«استانا اقشامىنان» ۋاقىتشا الىستاپ, اعىلشىن ەلىندە جۇرگەنىمە ءبىر جىلدان استى. «بولاشاق» باعدارلاماسى ارقىلى بۇگىندە ۇلىبريتانيانىڭ شەففيلد قالاسىندا ديدجيتال مەديا سالاسى بويىنشا ءبىلىمىمدى شىڭداپ جاتىرمىن. وسىعان دەيىن جات جەردە كوزبەن كورگەن, كوڭىلگە تۇيگەن دۇنيەلەر ءبىرشاما. سولاردىڭ ىشىندەگى بىزگە تاڭسىق ءارى ۇيرەنۋگە تۇرارلىق تۇستارىن وقىرمانداردىڭ نازارىنا ۇسىنعاندى ءجون كوردىم.
دەتال ءبارىن شەشەدى
اعىلشىنداردىڭ دەتالعا بولەك ءمان بەرەتىنى ۇنايدى. ءبىر كۇنى شەففيلد قالاسىندا مەديتسينا قىزمەتكەرلەرىنە ارنالعان سالتاناتتى كەش ءوتتى. ۇيىمداستىرۋشىلار دالىزدەگى ديۆانعا ادامنىڭ قاڭقاسىن وتىرعىزىپ, زالداعى ءار ۇستەلدىڭ ورتاسىنا باسسۇيەك پىشىنىندەگى ۆازا اكەلىپ قويىپتى. ال بانكەتكە قاتىسۋشى قوناقتاردىڭ كۋۆەرتتىك كارتوچكاسىنا وزدەرى جۇمىس ىستەيتىن بولىمگە قاتىستى سۋرەت جاپسىرعان. مىسالى, كارديولوگتاردىڭ ەسىمى جازىلعان تۇستا – جۇرەك, نەۆروپاتولوگتاردىكىندە – مي, اكۋشەر-گينەكولوگتاردىڭ الدىنداعى قاعازدا قۇرساقتاعى ەگىز ءسابي بەينەلەنگەن. بىلاي قاراساڭ, ۋاق-تۇيەك نارسە سياقتى. بىراق كورەر كوزگە كادىمگىدەي ەرەكشە اسەر ەتەدى ەكەن. «Details make all the difference», ياعني, «دەتال ءبارىن شەشەدى» دەيدى اعىلشىندار وزدەرىنىڭ بۇل قاسيەتى تۋرالى.
ماقتاۋ – ەڭ كۇشتى موتيۆاتسيا
مەنىمەن بىرگە تۇراتىن قازاق كەلىنشەكتىڭ قىزى ءبىرىنشى سىنىپتا وقيدى. بۇعان دەيىن قازاقشا بالاباقشاعا بارعان, ۇيىندەگىلەرمەن دە تەك قازاق تىلىندە سويلەسەتىن ءبۇلدىرشىن اينالاسى ءتورت-بەس ايدىڭ ىشىندە اعىلشىنشاعا كادىمگىدەي توسەلىپ قالدى. مۇدىرمەي وقىپ-جازادى, اندەردى قاتەسىز ايتادى, تۇرمىستىق تىلدە ەركىن سويلەيدى. مەكتەبىندە شەتەلدىك بالالار اجەپتاۋىر كوپ. باستاپقىدا ءبارىنىڭ بىردەي اعىلشىنشاسى ءايبات بولماسى انىق. سوعان قاراماستان, مۇعالىمدەرىنىڭ ايتۋىنشا, ءبىر جىلدىڭ ىشىندە ءار بالا اعىلشىندى ءوز انا ءتىلى سياقتى مەڭگەرىپ شىعادى ەكەن. وسى تۇستا بريتانيالىق ءبىلىم جۇيەسىنىڭ ەرەكشە قىرلارىن ايتا كەتۋ كەرەك. ءار تاپسىرمانى ورىنداپ بولعان سوڭ, مۇعالىم مىندەتتى تۇردە داپتەردىڭ استىنا «جارايسىڭ! سەن وتە اقىلدىسىڭ! تاماشا جۇمىس!» دەگەن ءتارىزدى بالانى شابىتتاندىراتىن پىكىر قالدىرادى. ساباق ۇستىندە وقۋشىلار بەلگىلى ءبىر تاقىرىپتى ءوزارا تالقىلاپ بولعاننان كەيىن ءبىر-بىرىنە «سەن كەرەمەت سويلەدىڭ! ماعان سەنىڭ ايتقاندارىڭ قاتتى ۇنادى!» دەپ ماداقتاۋ ءسوز ايتۋى ءتيىس. وزىنە سەنىمدى, ەركىن, مادەنيەتتى ادامدار وسىنداي تاربيەدەن شىعاتىن شىعار.
