ەلوردادا سىيىمدىلىعى 1200-2000 وقۋشىنى قامتيتىن ءبىلىم نىساندارى سالىنادى. بۇل قالا مەكتەپتەرىنە تۇسەتىن سالماقتى ازايتۋعا مۇمكىندىك بەرەدى. ءوزىنىڭ Instagram پاراقشاسىندا وسىلاي دەپ جازعان نۇر-سۇلتان قالاسىنىڭ اكىمى التاي كولگىنوۆ ەلوردادا سالىنىپ جاتقان ءبىلىم نىساندارى تۋرالى مالىمەتتەردى جاريالادى.
«ت.رىسقۇلوۆ جانە №36, ە171 كوشەلەرىنىڭ قيىلىسىندا ورنالاسقان وقۋ ورنىنىڭ قۇرىلىسىن كورىپ قايتتىم. بۇل مەكتەپتى بيىل پايدالانۋعا بەرۋدى جوسپارلاپ وتىرمىز. وسى جىلى سالىناتىن مەكتەپ سانى – 12. 2021 جىلى تاعى وسىنشا ءبىلىم نىسانى سالىنادى.
مەكتەپ, بالاباقشا, تۇرعىن ءۇي جانە باسقا دا الەۋمەتتىك نىسانداردى سالعان كەزدە ديزاين-كود ەرەجەلەرىن ۇستانامىز. مەملەكەت باسشىسىنىڭ تاپسىرماسىنا سايكەس ستيليستيكالىق تۇرعىدا بىرىڭعاي, جايلى ءارى قاۋىپسىز قالانى قالىپتاستىراتىن ديزاين-كود بەكىتىلدى» دەپ جازدى ا.كولگىنوۆ.
