استانادا 3-جىلۋ-ەلەكتر ورتالىعىنىڭ قۇرىلىسى تىم سوزىلىپ كەتتى. قالالىق ءماسليحاتتىڭ قۇرىلىس, ەكولوگيا, كولىك جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسىندا دەپۋتات ەركەعالي ەسەنجولوۆ بۇل نىساندى دەرەۋ ىسكە قوسۋ قاجەتتىگىن ايتتى.
«قالادا قۇرىلىس قارقىنى قاتتى. جاڭا تۇرعىن ءۇي كەشەندەرى بوي كوتەرۋدە. كەلەسى جىلىتۋ ماۋسىمىندا ەنەرگيالىق قۋات جەتپەي قالۋى ىقتيمال. استانادا بيىل كەمىندە تۇرعىن ءۇيدىڭ 2 ملن شارشى مەترىن پايدالانۋعا بەرۋ جوسپارلانىپ وتىر. وعان قوسىمشا 200 گيگوكالوريا جىلۋ ەنەرگياسى قاجەت» دەدى دەپۋتات.
استانا قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى ەربول تولەۋوۆتىڭ ايتۋىنشا, 3-جەو-نى 2019-2020 جىلدىڭ جىلىتۋ ماۋسىمىندا پايدالانۋعا بەرۋ كوزدەلۋدە. بيىل نىساننىڭ ءبىرىنشى ىسكە قوسۋ كەشەنى قۇرىلىسىن اياقتاۋعا 6 ملرد تەڭگە ءبولىندى. وعان سۋدى جىلىتاتىن ءتورت قوندىرعى كىرەدى. بۇل 440 گيگوكالوريانى قۇرايدى. قۇرىلىستى اياقتاۋ كەستەسى ازىرلەندى. 3-جەو-دان باستالاتىن جاڭا كوللەكتوردىڭ قۇرىلىسىنا قاجەت جوبالىق-سمەتالىق قۇجاتتاما دا دايىن.
دەپۋتاتتار 3-جەو-نى پايدالانۋعا بەرۋگە قاتىستى تاعى بىرنەشە سۇراقتى قويدى. بۇل ماسەلەنىڭ ناقتى شەشىمىن تابۋ ءۇشىن اتالمىش باسقارما باسشىلىعىنىڭ قاتىسۋىمەن بولەك وتىرىس وتكىزۋدى ۇيعاردى.
ءماسليحات دەپۋتاتى يرينا مانجانوۆا 85-كوشەنىڭ تۇرعىندارى وزدەرى تۇراتىن اۋداندا جولدىڭ سالىنۋىن ءبىرنەشە جىل سۇراپ جۇرگەنىن جەتكىزدى. سونداي-اق, اباي داڭعىلىنان باستاپ, ا.پۋشكين كوشەسىنە دەيىنگى ارالىقتا ا.جۇبانوۆ كوشەسىن قايتا سالۋعا نازار اۋداردى. ح.دوسمۇحامەدۇلى كوشەسىندەگى «سوتسيۋم» تۇرعىن ءۇي كەشەنى ماڭىندا اياقجول دا, كولىك جولى دا جوقتىعىن, ەڭ جاقىن ايالداما 1100 مەتر قاشىقتىقتا جاتقانىن ايتتى. اۆتوموبيل جولدارى
باسقارماسىنىڭ باسشىسى اسحات قاراعويشين اتالعان تۇرعىن ءۇي كەشەنىنىڭ جاعدايىمەن بارىپ تانىساتىنىن جەتكىزدى.
بايانداماشىنىڭ ءبىرى – تابيعي رەسۋرستار جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى ساكەن يساەۆتىڭ سوزىنشە, بيىل قالادا 14 شاعىن باق سالىنادى. ولار ەسكى جانە اپاتتى جاعدايداعى سۇرىلگەن ۇيلەردىڭ ورىندارىندا ورنالاسادى. ونىڭ ءبىرى استانانىڭ 20 جىلدىعىنا وراي ماڭعىستاۋ وبلىسىنىڭ باس قالاعا تارتۋى رەتىندە جەڭىس جانە بوگەنباي باتىر داڭعىلدارىنىڭ قيىلىسىندا سالىنادى. بۇعان قوسا, بۇل جەردە اتالعان وبلىستىڭ تاعى ءبىر سىيى – مانشۇك مامەتوۆانىڭ ەسكەرتكىشى بوي كوتەرەدى.
قالادا بيىل 34 شاقىرىمدى قۇرايتىن ۆەلوسيپەد جولدارى دا سالىنادى. وعان 5 وبلىستىڭ اكىمدىگى ينۆەستيتسيا قۇيماق. بايانداماشى دەپۋتاتتاردى استانانىڭ جاسىل بەلدەۋىن دامىتۋ جوسپارىمەن تانىستىردى. دەپۋتاتتاردىڭ تاراپىنان وعان سۇراقتار بولمادى.
امانعالي قالجانوۆ
