وڭالتۋ ورتالىعىنىڭ وڭتايلى ىستەرى
جاقىندا ەكى جاسار قۋانىش ومىرىندەگى العاشقى قادامدارىن جاسادى. وسىدان بىرنەشە اي بۇرىن ءبۇلدىرشىن اياعىنان تىك تۇرا المايتىن دا ەدى. استانا قالاسىنىڭ الەۋمەتتىك قىزمەت كورسەتۋ ورتالىعى ماماندارىنىڭ ارقاسىندا بالا دەنساۋلىعى جاقسارىپ كەلەدى. سويلەسكەنىمىزدە قۋانىشتىڭ اكە-شەشەسى بۇل جاڭالىقتى عاجايىپقا تەڭەيتىنىن جاسىرمادى.
ورتالىقتىڭ اشىلعانىنا نەبارى سەگىز اي ءوتتى, ال ءناتيجەلەرى قۋانتارلىق: ءتورت بالا وزدىگىنەن ءجۇرىپ-تۇرا الاتىن بولدى.
ولاردىڭ ىشىندە كىشكەنتاي ۆەرونيكا دا بار. اناسى يانا گرۋزدەۆا بالاسىنىڭ جەتكەن جەتىستىكتەرىمەن ءبولىستى. «ءبىز وڭالتۋ ورتالىعىنان بولەك, «ەرەكشە» بالالارعا ارنالعان مەكەمەگە بارىپ تۇرامىز. وسىندا جاسايتىن جاتتىعۋلار مەن ەمدىك دەنە تاربيەسىنىڭ ارقاسىندا قىزىمنىڭ دەنساۋلىعى ايتارلىقتاي جاقساردى. سويلەۋ قابىلەتى, قوزعالىس يكەمى دامىدى. 2 جاس 9 ايلىق بالانىڭ ءىس-ارەكەتىن, ءجۇرىس-تۇرىسىن باقىلاپ, بارلىعى تاڭعالادى. الەۋمەتتىك كومەك كورسەتۋ ورتالىعىندا بالام ءتاي-ءتاي باسىپ ءجۇرىپ كەتتى. ءبىز بىردەن ەمدىك دەنە شىنىقتىرۋدىڭ ءۇش كۋرسىن قابىلدادىق. مەكەمەنىڭ قىزمەت كورسەتۋ ساپاسى وتە جوعارى: اتشابار مەن باسسەين بار, ويىن-ساۋىقتىرۋ شارالارى ءجيى وتكىزىلەدى. بارىنە بارىپ ۇلگەرمەيسىڭ دە» دەدى ول.
بالا ساۋلىعى ءۇشىن ءبىر ەمەس, بىرنەشە مامان اتسالىسادى, كەشەندى ەمدەۋ جۇرگىزىلەدى. قازىرگى تاڭدا ورتالىققا 320 بالا كەلىپ ءجۇر. دارىگەرلەر قويىلعان دياگنوزىنا, قاجەتتىلىكتەرى مەن مۇمكىندىكتەرىنە بايلانىستى ارقايسىسىمەن جەكە جۇمىس ىستەيدى.
ساۋىقتىرۋ ساباقتارىنىڭ ساپاسى مامانداردان بولەك, بولمەلەردىڭ جابدىقتالۋىنا بايلانىستى. ماسەلەن, پسيحولوگتىڭ بولمەسى جارىق باعاناسى مەن جارىق تىزبەكتەرگە تولى. ولار بالالاردىڭ زەيىنىن دامىتۋعا كومەكتەسىپ, دەمالۋعا جاعداي جاسايدى. بۇل تۋرالى پسيحولوگ اسەل سماعۇلوۆانىڭ ءوزى بىلاي دەيدى: «ەرەكشە» بالالارعا لوگوپەدپەن جۇمىس ىستەۋ – ءوزىن جەڭۋمەن تەڭ. ساباقتان كەلە سالا كوبىنەسە اشۋلى بولادى. ال مۇندا بالالاردىڭ ەركىن ويناۋىنا جانە تىنىعۋىنا مۇمكىندىك بار. بىزدەن شىعىپ, ولار ماسساجعا, ودان كەيىن جاتتىعۋ جاساۋعا كەتەدى».
