مۇقتاج جاندارعا كومەك

قازاقستان حالقى اسسامبلەياسى مەن «تاڭ» تاتار-باشقۇرت مادەني ورتا­لىعى قاسيەتتى قۇربان ايت مەرەكەسى قارساڭىندا الەۋمەتتىك جاعىنان از قامتىلعان وتباسىلارعا قولداۋ كورسەتۋ ماقساتىندا ارنايى اكتسيا وتكىزدى.

كۇللى ەل اۋماعىندا وتكىزىلىپ كەلە جاتقان «قايىرىمدىلىق كەرۋەنى» اياسىندا وتكەن شارا بارىسىندا استانا قالاسىنىڭ ءبىراز تۇرعىنىنا قۇربان ايت مەرەكەسىنە سويىلعان مال ەتى تاراتىلدى. «بۇل – ءبىر رەتتىك شارا ەمەس. بىرنەشە جىلدان بەرى وتكىزىلىپ كەلە جاتقان ءداستۇرىمىز. ءاربىر مەرەكە قارساڭىندا استانا قالاسىندا تۇراتىن ءبىراز وتباسىعا قايىرىمدىلىق شاراسىن وتكىزىپ, ازىق-تۇلىك, كيىم-كەشەك, قاجەتتى زات تۇرىندە كومەكتەسىپ كەلەمىز. بۇلاردىڭ ىشىندە جالعىزباستى جانە كوپبالالى انالار, زەينەتكەرلەر, ەڭبەك جانە سوعىس ارداگەرلەرى, سونداي-اق ءجۇرىپ-تۇرۋى قيىنداعان قارت كىسىلەر بار. وسى جولى دەمەۋشى ازاماتتاردىڭ كومەگىمەن 20 وتباسىنا قۇربان ايت مەرەكەسىنە وراي ەت تاراتىپ جاتىرمىز. سونىمەن قاتار, «نۇر وتان» پارتياسىنىڭ جاستار قاناتىنىڭ مۇشەلەرى قاريالاردىڭ ۇيىنە بارىپ, جاعدايلارىن ءبىلىپ, ۇيلەرىنە ءبىر رەتتىك تازالىق جۇرگىزىپ, اۋلالارىن رەتكە كەلتىرىپ جاتىر. زەينەت جاسىنا كەلگەن قاريالاردىڭ سۇراۋى بويىنشا دۇكەندەرگە بارىپ, قاجەتتى زاتتارى مەن ازىق-تۇلىگىن ساتىپ الۋىنا قولعابىس ەتىپ وتىرمىز» دەيدى «تاڭ» تاتار-باشقۇرت مادەني ورتالىعىنىڭ اتقارۋشى ديرەكتورى زەمفيرا نيزامۋتدينوۆا.

قايىرىمدىلىق دەمەكشى, ەلىمىزدە وزگەنىڭ جىلۋى مەن كومەگىنە مۇقتاج جاندار وتە كوپ. مۇنداي جانداردىڭ باسىم بولىگى – ءارتۇرلى سەبەپتەرمەن مۇگەدەك اتانىپ وتىرعاندار. ستاتيستيكالىق مالىمەتتەرگە سەنسەك, بۇگىنگى تاڭدا استانا قالاسىندا 19 مىڭعا جۋىق مۇگەدەك تىركەلگەن ەكەن. ونىڭ 9 مىڭعا جۋىعى – ايەلدەر. وكىنىشتىسى, بۇل ادامداردىڭ شامامەن ەكى مىڭى عانا ەڭبەككە جارامدى بولىپ وتىر. ياعني, تۇگەلى دەرلىك ايرىقشا قامقورلىق پەن الەۋمەتتىك كومەككە مۇقتاج دەگەن ءسوز.

مۇنداي ازاماتتار, ارينە, مەملەكەت تاراپىنان قولداۋسىز قالىپ وتىرعان جوق. قولدان كەلگەنشە كومەك جاسالىپ, تاعدىردىڭ جازۋىمەن مۇمكىندىگى شەكتەلىپ, مۇگەدەك اتانىپ وتىرعان ازاماتتارعا ءوز دەڭگەيىندە جاعداي جاسالىپ وتىر. قوعامدىق ۇيىمدار تاراپىنان دا قولداۋ كورسەتىلىپ, ارنايى قور قۇرىپ, مەرەكە كۇندەرى قارساڭىندا دەمەۋشىلەر تارتىپ, كومەككە مۇقتاج جاندارعا كومەك جاسالىپ وتىرعانىن ايتا كەتۋ كەرەك. ماسەلەن, قۇربان ايت مەيرامىنا وراي قمدب قايىرىمدىلىق قورىنىڭ ۇيىمداستىرۋىمەن دەمەۋشىلەردىڭ قاراجاتى ەسەبىنەن 130 وتباسىنا قايىرىمدىلىق كورسەتىلدى. شارا بارىسىندا 1300 كەلىدەي سيىر ەتى جەتكىزىلىپ, ءار وتباسىنا 10 كەلىدەن ۇلەستىرىلدى. ازىق-تۇلىك قورجىنى دا تاراتىلىپ, بالالارعا ويىنشىق, ءتاتتى-دامدىلەر بەرىلدى. مول داستارحان جايىلىپ, دۇعا وقىلدى. «باستى ماقسات – يگى ءىستى كورسەتۋ ارقىلى حالىقتى مۇقتاج ادامداردىڭ مۇڭىن بولىسۋگە شاقىرىپ, كومەك قولىن سوزۋعا ۇندەۋ» دەيدى قمدب قايىرىمدىلىق قورىنىڭ وكىلى دينا بورانباەۆا.

بۇركىت نۇراسىل