نۇرسۇلتان نازارباەۆ ءزۇلفيا عابيدۋللينانى پاراليمپيادانىڭ تۇڭعىش التىنىمەن قۇتتىقتادى

ەلباسى نۇرسۇلتان نازارباەۆ ءزۇلفيا عابيدۋلليناعا ريو-دە-جانەيروداعى پاراليمپيادا ويىندارىنداعى جەڭىسىنە بايلانىستى قۇتتىقتاۋ جەدەلحاتىن جولدادى.

مەملەكەت باسشىسى بارشا قازاقستاندىقتار اتىنان ز.عابيدۋللينانى سۋعا ءجۇزۋ سايىسىندا جەڭىپ العان التىن مەدالىمەن قۇتتىقتادى.

«سەن ەل تاريحىندا پاراليمپيادا ويىندارىنداعى تۇڭعىش مەدالعا قول جەتكىزىپ, حالقىمىزدىڭ مەرەيىن ارتتىرىپ, زور قۋانىشقا بولەدىڭ. حالقىڭ سەنى قازاقستاننىڭ اتىن الەمگە ايگىلى ەتكەن مىقتى سپورتشى رەتىندە تانيدى. 100 مەترگە ەركىن ستيلمەن جۇزۋدەن الەم رەكوردىن جاڭارتىپ, التىن جۇلدەگە قول جەتكىزگەن بۇگىنگى جەڭىسىڭ سونى تاعى ءبىر دالەلدەدى. بۇل جەڭىسىڭ جىلدار بويعى قاجىرلى ەڭبەگىڭنىڭ جەمىسى دەپ بىلەمىن», – دەلىنگەن جەدەلحاتتا.

قازاقستان پرەزيدەنتى سپورتشىعا زور دەنساۋلىق تىلەپ, كەلەشەكتە جاڭا بەلەستەردى باعىندىرا بەرۋىنە نيەتتەستىك ءبىلدىردى.

akorda.kz