كەشە قالا اكىمدىگىنىڭ «ناز» مەملەكەتتىك بي تەاترى ەلوردامىزدىڭ سارىارقا توسىنە قونىس اۋدارعانىنا 20 تولۋىنا ارناپ «تاۋەلسىزدىك تىرەگى – استانا» اتتى كونتسەرتتىك باعدارلاماسىن ۇسىندى.
اتالعان تەاتر – باس قالانىڭ مادەني ءومىرىنىڭ قالىپتاسۋىنا ەلەۋلى ۇلەس قوسىپ جۇرگەن ىرگەلى ۇجىم. ونەر ورداسىنىڭ اتى ەلىمىزگە عانا ەمەس, بىرقاتار شەت مەملەكەتتەرگە دە جاقسى تانىس. ونىڭ دالەلى, بيىلعى قازان ايىندا گروزنىي قالاسىندا وتكەن م.ەسامباەۆ اتىنداعى IX حالىقارالىق فەستيۆالگە قاتىسىپ, جۇلدەلى ورالىپ, باس شاھاردىڭ عانا ەمەس, قازاق ەلىنىڭ اتىن ايگىلەدى.
ءسوز اراسىندا ايتا كەتەيىك, «ناز» تەاترىندا قازاق بي ونەرىنىڭ بابادان قالعان ۇلگىلەرىن جاڭاشا تۇرلەنتىپ, ونى بۇگىنگى ۋاقىتپەن ءساتتى ۇيلەستىرە بىلگەن تالانتتى جاستار توپتاسقان. مەرەكەلىك كونتسەرت تە بيشىلەر توبى تالاي بايقاۋلاردا توپ جارعان «سامعاۋ», «تاۋ ۇلى», «اق جايىق» سەكىلدى قويىلىمداردى جۇرتشىلىققا كورسەتىپ, ولاردىڭ ريزاشىلىعىنا بولەندى. ونىڭ قويۋشى رەجيسسەرى, باس بالەتمەيستەر, قازاقستاننىڭ ەڭبەك سىڭىرگەن قايراتكەرى قاديشا اعىمباەۆا. سونداي-اق, شارا بارىسىندا بەلگىلى ەسترادا شەبەرلەرى دە تامىلجىتىپ ءان شىرقاپ, شارانىڭ ءسانىن كىرگىزدى.
ءبىر سوزبەن ايتقاندا, ارايلى استاناعا ارنالعان ادەمى ساز بەن اسەرلى بيگە تولى كەش جينالعانداردىڭ كوڭىلىنەن شىقتى.
ازامات ەسەنجول
