نۇر-سۇلتان قالاسىنىڭ اكىمى التاي كولگىنوۆ اپتا سايىن وتەتىن ونلاين-قابىلداۋدا تاعى 10 وتباسىنىڭ ماسەلەسىن تىڭدادى. قابىلداۋ بارىسىندا 30-دان استام سۇراق قويىلدى. بۇل تۋرالى قالا باسشىسى ءمالىم ەتتى.
«قازىردىڭ وزىندە كەلەسى جىلعا دايىندىق جۇمىستارىن جۇرگىزىپ جاتىرمىز: ەلدى مەكەندەردى دامىتۋ, جولداردى جوندەۋ, الەۋمەتتىك نىساندار سالۋ (قولجەتىمدى تۇرعىن ءۇي, مەكتەپتەر, مەديتسينالىق مەكەمەلەر), قوعامدىق كەڭىستىكتەر مەن اۋلالاردى اباتتاندىرۋ جانە تاعى باسقالار. قالا تۇرعىندارىنان كەلىپ تۇسەتىن ماسەلەلەردى ەسكەرە وتىرىپ, ەلوردانى دامىتۋ جوسپارىنا تۇزەتۋلەر ەنگىزەمىز. وسىلايشا بۇرىن كوتەرىلگەن ماسەلەلەر نەگىزىندە بىرقاتار شارالار قابىلداندى. اتاپ ايتقاندا, تۇرعىن ءۇي باعدارلاماسىنا قاتىسۋشىلار ساناتىن, وڭالتۋ ورتالىقتارىنىڭ جەلىسىن كەڭەيتتىك; ينۆاتاكسي سانىن ارتتىرىپ, تۇرعىن ءۇي سەرتيفيكاتىنىڭ مولشەرىن 1,5 ملن تەڭگەگە دەيىن ۇلعايتتىق; جاڭا اۆتوبۋس مارشرۋتتارىن ىسكە قوستىق جانە تاعى باسقالار» دەپ ءتۇسىندىردى ا.كولگىنوۆ.
ونىڭ ايتۋىنشا, اپتا سايىن ازاماتتاردى قابىلداۋ ەلوردا تۇرعىندارىن الەۋمەتتىك كومەكپەن كوبىرەك قامتۋعا, حالىقپەن ءوزارا بايلانىستى نىعايتۋعا مۇمكىندىك بەرەدى. «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا بيىلعى 10 ايدا ارىپتەستەرىممەن بىرگە 1,7 مىڭنان استام قالا تۇرعىنىن قابىلدادىق. قالا تۇرعىندارىنىڭ پروبلەمالارىن شەشۋدى باقىلاۋعا الامىز» دەدى قالا باسشىسى.
