مۋزىكا مەكتەبىنىڭ ماسەلەسى مازالايدى

جۋىردا «استانا اقشامى» گازەتىندە «وڭتايلاندىرعاننان نە ۇتامىز؟» اتتى ماقالا جاريالاندى. وسىعان بايلانىستى قولىما قالام الۋىما تۋرا كەلدى.

ءوزىم 52 جىل پەداگوگيكا سالاسىندا ءجۇرىپ سولاقاي سايا­ساتتىڭ سالدارىنان بالا­لار مۋزىكا مەكتەبى تۇگى­لى, قانشاما قازاق مەكتەپتەرىنىڭ جابىلعانىن كوردىم. 1973-1984 جىلدارى ارنايى جولدامامەن قايماعى بۇزىلما­عان تازا قازاق اۋىلدارى بار قورعالجىن اۋدانىندا دومبىرادان ءدارىس بەردىم. سول كەزەڭدەردە مۋزىكاعا وتە قابىلەتتى بالالار ساباقتىڭ ءبارى ورىس تىلىندە وتەتىندىكتەن, ءبىر-ەكى جىلدان كەيىن تاستاپ كەتۋگە ءماجبۇر بولاتىن. قىزمەت بارىسىندا مينسك, تاللين, كيەۆ قالالارىنا بارعانىمدا, اتالمىش ەلدەردىڭ بارىندە مۋزىكا مەكتەپتەرى ءوز انا تىلدەرىندە وقىتىلاتىنىن كوردىم. 1990 جىلداردىڭ باسىندا №4 جامبىل اتىنداعى مەكتەپكە ديرەكتوردىڭ ورىنباسارى قىزمەتىنە كەلدىم. سول كەزدەگى ءبىلىم ءمينيسترىنىڭ ورىنباسارى ءشامشا بەركىمباەۆامەن كەزدەسۋىمنىڭ ناتيجەسىندە تسەلينوگراد قالاسىندا 1991 جىلى ەڭ العاشقى قازاق ۇلتتىق مۋزىكا مەكتەبىن اشىپ, ديرەكتورى بولىپ تاعايىندالدىم. وكىنىشكە قاراي, سول جالعىز ۇلتتىق دەگەن ءسوز ءۇشىن ءبىر جىلدان كەيىن قالادان كەتۋگە ءماجبۇر بولدىم. اقمولاداعى العاشقى ۇلتتىق قازاق مۋزىكا مەكتەبىنىڭ ىرگەسىن قالاعان ازامات رەتىندە ونى جۇزەگە اسىرۋ ماعان جەڭىل تيمەدى. وسى جىلدارى كورمەگەن قيىندىعىم جوق. 1992 جىلى ۇلتتىق مۋزىكا مەكتەبىنە نەمەسە وزىمە زيانى تيمەس ءۇشىن ەركىمنەن تىس جۇمىستان كەتۋگە ماجبۇرلەدى. سودان بەرى بۇل مەكتەپ ۇجىمىنىڭ باسىنان ماسەلە ارىلعان ەمەس. قانشاما رەت كوشىپ-قونىپ ءجۇردى. بۇل مەكتەپتەن الدىمەن «ۇلتتىق» دەگەن, ودان كەيىن «قازاق» دەگەن سوزدەردى الىپ تاستادى. قازىر جاي عانا «№1 بالالار مۋزىكا مەكتەبى» دەپ اتالادى. وسى ەكى قاسيەتتى ءسوزدىڭ كىمنىڭ تاقياسىنا تار كەلگەنىن ءالى كۇنگە دەيىن تۇسىنە المادىم. قازىرگى ۋاقىتتا 1200 وقۋشى تازا انا تىلىندە وقيتىن مەكتەپ كەزىندە ءبىزدىڭ اتا-­انالارىمىزدىڭ ارمانى ەدى.
وسى وڭتايلاندىرۋدى ەستىگەننەن بەرى اتا-انالاردىڭ, ۇستازداردىڭ, زيالى قاۋىمنىڭ مازاسى كەتۋدە. اقىرى نە بولماق؟ قوسىمشا ءبىلىمدى وڭتايلاندىرۋ ماسەلەسىنە حالىق قالاۋلىلارى دا نازار اۋدارا باستاعانى قۋان­تادى. ءبىز ءۇشىن وڭدى شەشىم قابىلدانعانى ماڭىزدى.

وسپان سۇلەيمەنۇلى,
ۇستاز,
قر ءبىلىم بەرۋ ءىسىنىڭ
ۇزدىك قىزمەتكەرى