ەل تاۋەلسىزدىگىنىڭ 25 جىلدىعى قارساڭىندا مەملەكەت مۇددەسى جولىندا ەڭبەك ەتىپ جۇرگەن ازاماتتاردى ماراپاتتاۋ شارالارى ءالى دە جالعاسىپ جاتىر. ەلوردا اكىمدىگىندە قازاقستان حالقى اسسامبلەياسىنىڭ بىرقاتار مۇشەلەرى «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەيتويلىق مەدالىمەن جانە قحا-نىڭ «بىرلىك» التىن مەدالىمەن ماراپاتتالدى.
قوعامداعى بەيبىتشىلىك پەن كەلىسىمنىڭ نىعايۋىنا ۇلەس قوسىپ جۇرگەن ەلورداداعى ەتنومادەني بىرلەستىكتەردىڭ جەتەكشىلەرىنە ماراپاتتى استانا قالاسى اكىمىنىڭ ورىنباسارى ەرمەك امانشاەۆ تابىس ەتتى. «قالامىز ەل تاۋەلسىزدىگىنىڭ 25 جىلدىق مەرەيتويىن ۇلكەن جەتىستىكتەرمەن قارسى الىپ وتىر. قانشاما شارۋالار اتقارىلىپ, تولايىم تابىستارعا قول جەتكىزدىك. قازاقستان حالقى اسسامبلەياسىنىڭ قۇرامىندا ءجۇرىپ, سىزدەر دە وسى جەتىستىككە ەلەۋلى ۇلەس قوستىڭىزدار. بىراق وسىمەن توقتالىپ قالۋعا بولمايدى. كەلەر جىلى ءبىزدى بۇدان دا بيىك, جاۋاپتى كەزەڭدەر كۇتىپ تۇر. سونىڭ ءبىرى ءارى بىرەگەيى – ەكسپو-2017 حالىقارالىق كورمەسى. سىزدەر دە كۇللى الەم نازارىن اۋدارىپ وتىرعان بۇل شارانىڭ ءوز دەڭگەيدە وتۋىنە ءبىر كىسىدەي اتسالىسادى دەپ سەنەمىن» دەپ اتاپ ءوتتى ەرمەك امانشاەۆ.
سالتاناتتى شارا بارىسىندا باس-اياعى 15 ادام ماراپاتقا يە بولدى. ولاردىڭ ۇشەۋىنە قازاقستاننىڭ قالىپتاسۋى مەن دامۋى جولىنداعى ەڭبەگى ءۇشىن قحا-نىڭ «بىرلىك» مەدالى تابىستالدى.
بۇركىت نۇراسىل
