وسى كۇندەرى بەيبىتشىلىك جانە كەلىسىم سارايىنىڭ ساحناسىندا گيننەستىڭ رەكوردتار كىتابىنا ەنگەن الەمگە ايگىلى «notre dame de Paris» ميۋزيكلiنiڭ قازاق تiلiندەگi نۇسقاسى ءجۇرىپ جاتىر. پرەمەراسى اپتا باسىندا وتكەن بۇل تۋىندىنى كورەرمەندەر 24 جەلتوقسانعا دەيىن تاماشالاي الادى.
كلاسسيك جازۋشى ۆيكتور گيۋگونىڭ «پاريج عيباداتحاناسىنىڭ ءاز اناسى» شىعارماسىنىڭ نەگىزىندە قويىلعان, شىنايى عاشىقتىق پەن ساتقىندىق حيكاياسىنا قۇرىلعان ميۋزيكل وسىدان تۋرا 20 جىل بۇرىن فرانتسيا استاناسىندا العاش رەت ساحناعا جول تارتتى. سودان بەرى الەمنىڭ توعىز تىلىنە اۋدارىلىپ, قويىلعان. قازاق ءتىلى بۇل قاتارداعى ونىنشى ءتىل بولىپ وتىر. ال قازاقستان – وسى ميۋزيكلدى قويعان ورتا ازياداعى العاشقى مەملەكەت.
قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن «قازاقكونتسەرت» مەملەكەتتىك كونتسەرتتىك ۇيىمى جۇزەگە اسىرعان بۇل جوبا استانانىڭ 20 جىلدىعىنا ارنالىپ وتىر. قويىلىمعا اتالمىش ۇيىمعا قاراستى «استانا ميۋزيكل» تەاترى ارتىستەرىن, جەكە انشىلەردى, بيشىلەردى, اكروباتتاردى قوسقاندا جالپى 70 ادام تارتىلدى.
قويۋشى رەجيسسەرى – روبەرت ماريەن. تۇپنۇسقاسىنىڭ مۋزىكاسىن جازعان كومپوزيتور ريككاردو كوچچانتەنىڭ تۋىندىلارى قازاق تىلىندەگى نۇسقاسىندا تولىق ساقتالىپ قالدى. ايىرماشىلىعى «Belle», «Danse mon esmeralda», «Le Temps des Cathedrales» سەكىلدى 50-گە جۋىق ءان قازاق تىلىندە شىرقالادى. ليبرەتتونى قازاق تىلىنە اقىن سەرىكزات دۇيسەنعازى اۋداردى.
ءبىر ايتا كەتەرلىگى, ميۋزيكلدىڭ باي دەكوراتسياسى وتە تارتىمدى جاسالدى. ونەرپازدار دا بار ونەرلەرىن سالعانى بايقالدى. ال كەيىپكەرلەردى سومدايتىن ارتىستەر ادەتتەگىدەي ەكى قۇرامدا جاساقتالدى. اتاپ ايتساق, ەسمەرالدا – جارقىناي شالقاروۆا مەن روزا مۇقاتاەۆا, كۆازيمودو – قايرات سارىباەۆ پەن ءادىل سۇلتان, فروللو – ەربول ناريمانۇلى مەن ايدار اقىپباەۆ, گرەنگۋار – ارمات اماندىقوۆ پەن ورازالى يگىلىك, فلەر دە ليس – تاڭشولپان نۇرتىلەۋقىزى مەن زارينا جاكەنوۆا, فەبيۋس – ديدار ابدۋحالىقوۆ پەن نۇرپەيىس ابدۋراەۆ جانە كلوپەن – راسۋل ۋسمانوۆ پەن ۇلان قابىل.
ليبرەتتونى اۋدارعان سەرىكزات دۇيسەنعازىنىڭ ايتۋىنشا, ول ءماتىندى قازاق مەنتاليتەتىنە ساي ەتىپ اۋدارعان. ماسەلەن, تىكەلەي اۋداراتىن بولسا, قۇداي انا بولىپ كەتەتىن ءسوزدى ۇلتىمىزدىڭ تانىم-تۇسىنىگىنە جاقىنداتىپ, ءاز انا ەتىپ العان.
الايدا ميۋزيكلدى ۇستاپ تۇراتىن ءماتىن دەسەك, شىعارماداعى قازاق تىلىندە شىرقالعان اندەردىڭ بىزگە اسەرى بولمادى. وسىدان بىرنەشە جىل بۇرىن بەلگىلى اقىن يسرايل ساپارباي ورىس تىلىندە شىرقالىپ جۇرگەن «Belle» ءانىن «ەسمەرالدا» ەتىپ قازاقشالادى. ونى «دەنار» توبى شىرقادى دا. سەرىكزات اۋدارعان وسى انگە قاراعاندا يسرايلدىڭ «ەسمەرالداسى» اسەرلىرەك بولىپ كورىندى. بالكىم, كەيىنگى ءاندى سول قالپى الا سالۋ كەرەك پە ەدى دەگەن وي كەلدى.
تۇيىندەپ ايتقاندا, وسى كۇنگە دەيىن «Notre dame de Paris» ميۋزيكلىن الەمدەگى 11 ميلليون حالىق تاماشالاسا, ولاردىڭ قاتارىنا قوسىلعان قازاق كورەرمەندەرى دە وكىنبەيدى دەپ ويلايمىز.
