نۇرسۇلتان نازارباەۆ قىتاي حالىق رەسپۋبليكاسىنىڭ توراعاسى سي تسزينپينمەن كەزدەستى

كەلىسسوز بارىسىندا ەكىجاقتى ىنتىماقتاستىقتىڭ, ونىڭ ىشىندە ساۋدا-ەكونوميكا, ينۆەستيتسيا, كولىك-ترانزيت, وتىن-ەنەرگەتيكا, سونداي-اق مادەني-گۋمانيتارلىق سالالارداعى ءوزارا ءىس-قيمىلدى نىعايتۋ پەرسپەكتيۆالارىنىڭ كەڭ اۋقىمدى ماسەلەلەرى قارالدى.

بۇدان بولەك, ەكى مەملەكەتتىڭ باسشىلارى وڭىرلىك جانە حالىقارالىق كۇن تارتىبىندەگى بىرقاتار وزەكتى ماسەلەلەر جونىندە پىكىر الماستى, دەپ حابارلايدى اقوردانىڭ ءباسپاسوز قىزمەتى.

قازاقستان پرەزيدەنتى نۇرسۇلتان نازارباەۆ سي تسزينپينگە جۇمىس ساپارىمەن كەلۋگە, سونداي-اق G-20 سامميتىنە قاتىسۋعا شاقىرعانى ءۇشىن العىس ايتتى.

– قىتاي ۇيىمعا كۇردەلى كەزەڭدە توراعا بولدى. سىزدەر ازىرلەگەن كۇن ءتارتىبى دامۋدىڭ قازىرگى كەزەڭىندە وتە وزەكتى. بۇگىندە G-20-نىڭ ەكونوميكالىق پروبلەمالارعا ءمان بەرۋى بۇكىل الەم ءۇشىن ماڭىزدى مىندەتتەردى شەشۋگە سەپتىگىن تيگىزەتىن بولادى, – دەدى مەملەكەت باسشىسى.

نۇرسۇلتان نازارباەۆ ىنتىماقتاستىق ورنىققان جىلداردا قازاقستان مەن قىتاي اراسىنداعى سەنىمنىڭ ايتارلىقتاي نىعايا تۇسكەنىن اتاپ ءوتتى.

– ءبىزدىڭ بايلانىسىمىز مەملەكەتارالىق قارىم-قاتىناستىڭ ۇلگىسى بولا الادى. ستراتەگيالىق سەرىكتەستىكتىڭ ۇلگىلى مودەلىن قۇرىپ, ەكونوميكالىق ىنتىماقتاستىقتى جاڭا دەڭگەيگە كوتەردىك. قازاقستان مەن قىتايدىڭ ۇكىمەتتەرى قول جەتكەن كەلىسىمدەر قورىتىندىسى بويىنشا العا قويىلعان مىندەتتەردى ورىنداۋ جۇمىسىمەن بەلسەنە اينالىسۋدا. بيىل ءبىز قازاقستان تاۋەلسىزدىگىنىڭ 25 جىلدىعىن, ال كەلەسى جىلى ەلدەرىمىز اراسىنداعى ديپلوماتيالىق قارىم-قاتىناستىڭ 25 جىلدىعىن اتاپ وتەتىن بولامىز, – دەدى ەلباسى.

سي تسزينپين ەلىمىزدىڭ جاھاندىق ديالوگقا ەلەۋلى ۇلەسىن قوسىپ كەلە جاتقانىنا ريزاشىلىق ءبىلدىرىپ, قازاقستاننىڭ ءوڭىردىڭ جانە بۇكىل الەمنىڭ ەكونوميكالىق دامۋىندا ماڭىزدى ءرول اتقاراتىنىن اتاپ ءوتتى.

– بىلتىر وسى ۋاقىتتا بەيجىڭدە ءبىزدىڭ كەزدەسۋىمىز ءوتىپ, ونىڭ قورىتىندىسى بويىنشا قارىم-قاتىناستىڭ جاڭا كەزەڭى تۋرالى بىرلەسكەن دەكلاراتسياعا قول قويىلعان بولاتىن. قازىر بارلىق سالاداعى ەكىجاقتى سەرىكتەستىك قارقىن الىپ كەلەدى, ونىڭ ودان ءارى دامۋى جولىنداعى مىندەتتەر ايقىندالدى. ءبىزدىڭ قارىم-قاتىناسىمىزدىڭ ورناعانىنا كەلەسى جىلى 25 جىل تولاتىنىن ەسكەرە وتىرىپ, ءوزارا ءتيىمدى سەرىكتەستىكتى ودان ءارى نىعايتا ءتۇسۋ قاجەت. سونداي-اق, بىرلەسكەن كۇش-جىگەر ارقىلى ادالدىق, ءوزارا سەنىم, اۋىزبىرشىلىك جانە ءوزارا كومەك رۋحىنداعى قارىم-قاتىناستى قالىپتاستىرا وتىرىپ, ستراتەگيالىق ۇيلەسىمدى, ءوزارا ءتيىمدى ىنتىماقتاستىقتى كۇشەيتە ءتۇسۋ كەرەك, – دەدى قحر توراعاسى.

تاراپتار الداعى سامميت الەمدىك ەكونوميكانىڭ بۇدان ارعى دامۋ جولدارىن ايقىنداۋدا ماڭىزدى ءرول اتقارىپ, جاھاندىق ەكونوميكالىق ءوسىمنىڭ جاڭا قوزعاۋشى كۇشىنە اينالادى دەپ ۇمىتتەنەتىنىن ءبىلدىردى.

***

كەلىسسوزدەر قورىتىندىسى بويىنشا تومەندەگىدەي قۇجاتتارعا قول قويىلدى:

– 2004 جىلعى 17 مامىرداعى قازاقستان رەسپۋبليكاسىنىڭ ۇكiمەتi مەن قىتاي حالىق رەسپۋبليكاسىنىڭ ۇكiمەتi اراسىندا قازاقستان-قىتاي ىنتىماقتاستىعى جونiندەگi كوميتەت قۇرۋ تۋرالى كەلiسiمگە تولىقتىرۋلار ەنگىزۋ تۋرالى حاتتاما;

– «نۇرلى جول» جانە «جىبەك جولىنىڭ ەكونوميكالىق بەلدەۋى» باعدارلامالارىن ۇشتاستىرۋ جونىندەگى ىنتىماقتاستىق جوسپارى;

– قازاقستان رەسپۋبليكاسى اۋىل شارۋاشىلىعى مينيسترلىگى مەن قىتاي حالىق رەسپۋبليكاسىنىڭ ساپانى قاداعالاۋ, ينسپەكتسيا جانە كارانتين جونىندەگى باس باسقارماسى اراسىنداعى قازاقستان رەسپۋبليكاسىنان قىتاي حالىق رەسپۋبليكاسىنا ەكسپورتتالاتىن جىلقى تۇقىمداس جانۋارلار ءۇشىن قويىلاتىن كارانتين جانە دەنساۋلىعىن قورعاۋ تالاپتارى جونىندەگى حاتتاما;

– قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن قىتاي حالىق رەسپۋبليكاسىنىڭ ساپانى قاداعالاۋ, ينسپەكتسيا جانە كارانتين باس باسقارماسى اراسىنداعى قازاقستان رەسپۋبليكاسىنان قىتاي حالىق رەسپۋبليكاسىنا ەكسپورتتالاتىن سويا بۇرشاعى پارتيالارىنا قويىلاتىن فيتوسانيتاريالىق تالاپتار جونىندەگى حاتتاما.