«ميسسيس يزابەلدىڭ بوپەسى بولادى»
اعىلشىن مەكتەپتەرىنىڭ تاعى ءبىر قىزىق تۇسى, بالا ساباقتا جۇرگەندە ابايسىزدا بولماشى جاراقات الىپ قالسا دا, اتا-اناسىنا «ءسىزدىڭ ۇلىڭىز/قىزىڭىز وسىنداي جاعدايعا تاپ بولىپ قالدى. ۋايىمداماڭىز, قازىر جاعدايى جاقسى, سىنىبىنا كىردى» دەگەن مازمۇنداعى sms-حابارلاما كەلەدى. مەكتەپتە بولاتىن جينالىس, ەرتەڭگىلىك سەكىلدى شارالارعا شاقىرۋ كادىمگى حات تۇرىندە پوشتا ارقىلى جولدانادى. ودان بولەك, مەكتەپ اكىمشىلىگى باسقا دا ماڭىزدى ۋاقيعالار جايلى قۇلاقتاندىرعىسى كەلسە, سول اقپاراتتى ارنايى قۇجات تۇرىندە دايىنداپ, ءار وقۋشىعا جەكەلەي ۇستاتادى. ءبىر كۇنى جاڭاعى كورشى قىز «ماما, ميسسيس يزابەلدىڭ بوپەسى بولادى» دەپ اناسىنا ءبىر جاپىراق قاعازدى اكەلىپ كورسەتتى. ونداعى ءماتىننىڭ قىسقاشا ماعىناسى مىناداي: يزابەل ەسىمدى مۇعالىمنىڭ اياعى اۋىر, بۇل ونىڭ تۇڭعىش ءسابيى, مەكتەپ ۇجىمى بۇل ءسۇيىنشى جاڭالىققا قاتتى قۋانىشتى, ول التى ايدان سوڭ, ياعني, شىلدەدە دەكرەتتىك دەمالىسقا كەتەدى. ءدال ءبىز ءۇشىن مۇنداي نارسەنى وقۋشىلارعا دابىرايتىپ جاڭالىق رەتىندە ايتۋ ابەستىك بولىپ كورىنەتىنى راس قوي. بىراق اعىلشىندار وسىلايشا انا اتانۋدىڭ, ءتىپتى, سوعان دايىندىقتىڭ ماڭىزدىلىعىن بالاعا كىشكەنتايىنان تۇسىندىرگىسى كەلەتىن سەكىلدى. سونىمەن قاتار, جاڭاعىداي ادىسپەن وقۋشى مەن مۇعالىم اراسىندا رەسمي ەمەس, ادامي قۇندىلىقتارعا نەگىزدەلگەن قارىم-قاتىناس ورناتۋعا ۇمتىلادى.
