استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعى ءارتۇرلى فورماداعى ەپيلەپسيا, حروموسومالىق اۋرۋلار, اۋتيزم, وليگوفرەنيا, سويلەۋدىڭ اۋىر بۇزىلۋلارىمەن جانە پسيحيكالىق بۇزىلىستارمەن ۇيلەسكەن تسەرەبرالدى سال اۋرۋى بار, پسيحيكالىق دامۋى تەجەلگەن بالالارعا ستاتسيونارلىق جانە جارتىلاي ستاتسيوناردا ارنايى الەۋمەتتىك قىزمەت كورسەتۋگە ارنالعان. ورتالىق 1981 جىلى ستاتسيونارلىق جانە جارتىلاي ستاتسيونارلىق 3 جاستان 18 جاسقا دەيىنگى «اقىل-ەسى كەم بالالارعا ارنالعان بالالار ءۇيى» بولىپ اشىلعان ەدى.
«مەكەمە جۇمىسىنىڭ باستى ماقساتى – بالانىڭ قوعامعا بەيىمدەلۋىنە, الەۋمەتتەنۋىنە, پوتەنتسيالدى دامۋىنا قولايلى, جان-جاقتى جاعداي جاساۋ. وڭالتۋ جانە دەنە ءبىتىمىنىڭ كەمشىلىگىن ەمدەۋ, قالپىنا كەلتىرۋ, تۇزەتۋ ارقىلى ەرەكشە بالالار قوعامعا بەلسەنە ارالاسا الادى. ول ءۇشىن بارىنشا مۇمكىندىك جاسالعان. مۇنداعى سەنسورلىق بولمەلەر, مونتەسسوري بولمەلەرى, تىگىن, اعاش ۇستاسى, سلەسارلىق شەبەرحانالار, لەكوتەكا, سبو بولمەلەرى, كومپيۋتەرلىك سىنىپتار, ويىن لابيرينتتەر جيىنتىعى, لفك كابينەتتەرى, فيزيوتەراپيا مەن گالوتەراپيا كابينەتى (تۇز شاحتاسى) قازىرگى تەحنيكالىق جابدىقتارمەن جابدىقتالعان. مەكەمە اۋماعىنداعى زاماناۋي اشىق سپورت الاڭدارى, ۆاندالعا قارسى ويىن كەشەندەرى, فۋتبول الاڭى, باسكەتبول جانە ۆولەيبول الاڭدارى بالالاردىڭ يگىلىگىندە» دەيدى «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ ديرەكتورى نۇربول زۇلقارناەۆ.
ءۇش كورپۋستان تۇراتىن ورتالىقتىڭ ءبىرى ەلوردانىڭ ماناس كوشەسى, 19 مەكەنجايىندا ورنالاسقان. №1 عيماراتتا تۇراقتى تۇراتىن ستاتسيونارلىق ءبولىمنىڭ تاربيەلەنۋشىلەرى ورنالاسقان. قازىرگى ۋاقىتتا وندا 116 تاربيەلەنۋشى بار. ءى.جانسۇگىروۆ, 12/5 مەكەنجايىندا ورنالاسقان ەكى قاباتتى №2 عيمارات كۇندىز كەلىپ-كەتەتىن 18 جاسقا دەيىنگى بالالارعا ارنالىپ 2016 جىلى اشىلدى. 2018 جىلى جاستار مەن جاسوسپىرىمدەرگە ارنالعان №3 عيمارات اشىلدى, مۇندا كاسىپكە دەيىنگى ەڭبەككە دايىندىققا باۋليدى. مەكەمە تاربيەلەنۋشىلەرى جاسىنا, جىنىسىنا جانە سىرقات دەڭگەيىنە سايكەس توپتارعا بولىنگەن. توپتاردىڭ نورماعا سايكەس جيناقتالۋى مەملەكەتتىك ستاندارت تالاپتارىنا سايكەس. بۇل مەكەمەدە ارنايى 8 الەۋمەتتىك قىزمەت كورسەتىلەدى. ونىڭ ءبىرى – الەۋمەتتىك-تۇرمىستىق قىزمەت. تاربيەلەنۋشىلەردىڭ تاماقتانۋ ساپاسىنا كۇندەلىكتى باقىلاۋ جۇرگىزىلەدى. تاماقتانۋ ساپاسى بويىنشا ءانونيمدى ساۋالناما جۇرگىزىلەدى, ونىڭ ناتيجەسى بويىنشا ەسكەرتۋلەر مەن ۇسىنىستار باسشىعا جەتكىزىلەدى. قىزمەت الۋشىلارعا تۇرمىستىق قىزمەت كورسەتۋدى قامتاماسىز ەتۋگە كۇندەلىكتى باقىلاۋ جۇرگىزىلەدى, اتاپ ايتقاندا, كىردى اۋىستىرۋ, ونىڭ جيىلىگى, جۋ, ۇتىكتەۋ جانە ت. ب. مەديتسينالىق قىزمەت اياسىندا مەكەمەدەگى بالالارعا جان-جاقتى كومەك كورسەتىلەدى. ەمدەۋ, زەرتحانا-دياگنوستيكا زەرتتەۋى, ساۋىقتىرۋ جانە وڭالتۋ ارقىلى بالالاردىڭ دەنساۋلىق جاعدايىن ۇنەمى تەكسەرىپ, جىلىنا ەكى رەت كاسىبي باقىلاۋدان وتكىزەدى. مەديتسينالىق قىزمەتتەن باسقا, پەداگوگيكالىق تۇرعىدان كوپ جۇمىس ىسكە اسادى. نەگىزگى باعىتى – بالالاردىڭ بويىنداعى باستاپقى جانە قايتالاما اۋىتقۋشىلىقتى تۇزەتۋ, وڭالتۋعا جانە الەۋمەتتىك ەڭبەككە بەيىمدەۋگە باعىتتالعان ەمدەۋ-قالپىنا كەلتىرۋ, تۇزەتۋ-پەداگوگيكالىق جۇمىستى ۇيىمداستىرۋ. مەكەمەدە بالالاردىڭ ەڭبەك داعدىسىن قالىپتاستىرۋ بويىنشا جۇمىس جۇرگىزىلەدى. تىگىن, اعاش شەبەرحانالارىندا بالالار قاراپايىم ەڭبەك ەتىپ, ۇجىمدا جۇمىس ىستەۋگە ماشىقتانىپ, ءوز ەڭبەگىنىڭ ناتيجەسىن كورۋگە ۇيرەنەدى. بۇل بالالاردى ەڭبەككە باۋلۋ قىزمەتى بويىنشا جۇزەگە اسادى. ورتالىقتا اي سايىن مادەني-بۇقارالىق جانە انيماتسيالىق باعدارلامالار بويىنشا ءىس-شارالار ءوتىپ تۇرادى. سونىمەن قاتار كوشپەلى ءىس-شارالار ۇيىمداستىرىلۋدا. تاربيەلەنۋشىلەر «بارىس» كومانداسىنىڭ حوككەي ويىندارىنا, ساۋدا, ويىن-ساۋىق ورتالىقتارىنا, مۇراجايلارعا, كينوتەاترلارعا, بوۋلينگ ورتالىعىنا, مۇز سارايىنا جانە ت. ب.
