ۇلتتىق مۋزەيدىڭ بەس جىلدىعىنا وراي «ۇلى دالا مۇراسى» اتتى مۋزەيلەر شەرۋى ءوتىپ, وعان كەلگەن قالا تۇرعىندارى مەن قوناقتار باس مۇراجايعا تەگىن كىرىپ, ءتۇرلى مادەني شارالاردى تاماشالادى.
كەشتىڭ اشىلۋىندا ۇلتتىق مۋزەي ديرەكتورىنىڭ ورىنباسارى الماز نۇرازحان كەلگەن ادامدارعا ريزاشىلىعىن ءبىلدىرىپ, ءوتىپ وتىرعان شارا تۋرالى قىسقاشا مالىمەت بەردى.
قازاق ۇلتتىق ونەر ۋنيۆەرسيتەتىنىڭ تاربيە ءىسى جونىندەگى پرورەكتورى قىمبات تىلەۋوۆا بۇل مۋزەيلەر شەرۋىن «جاستار جىلى» اياسىندا اتالعان وقۋ ورداسى ۇلتتىق مۋزەيمەن بىرلەسىپ وتكىزىپ وتىرعانىن جەتكىزدى.
مۋزەي شەرۋى بارىسىندا سۋرەتشى, گيپەررەاليست-ءمۇسىنشى, «100 جاڭا ەسىم» جوباسىنىڭ جەڭىمپازى ايدوس ەسماعامبەتوۆتىڭ گريمدەۋى ۇيىمداستىرىلدى. بەلگىلى اكتريسا مەرۋەرت وتەكەشوۆانىڭ جەتەكشىلىگىمەن «قايىرلى كەش» تەاترلاندىرىلعان قويىلىمى كورسەتىلدى. «ەجەلگى جانە ورتاعاسىرلار تاريحى» زالىندا «جاندانعان بازار: «اباي» كورىنىسى, قازاق ۇلتتىق ونەر ۋنيۆەرسيتەتىنىڭ تالانتتى بيشىلەرىنىڭ اسەم بال ءبيى, تسيرك ارتىستەرىنىڭ شوۋى جۇرگىزىلدى. «مىسىر ۇلتتىق مۋزەيدە» جانە «Quintessence» اتتى توپتىق كورمەلەرى اشىلىپ, سونىمەن قاتار ءار زالدا تەاترلاندىرىلعان كورىنىستەر, ەتنو-كوللەكتسيا بويىنشا دەفيلە, قازاقشا قول كۇرەس, «اسىعىڭ الشىسىنان ءتۇسسىن!» ۇلتتىق ويىندارى ءوتتى. سونىمەن بىرگە كەش بارىسىندا «Green products» جشس «G-life» اۋىزسۋى جانە «ناتيجە» فيرماسى ءسۇت تاعامدارىن ۇسىندى. 
