اكىمنىڭ الدىندا ءوتىنىشىن ايتۋعا مۇمكىندىك العان اسقار بەكماعامبەتوۆ «سيليكاتنىي» تۇرعىن ءۇي الابىنداعى ءۇيدىڭ اپاتتى جاعدايدا دەپ تانىلعانىن, الايدا قازىرگى ۋاقىتتا وندا 50-گە جۋىق ادام تۇرىپ جاتقانىن ايتتى. «قازىردىڭ وزىندە كىرەبەرىستىڭ ءبىر ەسىگى سىنعان. ءبىز ءۇيىندىنىڭ استىندا قالىپ قويامىز با دەپ قورقامىز. بىزگە ءۇيىمىزدى قاشان بۇزىلاتىنىن جانە قاي ۋاقىتتا كوشىرەتىنىن ايتقان ەشكىم جوق» دەدى ول.
تۇرعىننىڭ ايتقان ماسەلەسىنە بايلانىستى قالا اكىمى «سيليكاتنىي» تۇرعىن ءۇي الابىنداعى ۇيلەرگە بارۋدى جۇمىس كەستەسىنە ەنگىزىپ قويدى. قابىلداۋ بارىسىندا اۋدان اكىمدەرى مەن باسقارما باسشىلارىنىڭ جانە ولاردىڭ ورىنباسارلارىنىڭ تۇرعىندارعا اقپاراتتى تولىق جەتكىزبەيتىنى جانە جۇرگىزىلىپ جاتقان جۇمىس جوسپارلارى مەن كومەك كورسەتۋ شارالارى تۋرالى قاراپايىم تىلدە تۇسىندىرمەيتىنى انىقتالدى. قالا باسشىسى ارىپتەستەرىنە حالىقپەن ناقتى تىعىز بايلانىس ورناتۋ قاجەت ەكەنىن اتاپ ءوتتى. «كومەككە مۇقتاج ازاماتتار الدىمىزعا كەلگەندە قاعازباستىلىقپەن اينالىسپاۋ كەرەك» دەدى ا.كولگىنوۆ. ايتا كەتەيىك, ءبىر اي ىشىندە قالا باسشىسى 200-دەن اسا ادامدى قابىلدادى.
