بىرەۋلەر ءۇشىن ارمان بولىپ جۇرگەن ءۇيدىڭ جاعدايى سىن كوتەرمەيدى. استانانىڭ قاق ورتاسىندا, مينيسترلىكتەر ءۇيى مەن اقورداعا تاياق تاستام جەردە تۇرعان ەليتالىق «نۇرسايا-2» تۇرعىن ۇيىنە كۇتىم جاسالماعالى كوپ بولعانى انىق.
«نۇرجول» جەلەكجولىنىڭ بويىنا سالىنعان تۇرعىن ءۇي كەشەنىندە ەلىمىزدىڭ زيالى قاۋىم وكىلدەرى, پارلامەنت دەپۋتاتتارى جانە باسقا دا تانىمال تۇلعالار تۇرادى.
اسفالت توسەمەلەرىنىڭ توزىعى جەتىپ, بالالار ويىن الاڭىنىڭ اپاتتى كۇيدە تۇرعانىنا دا ءبىراز ۋاقىت بولىپ قالدى. سونىڭ سالدارىنان بۇلدىرشىندەردىڭ اسفالت ۇستىندە امالسىز دوپ تەۋىپ جۇرگەنىن سان مارتە كورگەن ەدىك. كەشەننىڭ ەسكىرىپ, وعان جوندەۋ جۇمىستارىنىڭ ءتيىستى دەڭگەيدە جۇرگىزىلمەۋىنىڭ سەبەبىن ىزدەپ, «نۇرسايا-2» پيك ماماندارىنا جۇگىنگەن ەدىك, مىناداي جاۋاپ الدىق:
«بۇل كەشەننىڭ قۇرىلىسى و باستا ۋ-شۋمەن ارەڭ بىتكەن. سول تۇستاعى قۇرىلىستى باستاعان تۇلعالار جۇمىسىن سوڭىنا دەيىن ءبىتىرە الماي, ءىستى بولعان ەدى.
كەيىنىرەك ونى ارزان ماتەريالدارمەن سالىپ, ارەڭ دەگەندە اياقتاعان. سول ارادا استىڭعى قاباتتاعى كولىك تۇراعى دا, تيىسىنشە ونىڭ ۇستىڭگى بولىگى دە جەكەمەنشىككە ءوتىپ كەتىپتى. زاڭ بويىنشا ءبىز عيمارات پەن ودان بەس مەتردىڭ تازالىعى مەن قالىپتى جاعدايىنا جاۋاپتىمىز. ال قالعانى ءبىزدىڭ موينىمىزدا ەمەس.
دەگەنمەن اۋلاداعى جۇرگىزىلىپ جاتقان جوندەۋ جۇمىستارى ءبىزدىڭ باستامامىزبەن قولعا الىندى. جەكەمەنشىك يەلەرى قوزعالماعان سوڭ, ءوزىمىز باستاپ وتىرمىز. بۇل – بيىلعى جوسپارىمىز. كەلەر جىلى وزگە تۇستارىن جوندەيمىز» دەيدى پيك قىزمەتكەرى باعلان بايسۇلتانوۆ.
ەسىل اۋدانىنىڭ اكىمدىگى رەسمي جاۋاپ بەردى
بۇل جاعدايعا بايلانىستى نۇر-سۇلتان قالاسى ەسىل اۋداندىق اكىمشىلىگىنە حابارلاسىپ, تۇسىنىكتەمە بەرۋىن سۇرادىق. ارادا كوپ وتپەي, ەلوردا ينفو جاريالاعان ماتەريالدان كەيىن ەسىل اۋدانىنىڭ اكىمدىگى رەداكتسيامىزعا رەسمي جاۋاپ بەردى.
ەسىل اۋدانى اكىمدىگىنىڭ مالىمدەۋىنشە, قر «تۇرعىن ءۇي قاتىناستارى تۋرالى» زاڭىنىڭ 2-بابىنا سايكەس, جەكەمەنشىكتەگى ءۇي-جايلاردان باسقا, كوندومينيۋم نىسانىنىڭ بولىكتەرى (كىرەبەرىستەر, باسپالداقتار, ليفتتەر, شاتىرلار, جەرتولەلەر, پاتەردەن تىس نە ۇيگە ورتاق ينجەنەرلىك جۇيەلەر مەن جابدىقتار, ابونەنتتىك پوشتا جاشىكتەرى مەن ورتاق پايدالانىلاتىن باسقا دا مۇلىكتەردى قوسا العاندا, جەر ۋچاسكەسى) ورتاق مۇلىك بولىپ سانالادى.
سونىمەن قاتار, قالالىق ءماسليحاتتىڭ 2017 جىلعى 20 شىلدەدەگى №166/21-VI «استانا قالاسىنىڭ اۋماعىن اباتتاندىرۋ قاعيدالارى تۋرالى» شەشىمىنە سايكەس اقىلى اۆتوتۇراقتاردىڭ, گاراجداردىڭ, جابىق پاركينگتەردىڭ اۋماعىن, سونداي-اق وسى پاركينگتەردىڭ شاتىرلارىن تازالاۋدى وسى نىسانداردى پايدالاناتىن مەنشىك يەلەرى مەن ۇيىمدار قامتاماسىز ەتەدى.
