە, جاي ادامنىڭ اتىنا كوشە بەرىلمەيدى. مەن وعان ەش قارسى ەمەسپىن. دەگەنمەن, وسى قالادا ەلۋ جىل تۇرسام دا, كەيدە جاڭا اتاۋلارعا قاراپ, ولاردىڭ كىم ەكەنىن ەسىمە تۇسىرە الماي قينالامىن. سوندىقتان, كوشەلەرگە جاڭا اتاۋ بەرگەندە, ول ادامنىڭ قانداي قىزمەتتەر اتقارعانى مەن حالىققا سىڭىرگەن ەڭبەگى تۋرالى از-كەم اقپارات جازىپ ءىلۋ كەرەك. كۇنى ەرتەڭ «ەكسپو -2017» كورمەسىنە قالامىزعا بەس ميلليون كىسى كەلەدى, سوندا ولاردىڭ الدىندا ۇيالىپ قالمايىق.
تاعى ءبىر ايتارىم: قالامىز كەيىنگى كەزدە ادام تانىماستاي وزگەردى. كوشەلەردىڭ اتتارى دا وزگەرىپ جاتىر. كەيدە ولاردىڭ ەسكى اتى الىنباي, سول قالپىندا قالىپ قويادى. ال, كوندۋكتورلارىمىزدىڭ بارلىعى بىردەي ونىڭ جاڭارتىلعانىن بىلە بەرمەيدى. ءوزى بىلمەگەن سوڭ جۇرتتى شاتىستىراتىندارى تاعى بار. وسى جاعىن دا ەسكەرگەن ءجون.
بۇل رەتتە ەربول ەردەنبەكۇلى كوميسسيا مۇشەلەرىنىڭ شەشىمىنە سايكەس, باس قالانىڭ ەسىل اۋدانىنداعى №218, №219, №220, №221, №224, №225 كوشەلەرگە جۋساندى, ورىكتى, شەتەندى, شىرشالى, ەمەندى, المۇرتتى دەگەن جەمىس اتاۋلارىن بەرۋ تۋرالى ۇسىنىستىڭ بولعانىن جەتكىزدى. وسىعان وراي, حالىق قالاۋلىلارى ق.قۇلمۇقانوۆ, ت.ورازاقوۆ, ا.كيم ءوز پىكىرلەرىن ورتاعا سالدى. دەپۋتات س.بوگاتىرەۆ قالامىزدىڭ دامۋىنا ۇلەس قوسقان اتاقتى ادامداردىڭ اتى-جوندەرىنىڭ بۇرمالانباي, دۇرىس جازىلۋىنا ءمان بەرۋ كەرەكتىگىن ەسكەرتسە, ت.ەگىنباەۆ: «بۇقارباي باتىردىڭ اتىنا كوشە بەرۋ ءۇشىن نەگە رىسقۇلوۆ اتىنداعى كوشەنى وزگەرتۋىمىز كەرەك؟» دەدى. بۇل ماسەلەنى باسقارما باسشىسى: «رىسقۇلوۆتىڭ ۇلكەن قوعام قايراتكەرى ەكەندىگىن ەسكەرىپ, وسىدان ءۇش ءتورت جىل بۇرىن كوميسسيا مۇشەلەرى سول جاعالاۋداعى نازارباەۆ ۋنيۆەرسيتەتىنىڭ الدىنداعى ۇلكەن كوشەگە ول كىسىنىڭ اتىن بەرگەن ەكەن, ال «كونگرەسس-حولل» سارايىنىڭ ارتىنداعى شاعىن كوشە ول كىسىگە لايىق ەمەس دەپ, باتىر ەسىمىن كوشەنىڭ ەسكى اتىنىڭ ورنىنا بەردىك» دەپ ءتۇسىندىردى.
ءبىر كىسىنىڭ اتىندا ەكى كوشەنىڭ بولۋى, ارينە, دۇرىس ەمەس. سوندىقتان, دەپۋتاتتار كەلەشەكتە وسىنداي ولقىلىقتارعا جول بەرمەۋ كەرەكتىگىن اتاپ ايتتى. ال, قالالىق ءماسليحاتتىڭ حاتشىسى سانسىزباي ەسىلوۆ, ەڭ باستىسى, ادامداردىڭ اتى-ءجونىن دۇرىس جازۋعا نازار اۋدارىلۋ كەرەكتىگىن ايتتى.
