قارتتار – اسىل قازىنامىز. سانالى عۇمىرلارىن ەل ءۇشىن ەڭبەك ەتۋگە ارناعان وسىناۋ ارداقتى ادامدارعا قۇرمەت كورسەتۋ – ءبىزدىڭ باستى بورىشىمىز. قازىرگى كەزدە ۇكىمەت تاراپىنان ولارعا جان-جاقتى قولداۋ كورسەتىلىپ, قامقورلىق جاسالۋدا. قارتتار مەرەكەسى قارساڭىندا بارلىق وسىناۋ الدىڭعى بۋىن اعا-اپالارىمىزدى
از-كەم اڭگىمەگە تارتقان ەدىك.
قاماتاي توقاباەۆ, ۇلى وتان سوعىسىنىڭ ارداگەرى:
– البەتتە, ەلباسىنىڭ, قالا اكىمىنىڭ قامقورلىعىن ۇنەمى كورىپ كەلەمىز. ماسەلەن, استانادا مەرەكە سايىن قارتتارعا قارجىلاي كومەك كورسەتىلىپ, قايىرىمدىلىق شارالار ۇيىمداستىرىلىپ تۇرادى. ال, ەڭ باستىسى, قالا اكىمى ءبىز سەكىلدى ۇلى وتان سوعىسىنىڭ ارداگەرلەرىن تۇگەلدەي كوممۋنالدىق تولەمدەردەن بوساتتى.
سونىمەن بىرگە, قوعامدىق كولىكتەردە تەگىن جۇرەمىز. ەلىمىزدىڭ ءبىر تۇكپىرىنەن ەكىنشى تۇكپىرىنە دەيىن ۇشاقپەن جىلىنا ءبىر رەت, ال پويىزبەن جىل بويى تەگىن قاتىناي الامىز.
كۋرسك شايقاسىنا 70 جىل تولۋىنا وراي كەشە عانا استانا قالاسىنىڭ اكىمى يمانعالي تاسماعامبەتوۆ رەسەي فەدەراتسياسى كۋرسك وبلىسىنىڭ گۋبەرناتورى الەكساندر ميحايلوۆتى قابىلداپ, وعان ءبىزدى دە شاقىردى. جىلى سوزدەرىن ايتىپ, سول سوعىسقا قاتىسقاندارعا بارىنشا قۇرمەت كورسەتتى.
بىزگە وسىنشالىقتى جاعداي جاساپ, قامقورلىقتارىن اياماي جۇرگەن ازاماتتارىمىز امان بولسىن! ولارعا راحمەتتەن باسقا ايتارىم جوق.
قالي مۇقاتاەۆ, ەڭبەك ارداگەرى:
– قالا اكىمدىگى مەرەكە سايىن قۇرمەتتەپ, قولداۋ ءبىلدىرىپ جاتادى. قالامىزدا رەسپۋبليكامىزدىڭ وبلىس ءوڭىرلەرىنەن اكەلىنگەن اۋىل شارۋاشىلىعى ونىمدەرىنىڭ جارمەڭكەسىن وتكىزۋ داستۇرگە اينالدى. سەنبى-جەكسەنبى كۇندەرى «شاپاعات» كوممۋنالدىق بازارى ماڭىندا دا جارمەڭكە ۇيىمداستىرىلىپ ءجۇر. بۇل دا بولسا قارتتارعا كورسەتىلگەن قۇرمەتتىڭ ءبىر ءتۇرى دەپ ەسەپتەيمىن.
استانادا الەۋمەتتىك دۇكەندەر بار. تەك, سولاردىڭ كەيبىرىندەگى كوكونىستەردىڭ باعاسى قاسىنداعى ساۋدا ورىندارىنداعى تاۋارلاردىڭ باعاسىنان قىمباتتاۋ بولىپ جاتادى. بۇعان باقىلاۋ جاسايتىن ادام جوق پا؟
ءا.جاقسىبەكوۆ اكىم بولعان كەزدەن بەرى قالىپتاسقان ۇردىسپەن جىلدىق جولاقى بيلەتىن تەگىن الىپ ءجۇرمىز. باسقا قالالاردا مۇنداي مۇمكىنشىلىك جوق.
التىن سۇلەيمەنوۆا, دەنساۋلىقتى دامىتۋ رەسپۋبليكالىق ورتالىعىنىڭ مامانى, زەينەتكەر:
– ماعان ەشقانداي قامقورلىق كەرەك ەمەس, زەينەتاقىم وزىمە جەتكىلىكتى. ونىڭ ۇستىنە جۇمىس ىستەپ ءجۇرمىن. دەگەنمەن, قالامىزدا ەگدە ادامداردىڭ قامقورلىقتان تىس قالىپ جاتقانىن كورگەن ەمەسپىن.
قۇرمەتتى دەمالىسقا شىققالى بەرى جولاقى بيلەتىن تەگىن پايدالانىپ كەلەمىن. ونسىز كۇنىنە 300-360 تەڭگە كەتەر ەدى. سونىمەن بىرگە قوعامدىق مونشاعا زەينەتكەرلەر 50 پايىز جەڭىلدىكپەن بارادى. سىرقاتىنىڭ تۇرىنە بايلانىستى كەيبىر ناۋقاستار تەگىن ءدارى-دارمەكتەرمەن قامتاماسىز ەتىلەدى. زەينەتاقىسى شامالى ادامدار ءۇشىن وسىنىڭ ءبارى قانشاما جاردەم عوي. بۇل باعىتتا قالامىزدا كوپ جۇمىس جۇرگىزىلىپ جاتىر. دەگەنمەن, جىل وتكەن سايىن كوممۋنالدىق تولەمدەر قىمباتتاپ جاتىر. ماسەلەن, مەنىڭ ءبىر كورشىم جالپى اۋماعى 30 شارشى مەتر پاتەردە تۇرادى. اي سايىن الاتىن زەينەتاقىسى 30 مىڭ تەڭگەدەن ءسال عانا اسادى. سونىڭ 8-9 مىڭىن كوممۋنالدىق تولەمدەرگە جۇمسايدى. قالعانىن نە كيىمىنە, نە تاماعىنا جەتكىزە الماي قينالادى. جەكەمەنشىك ۇيدە تۇراتىندارعا كومىردىڭ اقشاسىن اكىمدىك بەرەدى عوي. سول سەكىلدى, زەينەتكەرلەرگە دە كوممۋنالدىق تولەمدەرگە جەڭىلدىكتەر قاراستىرىلسا, جاقسى بولار ەدى.
گۇلبارشىن وكەشقىزى
