وتباسى قۋانىشى – وتان قۋانىشى

«نۇرلى ەرتىس» باعدارلاماسى ەلباسىنىڭ ستراتەگيا­لىق ساياساتىن ارى قاراي جۇزەگە اسىرۋداعى مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس قولعا الىنعانىن اتاپ وتكەن قالا باسشىسىنىڭ ورىنباسارى ەكىباستۇزعا كوشىپ بارعان وتباسىلارعا بارلىق جاعدايلار جاسالاتىنىن ايتتى.
«وسىنىڭ ءبارى بالالاردىڭ, ەلىمىزدىڭ بولاشاعى ءۇشىن جاسالىپ جاتىر. امان-ەسەن جەتىڭىزدەر. مەن دە سىزدەرمەن بىرگە جولعا شىعىپ, سول جاقتان قارسى الامىن. مەنىڭ ماقساتىم – سىزدەرگە قانداي پاتەر, قانداي مۇمكىندىك بەرىلەتىنىن ءوز كوزىممەن كورىپ قايتۋ» دەدى ب. ماكەن.
قازىرگە دەيىن نۇر-سۇلتاننان كوپبالالى وتباسىلاردىڭ بارلىق مۇشەلەرىن قوسقاندا 600-دەن استام ادام ەكىباستۇزعا كوشتى. «بۇگىن ولارعا تاعى 208 ادام قوسىلىپ وتىر. ولاردىڭ ءبارىن باسپانامەن قامتىپ, جۇمىسقا تۇرعىزامىز. جالاقى كەم دەگەندە 120 مىڭ تەڭگە بولادى. ەلوردادان قونىس اۋدارعان وتباسىلار جاڭادان بوي كوتەرگەن تۇرعىن ۇيلەرگە قونىستانادى. ولارعا 318 پاتەر دايىنداپ قويدىق. سونىڭ 122-ءسى – ءۇش بولمەلى, 116-سى – ەكى بولمەلى, 80-ءى – ءبىر بولمەلى. ءار وتباسى مۇشەسىنە 88500 تەڭگەدەن قونىس اۋدارۋ جاردەماقشاسى قاراستىرىلعان. بۇعان قوسا, رەسپۋبليكالىق بيۋدجەت ەسەبىنەن ءبىر جىل كولەمىندە وبلىسىمىزداعى ءوندىرىستى شاھارعا قونىس اۋدارعان وتباسىلاردىڭ پاتەردى جالعا الۋ قۇنى مەن كوممۋنالدىق تولەمىن جاۋىپ تۇرامىز. بەس جىلدان كەيىن بۇل پاتەرلەردى جەكەشەلەندىرۋگە بولادى. بالالارعا بالاباقشا مەن مەكتەپتەردە دە بارلىق جاعدايلار جاسالادى. وقۋشىلار قوعامدىق كولىكتە تەگىن جۇرەدى» دەيدى پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قايرات نۇرماعامبەتوۆ.
2004 جىلى تورعاي وڭىرىنەن ەلورداعا كەلگەن سەمسەر تولەگەنوۆ وسىدان توعىز جىل بۇرىن وسىندا شاڭىراق قۇرىپ, ءۇش بالانىڭ اكەسى اتاندى. سودان بەرى پاتەردەن پاتەرگە كوشىپ ءجۇرىپ, قۇرىلىسشىدان باستاپ ءارتۇرلى جۇمىس ىستەدى. وسى ۋاقىتقا دەيىن پيك-تەردىڭ بىرىندە سانتەحنيك بولدى. «الاتىن جالاقىم 60 مىڭ تەڭگە ەدى, ول ەشتەڭەگە جەتپەيتىن. «نۇرلى ەرتىس» باعدارلاماسى تۋرالى ەستىپ, قۇجات تاپسىردىق. ءساتى ءتۇسىپ, وعان ىلىكتىك. باسقا قالادا بولسا دا, باسپاناعا يە بولعانىمىزعا وتباسىمىزبەن قۋانىشتىمىز» دەيدى ول.
قوستاناي وبلىسىنىڭ تۋماسى جاقسىلىق بىرماعامبەتوۆ 2008 جىلى ەلورداعا ارمان قۋىپ كەلدى. وسىندا وقىپ, ماماندىق الدى. باس قالادا قورعالجىننىڭ قىزىن كەزدەستىرىپ, ۇيلەندى. بۇل وتباسىندا دۇنيەگە ءۇش بالا كەلدى. «ەلەكترمەن دانەكەرلەۋشى رەتىندە 170 مىڭ تەڭگە جالاقى الدىم. بىراق پاتەراقىسى, تاماعىمىز, ءوزىمىزدىڭ, بالالاردىڭ كيىم-كەشەگى بار, بۇل جالاقىمەن كۇن كورۋ قيىن بولدى. ۇلكەن بالامىز ءتورت جاستا, كەنجەمىز – ەكىدە. جارىم بالالارمەن ۇيدە وتىرىپ, جۇمىس ىستەگەن جوق. اقىرى «نۇرلى ەرتىس» تۋرالى ەستىپ, كوشۋگە بەل بايلادىق. ارينە, ەلوردانى قيمايمىز, بىراق ءومىر بولعان سوڭ باسقا جەردى دە كورەيىك دەدىك. جاڭا قالاعا ۇيرەنەتىنىمىزگە سەنىمدىمىن» دەيدى جاقسىلىق.
ءۇش بالانىڭ اناسى دينارا اياعانوۆا ەرەيمەنتاۋ اۋدانىنان ەلورداعا قونىس اۋدارعانىنا ون سەگىز جىل بولىپتى. ومىرلىك قوساعى قۇرىلىسشى بولىپ ىستەيتىن انا «نۇرلى ەرتىس» باعدارلاماسى جايلى قۇربىسىنان ەستىگەن. سودان جولداسىنا ەكىباستۇزعا كوشۋدى ۇسىنعان. كۇيەۋى باسىندا بۇعان كۇمانمەن قاراعان. سوڭىندا جارىنىڭ ايتقانىنا كونىپ, بۇل وتباسى دا ءوندىرىستى قالاعا قونىس اۋدارۋعا شەشىم شىعاردى.