ايازى بەت قاريتىن استانادا قىستىڭ كوركى مۇز قالاشىعىمەن ەنەدى. جاقىندا شاھارداعى باس شىرشانى قورشاي ورنالاسقان مۇزدان سالىنعان ساراي سالتاناتتى تۇردە اشىلدى.
«حانشاتىردىڭ» ىرگەسىندەگى بۇل قالاشىق – مۇزدى عيماراتتاردىڭ العاشقىسى. قازىر مۇندا قىزىقتاپ كەلىپ جاتقان جۇرتتىڭ قاتارى كۇن ساناپ ارتۋدا.
مۇز قۇرسانعان قالاشىقتىڭ قاقپاسىنا وسىنداعى ەرتەگى الەمىنىڭ «ەلتاڭباسىنداي» بولىپ «ەحرو-2017» كورمەسى مەن «تاۋەلسىزدىكتىڭ 25 جىلدىعى» لوگوتيپتەرى قاشالىپتى. سونداي-اق, سمارتفونداردىڭ ءسانى مەن ءمانى بولعان الەۋمەتتىك جەلىلەردىڭ بەلگىلەرى دە وسى جەردە بەدەرلەنگەن.
تابالدىرىعىنان اتتاپ باسقاننان قيال الەمىنىڭ تاڭعاجايىپ كەيىپكەرلەرىنە تاپ بولاسىز. ءماز-مەيرام بولعان كىشكەنتايلاردىڭ نازارى الدىمەن وسى مۋلتفيلم باتىرلارىنا اۋادى. بۇل ماڭداعى باستى بەينە – جاڭا جىلدىڭ جارشىسىنداي بولعان الىپ قورازدىڭ مۇز ءمۇسىنى.
اۋەس كورىپ جۇگىرگەن جاس بالالاردىڭ ەرمەگى – سىرعاناقتار. قالاشىقتا ەڭ ءىرى ەكى سىرعاناق سارايى سالىنىپتى. وعان قوسا, مۇز ۇستىندە زىرعىعىسى كەلەتىندەر ءۇشىن كونكيلەردى جالعا بەرەتىن دۇڭگىرشەكتەر قۇرىلعان.
– مۇز قالاشىقتىڭ سالىنعانى جاقسى بولدى. ەندى ەكى قىزىمدى دەمالىس كۇندەرى وسىندا ءجيى اكەلىپ تۇرامىن. وزدەرى ويىن قىزىعىنا كىرىپ كەتكەندە جاۋراعاندارىن دا بىلمەيدى. تەك قانا سىرعاناۋ ءۇشىن عانا ەمەس, سەرۋەن قۇرىپ كەلگەندەر ءۇشىن وتباسىلىق دەمالىسقا تاپتىرمايتىن ورىن دەپ ويلايمىن. جاڭا جىلدىڭ قارساڭىندا نەشە ءتۇرلى مەرەكەلىك شارالار بولاتىنىنان قۇلاعدار بولدىق, – دەدى قالا تۇرعىنى سەرجان تاڭىربەردى.
شىنىندا دا بۇل جەردە مەرەكە كۇندەرى ەلوردالىقتار مەن مەيمانداردىڭ ۋاقىتىن كوڭىلدى وتكىزۋ ماقساتىندا ارنايى باعدارلامالار ازىرلەنبەك. «Astana Winter Fest» شاراسىنىڭ شەڭبەرىندە كونتسەرتتەر, ەستافەتالار جانە ءتۇرلى فلەشموبتار ۇيىمداستىرىلادى.
سونىمەن قاتار, تاعى ءۇش نەگىزگى مۇز قالاشىق اشىلادى. ولار قالالىق اكىمدىكتىڭ الدىنداعى الاڭدا, ەسىل وزەنىنىڭ جاعاسىندا جانە «ستۋدەنتتەر» پاركىندە ورنالاسادى. ال جالپى قالا بويىنشا ءىرىلى-ۇساقتى جەتى مۇز ساراي سالىنادى. ولار 11 سىرعاناقپەن جانە 37 شىرشامەن جابدىقتالادى.
اتالعان ساياباقتىڭ اۋماعىنداعى جانە ەسىل وزەنىنىڭ جاعالاۋىنداعى مۇز قالاشىقتارى جەلتوقسان ايىنىڭ 25-ىندە پايدالانۋعا بەرىلەدى.
– وسى جىلعا دەيىنگى تاجىريبە مۇز قالاشىقتارى قىسقى ۋاقىتتا بۇقارانىڭ ەڭ كوپ جينالاتىن ورنى ەكەنىن كورسەتتى. سوعان بايلانىستى اعىمداعى جىلى كەلۋشىلەر ءۇشىن دۋماندى باعدارلامالاردىڭ سانىن كوبەيتتىك. ونىڭ ىشىندە كونتسەرت, ءتۇرلى سپورت سايىستارى, مانەرلەپ سىرعاناۋدان شەبەرلىك ساباقتارى, فلەشموبتار, ءجارمەڭكەلەر, سپورتشىلاردىڭ ونەر كورسەتۋى – ءبارى بار. مۇنىڭ بارلىعى ەڭ الدىمەن سالاماتتى ءومىر سالتىن ناسيحاتتايدى, – دەيدى قالالىق مادەنيەت باسقارماسىنىڭ باسپاسوز حاتشىسى ميرا مولداحمەتوۆا.
ال جاڭا جىل تويلاناتىن ءتۇنى ساعات 21.00-دەن باستاپ 03.00-گە دەيىن «حانشاتىر» مەن قالالىق الاڭ ماڭايىندا ۇلكەن كونتسەرت وتپەك.
ورىنبەك وتەمۇرات
