نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن, «Qazaq olenderi» ۇجىمىنىڭ ۇيىمداستىرۋىمەن مۋزىكالىق جاس كورەرمەندەر تەاترىندا «Qaursyn galam» اتتى پوەزيا كەشى ءوتتى. مادەني كەش تاۋەلسىزدىكتىڭ 30 جىلدىعى اياسىندا ۇيىمداستىرىلدى.
كەشتىڭ ماقساتى – قازاق ءتىلىنىڭ مارتەبەسىن كوتەرىپ, قولدانۋ اياسىن كەڭەيتۋ جانە ادەبي شىعارمالاردىڭ, سونىڭ ىشىندە پوەزيا مەن پروزانىڭ جاستار اراسىندا كەڭىنەن تاراپ, دامۋىنا ۇلەس قوسۋ.
كەش بارىسىندا مۇقاعالي ماقاتاەۆ, تولەگەن ايبەرگەنوۆ, جۇماتاي جاقىپباەۆ, تۇمانباي مولداعاليەۆ, قادىر مىرزا ءالي, جۇمەكەن ناجىمەدەنوۆ, مۇحتار شاحانوۆ, فاريزا وڭعارسىنوۆا, كۇلاش احمەتوۆا, ەسەنعالي راۋشانوۆ سىندى كورنەكتى اقىنداردىڭ, قازىرگى جاس بۋىننىڭ ولەڭدەرى وقىلدى. تەاترلاندىرىلعان كورىنىستەر ارقىلى كورەرمەندەر وتان, تۋعان جەر, ماحاببات, سەزىم, ساعىنىش, دوستىق, اتا-انا تاقىرىبىنداعى سىرلى دا سيقىرلى پوەزيا الەمىنە ساياحاتتاپ قايتتى.