ورىندارعا ءجيى بارادى. الەۋمەتتىك-ەكونوميكالىق قىزمەت اياسىندا مۇگەدەك بالالارعا ءتيىستى جەڭىلدىك, جاردەماقى, وتەماقى جانە باسقا دا تولەمدەردى الۋعا مەكەمەنىڭ بىلىكتى ەكونوميستەرى جاردەمدەسەدى. الەۋمەتتىك-قۇقىقتىق قىزمەت نەگىزىندە 2024 جىلعى جاعداي بويىنشا ستاتسيونارلىق بولىمشەدە 116 تاربيەلەنۋشى بار, ونىڭ ىشىندە 58 تاربيەلەنۋشى – اتا-اناسىنىڭ قامقورلىعىنسىز قالعاندار (اتا-انا بولۋ قۇقىعىنان ايىرىلعاندىقتان), جەتىمدەر, باس تارتقاندار (اتا-اناسىن ىزدەۋ ءجۇرىپ جاتىر, استانا قالاسىنىڭ ءىىد-نە سۇراۋ جىبەرىلدى). مەكەمەنىڭ نەگىزگى ماقساتى – ولاردى وتباسىنا قايتارۋ ارقىلى ستاتسيونارلىق بولىمدەگى بالالاردىڭ سانىن ازايتۋ. اتا-اناسىنىڭ قامقورلىعىنسىز قالعان بالالار اراسىنان تاربيەلەنۋشىلەردىڭ اتا-اناسىن ىزدەۋ جۇرگىزىلۋدە.
جەتىستىكتەر جايىندا ايتاتىن بولساق, سوڭعى 10 جىلدا ستاتسيونارداعى بالالار سانى 160-تان 120-عا دەيىن ازايدى, بۇل كۇندىزگى كەلىپ-كەتىپ جۇرگەن بالالاردىڭ سانىن 2006 جىلى 25 بالادان 2018 جىلى 110 بالاعا دەيىن ارتتىردى. 2016 جىلى №2 عيمارات (18 جاسقا دەيىنگى كۇندىزگى ءبولىم), 2018 جىلى №3 عيمارات اشىلدى (ۇلدار مەن جاستارعا ارنالعان كۇندىزگى ءبولىم). ناتيجەسىندە اتا-انالاردىڭ ناۋقاس بالالاردان باس تارتۋى ازايىپ, بالالار وتباسىندا قالدى, ال اتا-انالار جۇمىس ىستەۋگە مۇمكىندىك الدى. وقۋشىلار قالالىق, رەسپۋبليكالىق جانە حالىقارالىق ءىس-شارالارعا بەلسەندى قاتىسادى. ول – Speسial Olimpic, «جۇلدىزاي» جانە ت. ب. سوڭعى 10 جىلدا Speسial Olimpic باعىتىندا ءارتۇرلى وليمپيادالىق سپورت تۇرلەرىنەن 115 التىن, 90 كۇمىس جانە 95 قولا مەدال جەڭىپ الدى.
وڭالتۋدىڭ زاماناۋي ادىستەرى ەڭ الدىمەن پاتسيەنتتىڭ جەكە باسىنا, جوعالعان داعدىلاردى دامىتۋعا باعىتتالعان. ەگەر ناۋقاستىڭ قابىلەتسىزدىگى ونىڭ سىرتقى كومەكسىز جۇمىس ىستەۋىنە مۇمكىندىك بەرمەسە, وندا وعان مەملەكەت پەن قوعام قامقورلىق جاسايدى. مۇنداي كەشەندى شارالار مەديتسينالىق كومەكتىڭ ساپاسىن, الەۋمەتتىك قىزمەت ەتۋ دەڭگەيىن ارتتىرۋعا, ءومىر ءسۇرۋ ساپاسىن جاقسارتىپ, مۇگەدەك بالا تاربيەلەپ وتىرعان وتباسىنىڭ اۋىرتپالىعىن ازايتۋعا سەپ بولادى.
