«تار زامان» ءفيلمى – قازاق كينەماتوگرافياسىنداعى الاش ارىستارى تۋرالى تۇسىرىلگەن العاشقى كوركەم فيلم. بۇل تاقىرىپ دەرەكتى فيلمدەردە قوزعالعانىمەن, تولىقمەترلى كوركەم فيلم رەتىندە «قازاقستان» تەلەارناسىنىڭ قولداۋىمەن العاش رەت ۇلكەن ەكرانعا شىعىپ وتىر.
وسىنداي اۋقىمدى تاقىرىپتى قوزعاعان قويۋشى-رەجيسسەر مۇرات بيدوسوۆتىڭ ەڭبەگىن ەلەمەي كەتكەن ءجون بولماس. جالپى, بۇل ءفيلمدى رەجيسسەردىڭ دەبيۋتتىك تۋىندىسى دەپ تە اتاۋعا بولادى. وسىعان دەيىن رەجيسسەر 2016 جىلى «حابار» ارناسى ارقىلى كورەرمەندەرگە اباي قۇنانبايۇلىنىڭ ومىرىنەن سىر شەرتەتىن «اقىلدىڭ كىلتى. ءومىرداستان» اتتى تەلەەپوپەياسىن ۇسىنعان بولاتىن. «تار زامان» ءفيلمى – كينو الەمىندە كوممەرتسيالىق, پروديۋسەرلىك فيلمدەرمەن باقتالاستىققا ءتۇسىپ جاتقان العاشقى جۇمىسى. «قۇلاساڭ ناردان قۇلا» دەگەندەي, رەجيسسەر بىردەن وسىنداي اۋقىمدى تاقىرىپتى العان ەكەن. ناردان قۇلادى. قۇلاعاندا دا وڭباي قۇلادى. سەبەپ – فيلمنىڭ نەگىزگى دىڭگەگى – دراماتۋرگيانىڭ السىزدىگىندە. ونى جازعاندار تىزىمىندە رەجيسسەردىڭ ءوزى, ياعني مۇرات بيدوسوۆ جانە سەرجان زاكەرۇلى بار. فيلمدە وقيعانىڭ باستالۋى, ءوربۋى, اياقتالۋى سىندى نەگىزگى پلاستتار جوق. بىرنەشە قالالاردا بولىپ جاتقان احۋالدى تۇگەلدەي قامتۋعا تىرىسقان. جاي عانا موزايكالى تۇردە انادان-مىنادان الىنعان سيۋجەتتەر. ءتىپتى دوكۋمەنتالدى فيلمگە كوبىرەك كەلەدى. دوكۋمەنتالدى فيلم دەپ اتاۋعا تاعى بولمايدى. سەبەبى وندا اكتەر ويىنى, دەكوراتسيا, كوستيۋم, تاعى باسقا كوركەم فيلمگە ءتان وزگەشەلىكتەر بار. ءسوزدىڭ تىم كوپتىگى كورەرمەندى جالىقتىراتىنىن دا ەسكەرمەگەن. بۇل كەمشىلىكتى جاسىرۋ ءۇشىن مۋزىكانى ۇزبەي قولدانعاندارى دا بىردەن كورىنىپ تۇر (ۇ.جامالبەكتىڭ شىعارمالارى). كوپ ساتتەردە كەيىپكەرلەردەن جاڭىلىسىپ, شاتاسىپ وتىراسىڭ. نەگە دەسەڭىز, اكتەرلەردىڭ ءبىز بىلەتىن قازاق زيالىلارىنا ۇقساماۋى, گريمنىڭ السىزدىگى, شاش ۇلگىسى سىندى قاتەلىكتەر جەتىپ ارتىلادى. اكتەرلەردەن ارىستارعا ءتان ويلى كوزدى, ادەمى كەلبەتتى, ءسوز جاۋھارلارىن كەزدەستىرۋىڭ قيىنعا سوعادى. بالكىم, بۇل ولقىلىق جاس اكتەرلەردىڭ تاڭدالۋىندا شىعار. رەجيسسەردىڭ جاس تالانتتاردى تانىمال قىلامىن دەپ اعات كەتكەن جەرى وسى بولعان سىڭايلى. ءىرى, ورتا, جالپى پلانداعى كادرلاردىڭ دۇرىس الىنباۋى دا كوزگە وتتاي باسىلدى. ءفيلمنىڭ وسال تۇستارى از بولعان جوق. بىلايشا ايتقاندا, فيلمدە تەاتر دا, مۋزىكا دا بار. تەك كينو جوق…
قورىتىندىلاي كەلە, مۇنداي فيلمدەر جەكە تەلەارنالاردا ەمەس, ءىرى كينوستۋديالاردا تۇسىرىلسە دەگەن تىلەك بار. اسىرەسە, تاريحي فيلمدەر.
ەڭلىك ەگەۋباەۆا,
قازاق ۇلتتىق ونەر ۋنيۆەرسيتەتىنىڭ ستۋدەنتى
