ەلوردادا «ءبىز – ءبىرتۇتاس حالىقپىز» اتتى حV قالالىق قازاقستان حالقىنىڭ دوستىعى فەستيۆالى ءوتتى.
جىل سايىن قازاقستان حالقى مەرەكەسى قارساڭىندا وتەتىن ونەر سايىسىنا «ۆايناح» شەشەن-ينگۋش ەتنومادەني بىرلەستىگى, «نوعاي» مادەني ورتالىعى, قازاقستان ۇيعىرلارى مادەني ورتالىعى, «حازار» ازەربايجان مادەني ورتالىعى, «باربانگ» قازاقستان رەسپۋبليكاسى كۇردتەر قاۋىمداستىعى, «قىرعىزستان-استانا» قوعامدىق بىرلەستىگى, «استانا قالاسىنىڭ وزبەك ەتنومادەني ورتالىعى, «بەلارۋس» جانە «تاڭ» تاتار-باشقۇرت مادەني ورتالىقتارى, «الەف» ەۆرەيلەردىڭ مادەني-اعارتۋ قوعامدىق-ساياسي قوعامى, «زلاتا» بولگار مادەني ورتالىعىنىڭ ونەرپازدارى قاتىستى. فەستيۆالدىڭ ەكىنشى كۇنىندە «ۆاترا» ۋكراين قوعامى, «پولياكتار» قوعامدىق بىرلەستىگى مەن «راديما» بەلارۋس مادەني ورتالىعى, «ۆان» ارميان قوعامى, «وبەرەگ» ۋكراين قوعامى, «ۆوزروجدەنيە» نەمىس قوعامى, كورەي مادەنيەت ورتالىعى, دالا كازاكتارى وداعىنىڭ الماتى اۋداندىق فيليالىنىڭ ونەرىن تاماشالادىق.
ءار حالىقتىڭ وزىندىك ەرەكشەلىگىن كوپكە تانىتۋشى – ۇلتتىڭ مادەني مۇراسى. ءبىز فەستيۆالعا قاتىسقان ونەر ۇجىمدارىنىڭ جەتەكشىلەرىن سوزگە تارتىپ, ونەر ەرەكشەلىكتەرى جايىندا سۇراپ بىلگەن ەدىك.
«ۆيدەرگەبۋرت» نەمىس گۋمانيتارلىق كەشەنى 1994 جىلدان بەرى جۇمىلا ىستەپ كەلەدى. ەتنيكالىق نەمىس بالالارىنىڭ انا تىلىندە ءبىلىم الۋلارىنا مۇمكىندىك اشاتىن بىرلەستىكتىڭ جۇمىسى سان قىرلى. سونىڭ ءبىرى – «اينحايت» نەمىس مادەني ورتالىعى. وندا «شپەتتە بليۋمەن», «اۆگۋستين» اتتى ونەر ۇجىمدارى بار.
«ءبىزدىڭ ۇجىمنىڭ ونەرپازدارى حالىقتىڭ قايناعان ورتاسىنان جاساقتالدى. ولار اتا-انالارىنان نەمىس اندەرى مەن بيلەرىن ۇيرەنىپ, جاستار اراسىندا ناسيحاتتاپ ءجۇر» دەدى ورتالىقتىڭ توراعاسى يگور بەرگ. اتالمىش فەستيۆالدا نەمىس ورتالىعىنىڭ سازدى اسپاپتا شەبەر ورىنداۋشىلارى وسى نوميناتسيا بويىنشا ماراپاتتالدى.
ال, ەلوردالىق پولياكتار قوعامىنىڭ «كۋياۆياچەك» بي ءانسامبلى پولياك بيلەرىمەن قاتار ەۋروپا حالىقتارىنىڭ كوپتەگەن بيلەرىن ورىندايدى. جاقىندا ۆارشاۆادا وتكەن حالىقارالىق فەستيۆالدىڭ جۇلدەلى ءۇشىنشى ورنىن يەمدەنىپتى.
– كوپشىلىك باس قوساتىن مەرەكەلەردىڭ ارنايى ءبيى بار. ەڭ تانىمالى – «مازۋركا», «كراكوۆياكا», «وبەرەكا». بۇل بيلەردىڭ ارقايسىسىنا ءتان قوزعالىستارى مەن قيمىلدارىن, ورىندالۋ مانەرىن ۇرپاقتان-ۇرپاققا سول قالپىندا جەتكىزىپ, ءبيدىڭ العاشقى قالپى مەن سيپاتىن وزگەرىسسىز ساقتاۋعا تىرىسقان. باسقا حالىقتىڭ بي ونەرىندەگى مانەرىمەن تولىقتىرۋعا تالپىنباعان, سول سەبەپتى دە بۇل بيلەردە ۇلتتىق ناقىش ايىرىقشا كوزگە تۇسەدى, – دەيدى پولياكتاردىڭ ەتنومادەني ورتالىعىنىڭ جەتەكشىسى ەلەنا روگوۆسكايا.
جالپى, بي – ءار حالىقتىڭ دۇنيەتانىمى مەن سالتىن پلاستيكالىق قيمىلمەن جەتكىزەتىن ەرەكشە ونەردىڭ ءتۇرى. سودان دا بولار, ءسان-سالتاناتى تاسىعان داۋلەتتى بايلار دا, قاراپايىم شارۋا دا توي-تومالاقتا بي بيلەپ, كوڭىل كوتەرەتىن بولعان. حورەوگرافيا بويىنشا استانالىق كورەيلەر مەن ازەربايجانداردىڭ بيشىلەرى دە ءتانتى قىلدى.
ال, ۋكراين مەن بەلارۋس انشىلەرى فەستيۆال جەڭىمپازدارى بولىپ تانىلدى
ايگۇل ۋايسوۆا
