ەلوردالىق وقۋشىلار «نۇر الەم» سفەراسى – «بولاشاق ەنەرگياسى» مۇراجايىن ارالاپ, بالاما ەنەرگيا كوزدەرىمەن جاقىنىراق تانىستى. بۇل «استانا ەكسپو-2017» ۇلتتىق كومپانياسى جانە استانا قالاسى ءبىلىم باسقارماسىمەن بىرلەسكەن جوبا اياسىندا ۇيىمداستىرىلدى.
6-28 اقپان ارالىعىندا قالا مەكتەپتەرىنىڭ 5 مىڭعا جۋىق وقۋشى ەكسپو-2017 كورمە كەشەنىنىڭ نىساندارىن ارالايدى. ماقسات – بالالاردى بىلتىر جازدا وتكەن «ەكسپو-2017» كورمەسىنىڭ مۇراسىمەن تانىستىرۋ.
بالالار مەن جاسوسپىرىمدەردىڭ تۋريزم جانە ولكەتانۋ ورتالىعىنىڭ ديرەكتورى مەلس ابەنوۆتىڭ سوزىنە سۇيەنسەك, شارا «رۋحاني جاڭعىرۋ» باعدارلاماسى اياسىنداعى ولكەتانۋ باعىتى بويىنشا ۇيىمداستىرىلۋدا. «بيىل استانا قالاسىندا ولكەتانۋ باعىتى بويىنشا كەڭ اۋقىمدى 19 شارا وتەدى. «نۇر الەم» پاۆيلونىنا كەلۋىمىز – سولاردىڭ العاشقىسى. 2018 جىلدان باستاپ «رۋحاني جاڭعىرۋ» باعدارلاماسىنا ارنالعان 5 جىلدىق جوسپار جاسالدى. وسى ۋاقىت ارالىعىندا ءتۇرلى شارالارعا 50 مىڭ وقۋشىنى تارتامىز. بيىل 5 مىڭ وقۋشىنى, كەلەسى جىلى – 7,5 مىڭ, ودان كەيىن – 10 مىڭ, 12,5 مىڭ, 15 مىڭ وقۋشىنى قاتىستىرۋعا نيەتتىمىز» دەيدى مەلس ابەنوۆ. «مۇنىڭ بارلىعىنا ۇكىمەت بيۋدجەتتەن اقشا ءبولىپ وتىر. ودان بولەك, دەمەۋشىلەردى ءوزىمىز ىزدەستىرەمىز. بالالاردىڭ «نۇر الەمگە» بارۋىنا بيىل 2,5 ملن تەڭگە ءبولىندى, بۇل – بيلەتتەردىڭ قۇنى. جالپى, 2018 جىلعا 77 ملن تەڭگە قارجى بەرىلىپ وتىر. ءبىز بۇل اقشاعا ون مەكتەپ قابىرعاسىندا مۋزەي اشىپ, ءارتۇرلى بايقاۋلار ۇيىمداستىرامىز. «نۇر الەم» پاۆيلونىنان باسقا وقۋشىلار الجير, كارلاگ سياقتى لاگەرلەرگە, ەكسپەديتسيالىق جورىقتارعا, كيەلى جەرلەرگە ساياحاتتاۋعا جىبەرەمىز» دەپ ءسوزىن جالعاستىردى ول.
ءار مەكتەپتە ولكەتانۋ, ەكولوگيا, تۋريستىك جورىقتار باعىتى بويىنشا ەكسپەديتسيالىق قۇرام جاساقتالادى. سول قۇرامداعى وقۋشىلار وزدەرى قىزىققان نىساندارعا بارا الادى. «نۇر الەمدەگى» ەكسكۋرسيالىق باعدارلاما 5 ساعاتقا ارنالعان. وقۋشىلار سفەراسىنىڭ 8 قاباتىن ارالاپ, كەيىن «ۇزدىك تاجىريبەلەر ايماعىنا» بارادى. ەكسكۋرسيا اياقتالعان سوڭ سىنىپ ساعاتتارى وتكىزىلىپ, بالالار العان اسەرلەرىمەن بولىسەدى.
ال ۇلتتىق كومپانيا باس مەنەدجەرى روزا اسانباەۆا بۇل ساياحاتتى ءبىلىم ءتۋريزمىن دارىپتەۋگە ارنالعانىن ايتتى. «كۇندىز-ءتۇنى كومپيۋتەرگە تەلمىرگەن وقۋشىلارعا وسىنداي اشىق الاڭدا ساباق وتكىزۋ ماڭىزدى. كوزبەن كورىپ, قۇلاقپەن ەستي وتىرىپ, بالالار اقپاراتتى جەڭىل قابىلدايدى. ءبىز مۇنداي اشىق ساباقتاردى «Kids Future Energy» دەپ اتادىق. بۇل اشىق ساباقتار وقۋشىلارعا پاندەردى جاقسى مەڭگەرۋگە كومەكتەسەدى. كەلەشەك ۇرپاقتىڭ تۇلعا رەتىندە قالىپتاسىپ, عىلىمعا دەگەن قىزىعۋشىلىعىن تانىتساق, ماقساتقا جەتكەنىمىز» دەپ ءوز ويىن ءبىلدىردى ول. ۇلتتىق كومپانيا بولاشاقتا استانالىق مەكتەپتەرمەن قاتار وڭىرلەردەن كەلەتىن وقۋشىلارعا ساياحات ۇيىمداستىرۋعا نيەتتى. سونداي-اق, جاقىن ارادا كورمە نىساندارىنا عالىمداردى, عارىشكەرلەردى جانە ونەر قايراتكەرلەرى كەلىپ, وقۋشىلارمەن فيزيكا, ماتەماتيكا, جاراتىلىستانۋ عىلىمدارىنداعى بىلىمدەرىمەن بولىسپەك.
گۇلدانا تالعاتقىزى
