قالالىق ءماسليحات ۇيىمداستىرعان «دەپۋتات كۇنى» شەڭبەرىندە استانا قالاسىنىڭ كوممۋنالدىق مۇلىك جانە مەملەكەتتىك ساتىپ الۋ باسقارماسى مەن تۇرعىن ءۇي باسقارماسى باسشىلارىنىڭ ەسەبى تىڭدالدى.
قۇرىلعانىنا ەكى جىل عانا بولعان «استانا قالاسىنىڭ كوممۋنالدىق مۇلىك جانە مەملەكەتتىك ساتىپ الۋ باسقارماسى» مەملەكەتتىك مەكەمەسى – كوممۋنالدىق مۇلىكتى يەلەنۋ, پايدالانۋ جانە باسقارۋ ۋاكىلەتتىگى بار, سونىمەن قاتار ەلورداداعى مەملەكەتتىك ساتىپ الۋدى بىرىڭعاي ۇيىمداستىرۋشى قىزمەتىن جۇزەگە اسىراتىن اتقارۋشى ورگان بولىپ تابىلادى.
باسقارما باسشىسىنىڭ ايتۋىنشا بۇگىنگى كۇندە 375 كوممۋنالدى مەنشىك تىركەلگەن. ونىڭ ىشىندە – 147 مەملەكەتتىك مەكەمەلەر, 155 مەملەكەتتىك كوممۋنالدى قازىنالىق كاسىپورىن, 38 مەملەكەتتىك كوممۋنالدى كاسىپورىن, 9 اكتسيونەرلىك قوعام جانە 26 جاۋاپكەرشىلىگى شەكتەۋلى سەرىكتەستىك بار. باسقارما باسشىسى ە.وتەباەۆ باسقارما الدىنداعى استانا قالاسىنىڭ كوممۋنالدىق مۇلكىن باسقارۋ, باس قالانىڭ كوممۋنالدىق مۇلكىن ءمۇلىكتىك جالداۋعا (جالعا بەرۋ), اكىم ايقىندايتىن بيۋدجەتتىك باعدارلامالار نەمەسە تاۋارلار, جۇمىستار, قىزمەتتەر بويىنشا ءبىرىڭعاي مەملەكەتتىك ساتىپ الۋدى ۇيىمداستىرۋ جانە وتكىزۋدى قامتاماسىز ەتۋ جانە اكىمدىك بويىنشا مەملەكەتتىك ساتىپ الۋدى ءجۇرگىزۋ راسىمىنە مونيتورينگ جۇرگىزۋ سياقتى قىزمەتتەردىڭ اتقارىلۋ بارىسىنان تولىق اقپارات بەردى.
باسپانا كەزەكپەن بەرىلەدى
استانالىقتارعا جايلى باسپانانىڭ قولجەتىمدىلىگى تۋرالى تاقىرىپقا بايانداما جاساعان تۇرعىن ءۇي باسقارماسى باسشىسى ر.احمەتوۆ جەكەلەگەن تىزىمدەر بويىنشا كوممۋنالدىق تۇرعىن ءۇي قورىنان تۇرعىن ۇيگە مۇقتاج ازاماتتار ەسەبىن سانامالاپ كورسەتتى. بۇلار ۇلى وتان سوعىسىنىڭ مۇگەدەكتەرى مەن قاتىسۋشىلارى, جەتiم بالالار, اتا-اناسىنىڭ قامقورلىعىنسىز قالعان بالالار, حالىقتىڭ الەۋمەتتiك جاعىنان وسال توپتارى (ۇلى وتان سوعىسىنىڭ مۇگەدەكتەرى مەن قاتىسۋشىلارىنا تەڭەستىرىلگەن ادامدار, 1 جانە 2 توپتاعى ءمۇگەدەكتەر) جانە قولدانىستاعى زاڭنامادا كورسەتىلگەن باسقا دا نىساندى توپتار وكىلدەرى.