بۇدان بولەك, پاركينگ جانە پاركينگ شاتىرى ەلوردا اكىمدىگىنىڭ 2018 جىلعى 19 قىركۇيەكتەگى №501-1613 قاۋلىسىمەن قالانىڭ كوممۋنالدىق مەنشىگىنە بەرىلدى. ياعني قازىر نۇر-سۇلتان قالاسى كولىك جانە جول-كولىك ينفراقۇرىلىمىن دامىتۋ باسقارماسىنىڭ يەلىگىندە.
«استانا LRT» قازىرگى ۋاقىتتا «نۇر-سۇلتان قالاسىنىڭ اكتيۆتەر جانە مەملەكەتتىك ساتىپ الۋ باسقارماسى» مم اتىنا پاركينگتى سەنىمگەرلىك باسقارۋعا بەرۋ تۋرالى ءوتىنىش جولداپتى. كەلىسىمشارتقا قول قويىلعاننان كەيىن پاركينگتىڭ شاتىرىن, سونداي-اق باسپالداق الاڭىن قالپىنا كەلتىرۋ جۇمىستارى جوسپارلانۋدا. بولجام بويىنشا وسى جىلدىڭ ءتورتىنشى توقسانىندا جۇمىستار باستالادى.
جوندەۋ جۇمىستارىنا اقشا جينالمايدى
اكىمدىكتىڭ مالىمەتى بويىنشا «نۇرسايا» كەشەنىنىڭ باسقارۋ ورگانى بولىپ ەسەپتەلەتىن «نۇربەكەت» جشس وسى جىلدىڭ ناۋرىز ايىنان باستاپ ءوز قاراجاتىنا جوندەۋ جۇمىستارىن جۇرگىزبەك. ياعني جوندەۋ جۇمىستارى ءۇشىن تۇرعىنداردان اقشا جينالمايدى. قازىرگى ۋاقىتتا قىلقان جاپىراقتى اعاشتاردىڭ كوشەتتەرىن وتىرعىزۋ (بيىكتىگى 3 م بولاتىن 42 شىرشا, بيىكتىگى 1 م بولاتىن 200 شىرشا), گازوندار, گۇلزارلار ورناتۋ, جاپقىشتاردى (بورتتىق تاستاردى) اۋىستىرۋ جۇمىستارى جۇرگىزىلىپ جاتىر (فوتودا كورسەتىلگەن).
پاندۋستىڭ سىنعان كافەلدەرى «نۇربەكەت» جشس ەسەبىنەن قالپىنا كەلتىرىلەدى. سونىمەن قاتار, اكىمدىك ماماندارى «استانا قالالىق جارىق» جشس مەردىگەرلىك ۇيىمىمەن بىرلەسىپ شامداردى قالپىنا كەلتىردى (فوتو قوسا بەرىلىپ وتىر). اۋلا جارىعىنىڭ وزگە تۇستارىن قالپىنا كەلتىرۋ مەرزىمى 10 تامىزعا دەيىن اياقتالادى دەپ ۋادە ەتىلدى. ال فۋتبول الاڭىنىڭ قۇرىلىسى 2020 جىلعا ارنالعان اباتتاندىرۋ جوسپارىنا ەنگىزىلەتىن بولادى.
«ورتاق مەنشىك رەتىندە ءۇي جانىنداعى, اۋلالىق جانە ىرگەلەس اۋماقتارعا قىزمەت كورسەتۋ قولدانىستاعى زاڭنامادا بەلگىلەنگەن دەڭگەيدە كوندومينيۋمعا قاتىسۋشىلاردىڭ ەسەبىنەن جۇرگىزىلەدى. ەلوردا ءماسليحاتىنىڭ 2017 جىلعى 20 شىلدەدەگى №166/21-VI «استانا قالاسىنىڭ اۋماعىن اباتتاندىرۋ قاعيدالارى تۋرالى» شەشىمىنە سايكەس, ءۇيدى بەس مەتر راديۋستا تازالاپ, كۇتىپ ۇستاۋ تۇرعىنداردىڭ ءوز بەتىنشە نەمەسە ۇيىمدارمەن شارت بويىنشا جۇرگىزىلەدى. دەمەك, جەرگىلىكتى وتپەلى جولدارعا, سونداي-اق كوندومينيۋم نىسانىنىڭ اۋماعىنا جاتپايتىن تۇستارعا, ياعني جەكەمەنشىك يەلەرىنە ءتيىستى ورىندارعا جەرگىلىكتى اتقارۋشى ورگاندار قىزمەت كورسەتەدى» دەپ اتاپ ءوتتى اكىمدىك.
قازىرگى ۋاقىتتا پاندۋس ۇستىندە «نۇربەكەت» جشس جوندەۋ جۇمىستارىن جۇرگىزىپ جاتىر. وسىعان بايلانىستى اۋلادا قۇم, كىرپىش سەكىلدى قۇرىلىس ماتەريالدارى جاتقانىن بايقاۋعا بولادى. ءوز كەزەگىندە ەسىل اۋدانىنىڭ اكىمدىگى وسى ىسكە تۇسىنىستىكپەن قاراۋعا شاقىرادى.
