ەلوردادا العاشقى اشىلعان № 1 قازاق بالالار مۋزىكا مەكتەبىنە شيرەك عاسىر تولدى.
ەل تاۋەلسىزدىگىنىڭ مەرەيتويىمەن قاتار كەلگەن ونەر ورداسىنىڭ جەتكەن جەتىستىگى مەن تولايىم تابىستارى تۋرالى ءتۇن اسىرىپ سويلەۋگە بولادى.
وتكەن عاسىردىڭ سەكسەنىنشى جىلداردىڭ اياعىنا تامان توقىراۋدىڭ سامالى وڭىنان سوقتى. ۇزاق جىلدار بويى سىرەسىپ قالعان كەڭەستىك ساياساتتىڭ كوبەسى سوگىلدى. تاۋەلسىزدىكتىڭ اق تاڭى اتۋعا جاقىن قالعان شاق. ءدال وسىنداي الماعايىپ كەزەڭدە, دالىرەك ايتقاندا, 1991 جىلى 9 قىركۇيەكتە قالادا العاشقى قازاق مۋزىكا مەكتەبى اشىلدى. بۇل شاھاردىڭ قازاقى تۇرعىندارى ءۇشىن دە كوپتەن كۇتكەن قۋانىشتى جاڭالىق ەدى. ارينە, ونىڭ اشىلۋى دا وڭاي بولعان جوق. وعان سول كەزدەگى قر ءبىلىم ءمينيسترىنىڭ ورىنباسارى بولعان ءشامشا بەركىمباەۆا, اقمولا قالالىق اتقارۋ كوميتەتىنىڭ توراعاسى امانجول بولەكپاەۆ جانە جامبىل جاباەۆ اتىنداعى №4 مەكتەپ-گيمنازياسىنىڭ ديرەكتورى جاننا بايسەيىتوۆا سەكىلدى ۇلتجاندى جاناشىرلار قولداۋ كورسەتتى. كورنەكتى كومپوزيتور كەنجەبەك كۇمىسبەكوۆ اعامىز دا تۋعان ەلىندە مۋزىكالىق مەكتەپ اشىلسا دەپ ارمانداپتى.
ال, بارىنەن بۇرىن وسى جۇمىستىڭ باسى-قاسىندا ءجۇرىپ, ىستىق-سۋىعىن قاتار كورگەن, مۋزىكا مەكتەبىنىڭ العاشقى ديرەكتورى بولعان, بەلگىلى مۋزىكانت, سەگىز قىرلى, ءبىر سىرلى ازامات وسپان سۇلەيمەنوۆتىڭ ەڭبەگىن ەرەكشە اتاپ وتكەن ءجون. ويتكەنى, وسىنداي يگىلىكتى ءىس اسىل ازاماتتىڭ جەكە يدەياسىنان باستاۋ الىپ, اقىرى ۇلتتىق مۇراتقا اينالدى.
العاشىندا مەكتەپكە 50-گە جۋىق بالا قابىلدانادى. ولار حالىق اسپاپتارى مەن فورتەپيانو بولىمىندە وقيدى. باستاپقىدا قيىنشىلىقتار دا از كەزدەسپەدى. مۋزىكالىق اسپاپتار جەتىسپەدى. ماتەريالدىق بازا دا تولىق ەمەس. سوندا دا ونەر ۇجىمى العان ماقساتىنان تايعان جوق. 1992 جىلى مۋزىكا مەكتەبىنە ساۋلەش تولەگەنقىزى باسشىلىققا كەلەدى. جۇمىس ودان ءارى جاندانا تۇسەدى. ونەرلى ۇستازداردىڭ قاتارى تولىعادى. جاس جەتكىنشەكتەردىڭ مۋزىكالىق جانە ەستەتيكالىق دامۋى قالىپتاسا باستايدى. مازمۇندى كەشتەر ۇيىمداستىرىلادى. سول كەزدە قىزمەت اتقارعان و.سۇلەيمەنوۆ, ە.وماروۆا, ب.وماروۆ, م.نابيەۆ, ق.يمانوۆ, ت.كاميەۆ جانە ا.ءامىرجانوۆا سەكىلدى مۋزىكانت پەداگوگتاردىڭ ەڭبەگى ەش ۇمىتىلمايدى. ولار جوقتان بار جاساپ, بالالاردىڭ ونەرىن ورگە سۇيرەدى.
بايىرعى قالانىڭ ەلورداعا اينالۋى ونەر ۇجىمىنا تىڭ سەرپىن اكەلدى. 2000 جىلى استانا قالاسى اكىمدىگىنىڭ قولداۋىمەن مەكتەپكە جەكە عيمارات بەرىلدى. ول تولىقتاي كۇردەلى جوندەۋدەن ءوتتى. ۋاقىت تالابىنا ساي جاڭا ۇلگىدەگى تەحنيكالارمەن جابدىقتالدى. وقۋشىلار سانى دا كوبەيىپ, ءتۇرلى اسپاپ سىنىپتارى اشىلدى. 2008 جىلى استانا قالاسى اكىمىنىڭ قاۋلىسىمەن «№4 قازاق مۋزىكا مەكتەبى» «№1 بالالار مۋزىكا مەكتەبى» بولىپ وزگەرتىلدى. ونەر ۇجىمىندا ەلگە تانىلعان تالانتتى تۇلعالار قىزمەت اتقارادى. ايتالىق, قر مادەنيەت قايراتكەرى, بىرنەشە كىتاپتىڭ اۆتورى, بەلگىلى ونەرپاز شولپان قورعانبەكوۆا ساباق بەرەدى. تاياۋدا عانا ديرەكتوردىڭ وقۋ ءىسى جونىندەگى ورىنباسارى ءۇرلاي مىرزاقۇلوۆا «ۇزدىك مامان» بايقاۋىنىڭ جەڭىمپازى رەتىندە سارىارقا اۋدانى اكىمىنىڭ گرانتىن جەڭىپ الدى. ءبىر توپ مۇعالىم «شاكىرت جۇرەگىنە جول تاپقان ۇستاز» اتتى رەسپۋبليكالىق ەنتسيكلوپەدياعا ەندى.
ءبىز جوعارىدا, وسى مەكتەپتىڭ اشىلۋىن اڭساعان كورنەكتى كومپوزيتور, وسى جەردىڭ تۋماسى كەنجەبەك كۇمىسبەكوۆتىڭ ەسىمىن بەكەرگە اتاعان جوقپىز. ويتكەنى, مەكتەپ ۇجىمى جەتكىنشەكتەرگە ارنالعان ونەر ورداسىنا ارداقتى ازاماتتىڭ ەسىمى بەرىلسە دەپ تىلەك ايتادى. نەسى بار, ەل بولىپ قولدايتىن ۇسىنىس…
ازامات ەسەنجول