ەمدىك دەنە شىنىقتىرۋ ءبولمەسى ەڭ وزىق مەديتسينالىق قۇرال-جابدىقتارمەن جاساقتالعان. بۇلدىرشىندەردىڭ العاشقى قادامىن جاساۋعا سەپتىگىن تيگىزەتىن ارناۋلى باعدارلاما ۇسىنىلادى. گروس اسپالى كونسترۋكتسياسى, ۆەرتيكاليزاتور اتتى قۇرىلعى, «اتلانت» كوستيۋمدەرى – ءبارى تىرەك-قيمىل جۇيەسى بۇزىلعان بالانىڭ قوزعالىس قىزمەتىن دامىتۋعا وڭ اسەر ەتەدى.
ورتالىق قىزمەتكەرلەرىنىڭ ايتۋىنشا, استانا قالاسىنىڭ اكىمدىگى بولگەن 12 ميلليون تەڭگە قاراجات ەمدىك دەنە-شىنىقتىرۋ بولمەسىن جابدىقتاۋعا ۇلكەن دەمەۋ بولدى.
دارىگەر ءۇشىن ەڭ جوعارى ماراپات – بالانىڭ وزدىگىنەن ءجۇرىپ, قادام باسۋى. ارداق چويبەكوۆا جانە كۇلنازيا جومارتوۆا ەسىمدى ماسساج جاساۋشىلار بالالاردى اياعىنان تىك تۇرعىزۋعا بار كۇشتەرىن سالۋدا. كەشەندى ەمدەۋدە تاعى ءبىر ماڭىزدى ءرول اتقاراتىن مامان يەسى – مۋزىكالىق تەراپەۆت. قۇلاققا تاڭسىق ەستىلەدى. الايدا ەلىمىزدىڭ ءبىرىنشى مۋزىكالىق تەراپەۆتى التىن تاقاۋوۆا ءان ارقىلى جارىمجان جاندى ەمدەۋگە بولاتىنىنا سەنىمدى. اۋەزدى ءاندى ەستىگەننەن كەيىن بالالار ءبىراز ۋاقىتتان سوڭ وزدەرى اندەتە باستايدى. ءتىپتى, ساحنادا ونەر كورسەتۋگە قۇلشىنىستارى ويانادى.
بالالارمەن قاتار ورتالىقتىڭ قىزمەتتەرىن 320-عا جۋىق جالعىزباستى ارداگەر پايدالانادى. ولاردى الەۋمەتتىك جۇمىسكەرلەر ۇيلەرىنە بارىپ تەگىن ەمدەيدى.
– مەملەكەت تاراپىنان ءجۇرگىزىلىپ جاتقان ساۋىقتىرۋ شارالارى ازىرگە جالعىز. بالالاردى وڭالتۋمەن اينالىساتىن باسقا مەكەمەلەر – جەكە كاسىپكەرلەر مەن قورلار. سول سەبەپتى, بۇگىندە اكىمدىك بۇكىل قالانى قامتۋدى جوسپارلاپ وتىر, – دەيدى مەكەمە باسشىسى ىرىستى بايماعامبەتوۆا.
«بالا ساۋلىعى – ۇلت بولاشاعى» دەيمىز. ارباعا تاڭىلعان بالالاردىڭ تاعدىرى ورتالىقتىڭ وڭتايلى جۇمىسى مەن بىلىكتى ماماندارىنىڭ ارقاسىندا وزگەرىپ جاتىر. بۇل – قالالىق دەنساۋلىق جۇيەسىنىڭ دامىپ كەلە جاتقانىنا دالەل.
گۇلدانا تالعاتقىزى