جۋىردا اقش-تىڭ نيۋ-يورك قالاسىندا «New York Realism Fine Art» اتتى بەينەلەۋ ونەرى شەبەرلەرىنىڭ حالىقارالىق بايقاۋى ءوتتى. وعان قازاقستان اتىنان قاتىسقان ەلوردالىق سۋرەتشى رەنات ەلۋباەۆ ەلىمىزدىڭ اتىن اسقاقتاتتى. جەرلەسىمىز تورتكۇل الەمنەن جينالعان ەكى مىڭ سۋرەتشىنىڭ اراسىنان دارا شىعىپ, التىن مەدالدى جەڭىپ الدى.
بايقاۋ بەينەلەۋ ونەرىنىڭ ءتۇرلى جانرىن قامتىدى. شەتەلدىك ساراپشىلار رەنات سالعان جۇمىستاردىڭ بوياۋىنىڭ قانىقتىعىنا نازار اۋدارىپ, يمپرەسسيونيزم باعىتىنداعى ەڭبەگىن اتاپ ءوتتى. سۋرەتشى بۇل بايقاۋعا «كوش» دەپ اتالاتىن سۋرەتتەر تسيكلى مەن تۋعان جەرى تورعاي دالاسىنىڭ كورىنىستەرىن جىبەرگەن بولاتىن. ۇلتتىق سيپاتتاعى بۇل تۋىندىلار ساراپشىلاردى ءتانتى ەتتى.
جالپى, بيىلعى جىل سۋرەتشى ءۇشىن جەمىستى بولىپ تۇر. رەنات كوكتەمدە ەلوردادا وتكەن ۇلى جەڭىستىڭ 70 جىلدىعىنا ارنالعان بايقاۋدا ءۇشىنشى ورىندى يەلەندى. ارتىنشا بەلارۋس رەسپۋبليكاسىنداعى «كۋرشينالە – 2015» حالىقارالىق ونەر وليمپياداسىندا «جيۆوپيس» اتالىمى بويىنشا توپ جاردى. ەندى, مىنە, مۇحيتتىڭ ارعى جاعىن دا مويىنداتىپ وتىر.
«مەنەن بۇرىن وسى مەدالدى اتاقتى سۋرەتشىمىز قاناپيا تەلجانوۆتىڭ شاكىرتى تالعات تىلەۋجان جەڭىپ العان. ول كىسى جەڭىسىمدى ەستىپ, مەنى ارنايى قۇتتىقتادى. «سەنىڭ ۇلكەن جەتىستىگىڭ جۇرەگىمە جىلى ءتيدى. قازاقستانداعى سۋرەت ونەرىن وسىلايشا بيىكتە ۇستاپ ءجۇر» دەگەن حاتتى كەشە جازىپ جىبەردى. وسىنداي اعالارىمنىڭ جولىن بەرسىن دەپ تالپىنىپ ءجۇرمىن» دەيدى رەنات ەلۋباەۆتىڭ ءوزى.
رەنات ەلۋباەۆ – قازىردە «استانا وپەرا» مەملەكەتتىك وپەرا جانە بالەت تەاترىنىڭ قىزمەتكەرى. بىلتىر قر تۇڭعىش پرەزيدەنتى مۋزەيىندە جەكە كورمەسى دە وتكەن. ونىڭ جۇمىستارىمەن سول مۋزەيگە بارىپ, تانىسۋعا بولادى.
امانعالي قالجانوۆ
