قالانىڭ نوسەر كارىزدەرىن تەكسەرۋ كەزىندە كوللەكتورلار 60-تان 100 پايىزعا دەيىن قوقىسقا تولعانى انىقتالدى. سونىڭ سالدارىنان قاتتى جاڭبىر كەزىندە اعىن سۋلار قۇبىرلاردان وتپەي قالادى. وعان جەكە تۇرعىن ۇيلەردىڭ نوسەرلىك كارىز جۇيەسىنە زاڭسىز جالعانۋى سەبەپ.
– تەكسەرۋ بارىسىندا زاڭسىز جالعانعان فاكتىلەر ءجيى كەزدەسەتىنى انىقتالدى: جەكە تۇرعىن ۇيلەر, كەڭسەلەر جانە باسقا دا قۇرىلىس يەلەرى ءوز نىساندارىنىڭ كارىز جەلىلەرىن نوسەرسۋ جۇيەسىنە جالعاپ قويعان. اعىندى سۋلاردى, تۇرمىستىق قالدىقتاردى, قۇرىلىس قوقىستارىن, جۋىندى زاتتار مەن باسقا قوقىستاردى رۇقساتسىز توگۋ نوسەر كارىزى مەن تازارتۋ قوندىرعىلارىنىڭ جۇمىسىنا سالماق تۇسىرگەن. سوندىقتان سورعىلار ۇنەمى بىتەلىپ قالادى, – دەپ ءتۇسىندىردى «Elorda Eco System» كوممۋنالدىق كاسىپورنى ماماندارى.
بۇل ماسەلەنى شەشۋ ءۇشىن كوممۋنالدىق كاسىپورىن نوسەر كارىزىنىڭ بارلىق ءجۇيەسىن قوردالانعان قۇمنان, تۇنبادان جانە باسقا دا قوقىستاردان تازارتىپ, اۋقىمدى جۇمىستار جۇرگىزۋدە. قازىرگى ۋاقىتتا تازارتۋ جۇمىستارى قالانىڭ بارلىق اۋداندارىندا جاسالىپ جاتىر. بۇگىنگە دەيىن 150 توننادان استام قوقىس پەن بالشىق شىعارىلدى.
نوسەرلىك تازارتۋ قوندىرعىلارى جاڭبىر, ەرىگەن جانە جەراستى سۋلارىن بۇرۋعا ارنالعان. ولاردىڭ ارنايى سۇزگىلەرى وسى سۋلاردى تازارتىپ, وڭدەيدى, بىراق تۇرمىستىق قالدىقتاردى وتكىزە المايدى.
«وڭتۇستىك-شىعىس» تۇرعىن الابىنداعى ۇيلەر, «اگروقالاشىق», «كوكتال», «ارتەم» بازارى اۋدانى جانە باسقا دا جەكە سەكتورلار ءوز بەتىنشە نوسەر كارىزىنە قوسىمشا بايلام جالعاعان.
– «Elorda Eco System» قىزمەتكەرلەرى نۇر-سۇلتان قالاسى اكىمدىگىمەن جانە ەكولوگيالىق پوليتسيامەن بىرلەسىپ تۇراقتى تۇردە ونەركاسىپتىك, شارۋاشىلىق-تۇرمىستىق قالدىقتاردى قالالىق نوسەر كارىزىنە زاڭسىز توگۋ فاكتىلەرىن انىقتاۋ بويىنشا رەيدتەر جۇرگىزۋدە. بۇگىندە 762 جاڭبىر قۇدىعى تەكسەرىلدى. بۇل باعىتتاعى شارالار قالانىڭ بارلىق ءتورت اۋدانىندا جالعاسادى, – دەپ اتاپ ءوتتى كوممۋنالدىق كاسىپورىن وكىلدەرى.
رەيد بارىسىندا 40 زاڭ بۇزۋشىلىق دەرەگى انىقتالدى. «حان شاتىر» سوو اۋدانىندا جانە حۋسەين بەن تالال كوشەسىندە نوسەر كارىزى جەلىسىندە تازا ەمەس سۋدى اعىزۋدىڭ ەكى جاعدايى تىركەلدى. سونداي-اق ايىپپۇل سالىنعانداردىڭ ءبىرى ەكىنشى رەت زاڭ بۇزعانى بەلگىلى بولدى. اتالعان فاكتى بويىنشا تەكسەرۋ جۇرگىزىلۋدە.
بارلىق ءتارتىپ بۇزۋشىلار اكىمشىلىك جاۋاپكەرشىلىككە تارتىلىپ, جالپى سوماسى 222240 تەڭگە ايىپپۇل سالىندى. ەلوردانىڭ ءتورت تۇرعىنى ەسكەرتۋ الدى.
نوسەر كارىزىنە رۇقساتسىز بايلامدار جالعانۋ بويىنشا زاڭ بۇزۋشىلىق راستالعان كەزدە مەنشىك يەسىنە ەسكەرتۋ جىبەرىلەدى. بەلگىلەنگەن فاكتى جويىلماعان جاعدايدا, ەكولوگيالىق پوليتسيامەن بىرگە ايىپتالۋشىنى جاۋاپكەرشىلىككە تارتۋ بويىنشا زاڭدى شارالار قولدانىلادى. قۇقىق بۇزۋشىلارعا «اكىمشىلىك قۇقىق بۇزۋشىلىق تۋرالى» قر كودەكسىنە سايكەس 20 اەك (55560 تەڭگە) مولشەرىندە ايىپپۇل سالىنادى. زاڭدى تۇلعالار ءۇشىن جازا مولشەرى الدەقايدا جوعارى.
ايتا كەتەيىك, قالانىڭ نوسەرلىك كارىز جۇيەسىنە 26 مىڭ جاڭبىر قۇدىعى, 354 كم كوللەكتور جانە 56 كم ارىق كىرەدى.
