«مۋزارتتىڭ» ورىنداۋىنداعى وسى ءاندى ەستىمەگەن ادام كەمدە-كەم شىعار, ءسىرا. نازىك جاندىلارعا ارنالعان بۇل ءاننىڭ بەينەبايانى دا ەرەكشە. كوشە بويىن كەزىپ ءجۇرىپ, جولىندا كەزدەسكەن قىزدارعا گۇل شوعىن سىيلاعان جىگىت ەستەرىڭىزدە بولار. 8 ناۋرىز مەرەكەسىنە وراي «استانا اقشامى» گازەتى سول جىگىتتىڭ ءىزىن جالعادى.
ناۋرىزدا جاۋعان العاشقى جاڭبىر قىس قۇشاعىندا ۇزاق بولعان تابيعاتتى وياتىپ, كوكتەمدى شاقىرعانداي بولدى. قىپ-قىزىل گۇل شوقتارىن الىپ, فوتوتىلشىمەن «بايتەرەكتىڭ» بويىن جاعالاي باستادىق. كەنەت قارسى الدىمىزدان تال شىبىقتاي بۇرالعان قىزدىڭ سۇلباسى كورىندى. جاقىنداي كەلگەندە, گۇلدى ۇسىندىق. مۇنداي ارەكەتكە ريزا بولعان اسەل ەسىمدى سۇلۋ بويجەتكەندى «سىرت» ەتكىزىپ سۋرەتكە ءتۇسىرىپ الدىق. ويلاعانىمىز – كوشەدە قاباعى تۇنجىراعان, اسىعىپ جۇرگەن قىز-كەلىنشەكتەردىڭ كوڭىلىن ءبىر ءسات بولسىن اۋلاپ, مەرەكەلىك كوڭىل-كۇي سىيلاۋ.
«بايتەرەك» الاڭىنان شىعىپ, «كەرۋەنگە» بەتتەدىك. قول ۇستاسىپ كەلە جاتقان قىز بەن جىگىتتى بايقاپ قالدىق. «اقشامعا» وراتىلعان گۇل شوعىن جىگىتتىڭ قولىنا ۇستاتىپ جىبەرگەنىمىز سول ەدى, جىگىت گۇلدى قىزعا تابىستاپ ۇلگەردى. ءاپ-ادەمى كورىنىستى قاز-قالپىندا فوتواپپاراتتىڭ وبەكتيۆىنە ءتۇسىرىپ الدىق. كۇتپەگەن جەردەن قۇتتىقتاعاندا بويجەتكەننىڭ ءجۇزى قىزارىڭقىراپ قالدى. كۇلىمسىرەگەن بويى جاس جۇپپەن قوش ايتىستىق.
كەپتەلىستە تۇرعان تەمىر كولىكتەگى ارۋلاردى دا نازاردان تىس قالدىرماۋدى ءجون كوردىك. شىنايى قۋانىشىن جاسىرماعان بەيتانىس كەلىنشەك كوكتەمدى قارسى الۋعا دايىن بولىپ كورىندى بىزگە.
كۇنى-ءتۇنى جۇمىسى ءبىر تولاستاماعان اۆتوبۋس كوندۋكتورى دا قاربالاس تىرشىلىكتى ءبىر ساتكە ۇمىتىپ, قۋانسىن دەدىك. ايالداماعا تاقاعان اۆتوبۋستى تاعى ءبىراز كىدىرتىپ, اپايدى گۇلىمەن بىرگە سۋرەتكە تۇسىردىك.
مەيرامحاناعا كەلگەن قوناقتاردى ءاردايىم ادەمى كۇلكىسىمەن قارسى الاتىن قىزدارعا دا ءبىر ۋاقىت كۇتىم قاجەت, جىگىتتەر! سوندىقتان اكىمشىدەن رۇقسات سۇراپ, كاسسا الدىندا تۇرعان سۇلۋ قىزدىڭ فوتوسىن دا ەستەلىككە دەپ ءتۇسىرىپ الدىق.
8 ناۋرىزعا ارنايى 8 گۇل شوعىن كەزدەيسوق قىز-كەلىنشەكتەرگە تابىستاعاندا تۇيگەنىمىز, مەرەكەگە ەرەكشە رەڭك بەرۋ وپ-وڭاي. ال الۋان ءتۇرلى گۇلدەرمەن كومكەرىلگەن مەكەمەلەر مەن ساياباقتار كوكتەمنىڭ اۋىلى الىس ەمەس ەكەنىن بىلدىرەتىندەي.
گۇلدانا تالعاتقىزى
