ۇلتتىق مۋزەيدە سۋرەتشى, «سەمەي-نەۆادا» انتيادرولىق قوزعالىسىنىڭ بەلسەندى مۇشەسى كارىپبەك كۇيىكوۆتىڭ كورمەسى ءوتتى

سۋرەتشىنىڭ تۋىندىلارىمەن الىس, جاقىن شەتەل تانىس ەكەنىن ايتا كەتەيىك. ونىڭ قورجى­نىندا 200-دەن استام سۋرەت بار.

كارىپبەك كۇيىكوۆ – سەمەي يادرولىق پوليگونىنىڭ زاردابىن شەككەن ادام. پوليگونمەن شەكارالاس قاراعاندى وبلىسىنىڭ ەگىندىبۇلاق اۋىلىندا دۇنيەگە كەلگەن ول تۋعانىنان تاعدىردىڭ تاۋقىمەتىن تارتتى. قوس قولسىز تۋعان بالانى ءتورت جاسىندا اكەسى تەلتاي شىمكەنتتەگى پروتەز جاساۋ ينستيتۋتىنا, كەيىننەن سانكت-پەتەربۋرگكە اپارادى. اقىرىندا نەۆا جاعاسىنداعى قالادا وقۋعا قالعان كارىپبەك سول جەردە بەينەلەۋ ونەرىنە اۋەس بولىپ, سۋرەتتى اياعىمەن نەمەسە تىسىمەن سالا باستايدى.

سۋرەتشى كوپ شىعارماشىلىق ادامدارى سياقتى تاقىرىپتى الىستان ىزدەمەي, ءوز باسىنان وتكەن قاسىرەتتى بەينەلەيدى. ياعني, سالعان سۋرەتتەرىندە يادرولىق سىناقتاردىڭ بارلىق زالالىن اشۋعا تىرىسادى. ونىڭ «جارىلىس» اتتى كارتيناسىن بيىل وتكەن انتيادرولىق قاۋىپسىزدىك جونىندەگى سامميت بارىسىندا ەلباسى نۇرسۇلتان نازارباەۆ اقش پرەزيدەنتى باراك وباماعا سىيعا تارتقان. كارىپبەك كۇيى­كوۆتىڭ ءوزى حالىقارالىق انتيادرولىق قوزعالىستىڭ بەلسەندى مۇشەسى, «اتوم» جوباسىنىڭ قۇرمەتتى ەلشىسى ەكەنىن ايتا كەتەيىك. يادرولىق سىناق­تارعا قارسىلىعىن ول ونەرى ارقىلى تانىتادى.
– نۇرسۇلتان نازارباەۆ سۋ­رەتىمدى باراك وباماعا سىيعا تارتتى دەگەندە ەرەكشە اسەرگە بولەندىم. شىندىعىن ايتقاندا, ونى كۇتپەگەن ەدىم. بۇل تۋىندىمدا مەن يادرولىق بومبا جىرىلىسىن كورگەن ءوزىمنىڭ اكەمدى بەينەلەدىم. وسى سۋرەت مەنىڭ عانا ەمەس, قازاقستان حالقىنىڭ ۇستانىمىن كورسەتەدى دەپ ويلايمىن. بۇگىندەرى پوليگون تاقىرىبىنان بولەك پەيزاج, اۆتوپورترەت سىندى جانرلارىنداعى سۋرەتتەردى دە سالامىن. مەنى الەۋمەتتىك تاقىرىپتار, سونىڭ ىشىندە قازىرگى جاستاردىڭ تاربيەسى الاڭداتادى. ءبىر ماقساتىم – تۋىندىلارىم ارقىلى سولارعا وي سالۋ, – دەيدى كارىپبەك كۇيىكوۆ.

بۇعان دەيىن قازاق سۋرەتشىسىنىڭ كورمەلەرى حيروسيما مەن ناگاساكيدە, نيۋ-يوركتە, «مەنىڭ سىزدەردى قۇشاقتايتىن جۇرەگىم بار» دەگەن اتپەن وسلودا جانە گەرمانيا, تۇركيا, اۆستريا, گوللانديا ەلدەرىندە وتكەن. ونىڭ ونەرىن بۇۇ جانە باسقا دا حالىقارالىق ۇيىمدار وتە جوعارى باعالادى. سۋرەتشىنىڭ تۋىندىلارى استاناداعى جۇرتتىڭ نازارىنا العاش رەت قر ۇلتتىق اكادەميالىق كىتاپحانادا وتكەن كورمەدە شىعارىلعان.

امانعالي قالجانوۆ