كوپبالالى وتباسىلارعا – جاردەماقى

ەلوردادا 2020 جىلى كوپبالالى وتباسىلارعا بەرىلەتىن جاڭا مەملەكەتتىك جاردەماقىعا قۇجات تاپسىرۋ باستالدى.2020 جىلدىڭ 1 قاڭتارىنان باستاپ بەرىلەتىن مەملەكەتتىك جاردەماقى 4 نەمەسە ودان دا كوپ كامەلەتكە تولماعان نەمەسە 23 جاسقا دەيىنگى كۇندىزگى بولىمدە وقيتىن بالالارى بار بارلىق كوپبالالى وتباسىلارعا تابىسىنا قاراماستان تولەنەدى. ونىڭ مولشەرى بالا سانىنا قاراي سارالانادى. ياعني 4 بالاسى بار وتباسىلارعا – 42496 تەڭگە, 5 بالاعا – 53127 تەڭگە, 6 بالاعا – 63757 تەڭگە, 7 جانە ودان دا كوپ بالالارعا 74388 تەڭگە تولەنەدى.
بۇگىندە ەلوردالىق حقو بولىمدەرىندە, «جانۇيا» وتباسىن قولداۋ ورتالىعىندا جانە قالانىڭ باسقا دا پۋنكتتەرىندە قۇجاتتاردى قابىلداۋ جۇرگىزىلۋدە. قۇجاتتاردى قابىلداۋ جەلتوقسان بويى جۇرگىزىلىپ, 2020 جىلدىڭ قاڭتارىندا قايتا جالعاساتىن بولادى. قازىرگى تاڭدا اۋدان اكىمدەرى ارقىلى وسى جىلدىڭ جەلتوقسان ايىندا كوپبالالى وتباسىلاردان وتىنىشتەر قابىلداۋ قاجەتتىلىگى تۋرالى تۇسىندىرمە جۇمىستارى ۇيىمداستىرىلدى. قۇجاتتاردى قابىلداۋ 3 جەلتوقساننان باستاپ بەيبىتشىلىك كوشەسى, 14 مەكەنجايى بويىنشا ورنالاسقان «جانۇيا» وتباسىن قولداۋ ورتالىعىندا جانە ەلوردا تۇرعىندارىنىڭ ىڭعايلىلىعى ءۇشىن نۇر-سۇلتان قالاسىنىڭ الماتى اۋدانى (تاۋەلسىزدىك داڭعىلى, 7), بايقوڭىر اۋدانى (برۋسيلوۆسكي كوشەسى, 17/3), ەسىل اۋدانى (قابانباي باتىر داڭعىلى, 33), سارىارقا اۋدانى (سارىارقا داڭعىلى, 13) بويىنشا اكىمدەرىنىڭ اپپاراتتارىندا ازاماتتاردى قابىلداۋ ءۇشىن بالاما قابىلداۋ ورتالىقتارى ارقىلى جۇرگىزىلىپ جاتىر.