سونىمەن بىرگە مەملەكەت ەسەبىنەن مەملەكەتتiك قىزمەتشiلەر, بيۋدجەتتiك ۇيىمداردىڭ قىزمەتكەرلەرi, اسكەري قىزمەتشiلەر, عارىشكەرلەرگە, عارىشكەرلىككە كانديداتتار, ارناۋلى مەملەكەتتىك ورگان قىزمەتكەرلەرىنە جانە مەملەكەتتiك سايلانبالى قىزمەت اتقاراتىن ادامدار دا تۇرعىن ءۇي الۋعا قۇقىعى بار. تۇرعىن ءۇيى اپاتتىق جاعدايدا دەپ تانىلعان ازاماتتار دا كەزەكككە تۇرا الادى.
بۇگىنگى تاڭدا كوممۋنالدىق تۇرعىن ءۇي قورىنان تۇرعىن ۇيگە مۇقتاجدىلار كەزەگى 42 000-نان ارتىق ادامدى قۇرايدى ەكەن. 2015 جىل ءۇشىن كەزەكتەگىلەردى تۇرعىن ۇيمەن قامتاماسىز ەتۋ ءۇشىن اكىمدىكپەن 373 پاتەر, اعىمداعى جىلدىڭ وتكەن ارالىعى ءۇشىن 93 پاتەر بەرىلگەن.
سونىمەن قاتار, وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا جىل سايىن «قازاقستاننىڭ تۇرعىن ءۇي قۇرىلىس جيناق بانكى» اق جەلىسى بويىنشا تۇرعىن ءۇي, «قازاقستاندىق يپوتەكالىق ۇيىم» يۇ» اق تۇرعىن ءۇيى, «سامۇرىق قازىنا» جىلجىمايتىن مۇلىك قورى» اق تۇرعىن ءۇي باعىتتارى بويىنشا كوممۋنالدىق تۇرعىن ءۇي قورىنان تۇرعىن ۇيگە مۇقتاجدىلار ەسەبىندە تۇرعان ازاماتتاردى تۇرعىن ۇيمەن قامتاماسىز ەتۋ جۇرگىزىلگەن.
اپاتتى ۇيلەر بۇزىلادى
وعان قوسا, باسقارما قىزمەتىنىڭ ماڭىزدى باعىتى – اپاتتى تۇرعىن ۇيلەردە تۇراتىن ازاماتتاردىڭ باسپانا ماسەلەسىن جاقسارتۋ بولىپ تابىلادى. وسى ماقساتتا استانا اكىمدىگىمەن اپاتتى تۇرعىن ۇيلەردى بۇزىپ الۋ بويىنشا پيلوتتى جوبا جاسالعان. اتالعان باعدارلاماعا سايكەس, تۇرعىندارعا جاڭا پاتەرلەر بەرۋ ەسكى باسپاناسىنداعى اۋدانىنا لايىقتاپ, «شارشىسىنا شارشى» تۇرىندە جۇزەگە اسىرىلاتىن بولادى.
2017 جىلدىڭ اياعىنا دەيىن نەگىزگى قۇرىلىستىق قۇرىلىمدارى مەن ينجەنەرلىك جەلىلەرى جوعارى دەڭگەيدە ەسكىرگەن, 1940-1970 جىلداردا سالىنعان 228 اپاتتى ءۇي قۇرىلىسىن (3 361 پاتەر) بۇزىپ, وندا تۇراتىن 3500 وتباسىن كوشىرۋ جوسپارلانعان. ءبۇگىنگى تاڭدا 117 اپاتتى ءۇيلەردىڭ تۇرعىندارى جاڭا جابدىقتالعان پاتەرلەرگە كوشىرىلگەن. تاعى دا جۇزدەن استام اپاتتى تۇرعىن ءۇيدىڭ تۇرعىندارىنا كەلەسى جىلدىڭ اياعىنا دەيىن جوسپارعا سايكەس كوشىرىلەتىنى تۋرالى حاباردار ەتىلگەن.
ايگۇل ۋايسوۆا
