نىساندار سالىنادى

الماتى اۋدانىنىڭ اۋماعىندا الداعى جىلى بىرنەشە الەۋمەتتىك نىسان بوي كوتەرەدى.

اتالمىش اۋدان اكىمىنىڭ ورىنباسارى ماديار ­نوگەربەكوۆتىڭ ايتۋىنشا, 2023 جىلى الماتى اۋدانىنىڭ اۋماعىندا 9 مەكتەپ, ءورت ءسوندىرۋ دەپوسى جانە ەمدەۋ مەكەمەلەرىنە جاپسارلاس عيماراتتار سالىنادى.

– ناجىمەدەنوۆ كوشەسىندە بوي كوتەرەتىن ءبىلىم بەرۋ مەكەمەسى 1200 وقۋشىنى قابىلداي السا, «وتاۋ» شاعىن اۋدانىنداعى مەكتەپ 2000 وقۋشىنى وقىتۋعا ارنالاتىن بولادى. ءبىر اۋىسىمدا 3600 ورىنعا ەسەپتەلگەن №53; №13; №72; №73; №86 جانە №83 مەكتەپتەرگە قوسىمشا عيماراتتار سالىنىپ, پايدالانۋعا بەرىلەدى, – دەدى اكىم ورىنباسارى.

سونداي-اق الداعى جىلى ر.قوشقارباەۆ كوشەسى, 43 مەكەنجايىنداعى №15 جانە ش.قۇدايبەردىۇلى داڭعىلى, 25 مەكەنجايىندا ورنالاسقان №7 ەمحاناعا كۇردەلى جوندەۋ جۇمىستارىن جۇرگىزۋ جوسپارلانىپ وتىر.

سونىمەن قاتار, الماتى اۋدانى اكىمىنىڭ ورىنباسارى مامانداندىرىلعان ءبولىمدى سالۋ ماسەلەسى بۇعان دەيىن بىرنەشە رەت كوتەرىلگەنىن, ءورت ءسوندىرۋ ماشينالارى وسى اۋدانعا قالانىڭ باسقا بولىگىنەن كەلەتىنىن ايتتى. وسىعان وراي, اۋداندا 2023 جىلى ءورت ءسوندىرۋ دەپوسى سالىنادى.

م.نوگەربەكوۆتىڭ مالىمدەۋىنشە, جاڭا عيمارات 10 اۆتوكولىككە ەسەپتەلگەن, وندا 131 ادام جۇمىس ىستەيتىن بولادى.

                                                          بايان اسىلبەكوۆا