بۇل قۇندى مۇرا بۇگىندە بولاتبەك ابىقاەۆ اعامىزدىڭ شاڭىراعىندا تۇر. ول كىسى مۇنى «بابامنان قالعان كوز» دەپ ساقتاپ كەلەدى. جادىگەردىڭ تاريحى دا وتكەن عاسىردان سىر تارتادى. تورعاي وڭىرىندە يماندىلىقتىڭ نۇرىن سەپكەن ناۋەن حازىرەت نۇرتازاۇلى دەگەن ادام ءومىر سۇرگەن.
بۇل كىسى تورعاي ۋەزىنىڭ العاشقى يمامى بولىپ, جۇرتتى قايىرىمدىلىققا, ىزگىلىككە شاقىرعان جان بولىپتى. حازىرەتتىڭ ونەگەلى ىستەرىن ەل ءالى كۇنگە دەيىن ۇمىتپاي ايتىپ جۇرەدى. جالپى, بۇل اۋلەتكە ءسوز بەن كيە قاتار دارىعان. وسى اۋلەتتەن شىققان ابىقاي نۇرتازاۇلى دەگەن ايتۋلى اقىن وتكەن. ونى تورعايداعى اقىندىق مەكتەپتىڭ باستاۋىندا تۇرعان ايتۋلى تۇلعالاردىڭ ءبىرى دەپ ايتۋعا بولادى. اقىننىڭ وتكەن عاسىردىڭ جيىرماسىنشى جىلدارداعى سۇراپىل اشتىق تۋرالى «تاس مەشىن» دەگەن پوەماسىن ادەبيەت بىلگىرلەرى جوعارى باعالاعان.
ال جادىگەر تۋرالى وسى تەكتىلەردىڭ تۇياعى بولاتبەك اعا بىزگە بىلاي دەدى.
«بۇل ءموردى ناۋەن حازىرەت اتام 1910-1913 جىلدارى قاجىلىق ساپارىندا باۋىرىنا سالعان جالعىز بالاسى احمەتحان ابىقايۇلىنا مەككە قالاسىنان ارنايى سوقتىرىپ اكەلىپتى. اتام سول قاجىلىق ساپارىندا ءۇش جىل ءجۇرىپ ەلگە ورالعان. سودان بەرى بۇل مۇرانى اۋلەتىمىزدىڭ كيەسىندەي ارداق تۇتىپ, كوزىمىزدىڭ قاراشىعىنداي ساقتاپ كەلەمىز» دەدى ول.
وسىنداعى ەسىمى ايتىلعان احمەتحان دەگەن اقساقال كەشەگى سەكسەنىنشى جىلدارعا دەيىن ءومىر ءسۇردى. ءوزى اقىن, ءوزى اڭگىمەشى, شەجىرەشى, مارقۇم سەيىت كەنجەاحمەتوۆ اعانى سوزىمەن ايتقاندا, «ءبىر ءوزى ءبىر تەاتر بولعان» ادام. قازاقستاننىڭ حالىق جازۋشىسى ءابىش كەكىلباەۆ «ۇركەر» رومانىن جازىپ جۇرگەندە تورعايعا بارىپ, احمەتحان قاريادان ءابىلحايىر حانعا قاتىستى ەل اۋزىندا ساقتالعان كوپ دەرەكتەردى جازىپ العان.