اجەلەر دە فۋتبول كورەدى
فۋتبول – اعىلشىندار ءۇشىن كيەلى ويىننىڭ ءبىرى. قاي قالادا بولسا دا, تۇرعىندار وزدەرىنىڭ جەرگىلىكتى ويىنشىلارىنا قولداۋ كورسەتۋدەن ەش شارشامايدى. مانچەستەردە تۇرعانىمدا «ولد تراففورد» پەن «ەتيحاد» ستاديوندارىندا ۇيىمداستىرىلاتىن ماتچتارعا ءجيى باراتىنبىز. ول كۇندەرى اۆتوبۋستار «مانچەستەر يۋنايتەد» نەمەسە «ءسيتيدىڭ» شارفىن ىلگەن جانكۇيەرلەرگە لىق تولادى. جالپى, ناعىز جانكۇيەرلىكتىڭ قانداي بولاتىنىن اعىلشىنداردان ۇيرەنۋ كەرەك سياقتى: ستاديوندا ەشقانداي ورىن بوس تۇرمايدى, ويىن بارىسىندا ءبىر ساتكە دە دامىلداماستان كوماندالاردىڭ قۇرمەتىنە ءبارى حورمەن ءان شىرقايدى, تاماقتارى قارلىققانشا ايعايلاپ, فۋتبولشىلارعا دەم بەرەدى. ايتپاقشى, جەتپىس-سەكسەندەگى اجەلەردىڭ فۋتبول تاماشالاعانىن دا سول جەردە ءبىرىنشى رەت كوردىم. مۇنشاما مىقتى قولداۋدان كەيىن ويىنشىلاردىڭ دا قارقىنى كۇشتى بولاتىنى تۇسىنىكتى.
وپەراتورلارى ادال
انگليادا ۇيالى تەلەفون تاريفتەرىنىڭ باعاسى بىزدەگىدەن ءبىراز قىمبات. العاش بارعان ۋاقىتىمدا ايىنا 25 فۋنتتىق (11 مىڭ تەڭگەدەي) تاريف قوستىردىم. قىمباتسىنسام دا, اۋەلى بايقاپ كورەيىن, رەتى كەلسە باسقاسىنا اۋىسارمىن دەپ ويلاعانمىن. سويتسەم كەلەسى ايدا ءموبيلدى وپەراتوردان مىناداي حات كەلدى: «ءبىز ءسىزدىڭ ءبىر ايدا قولدانعان ترافيگىڭىزگە اناليز جاسادىق. ەندىگى ۋاقىتتا سىزگە قازىرگى تاريفىڭىزدەن 5 فۋنتقا ارزان باسقا تاريف تۇرىنە اۋىسۋعا كەڭەس بەرەمىز». جاقسى. اۋىستىم. ەكى-ءۇش ايدان سوڭ تاعى ءبىر حابارلاما كەلدى: «ءبىز ءسىزدىڭ ءبىر ايدا قولدانعان ترافيگىڭىزگە اناليز جاسادىق. ەندىگى ۋاقىتتا سىزگە قازىرگى تاريفىڭىزدەن 3 فۋنتقا ارزان باسقا تاريف تۇرىنە اۋىسۋعا كەڭەس بەرەمىز». كليەنتتەرىنىڭ اقشاسىن ۇنەمدەگىسى كەلىپ تۇراتىن مۇنشاما ادال ءموبيلدى وپەراتورلار تەك انگليادا عانا ما ەكەن؟!
قايىرىمدى قالا تۇرعىندارى
ۇلىبريتانيادا قالىپتاسقان تاعى ءبىر جاقسى ءۇردىس, مۇندا قايىرىمدىلىق جاسايمىن دەگەن كىسىلەرگە وڭاي ءارى قولجەتىمدى جولدار كوپ. ياعني, كەز كەلگەن ادام بۇل ىسپەن اينالىسا الادى. مىسالى, كوشەدە بيىكتىگى ادام بويىمەن بىردەي تەمىر بۋدكالار قويىلعان. ورتاسىندا ۇلكەندەۋ پاكەت سىياتىنداي سىرعىمالى ەسىگى بار. تۇرعىندار وزدەرىنىڭ, بالالارىنىڭ ەسكىرگەن نەمەسە كىشىرەيگەن كيىم-كەشەگىن سوندا سالىپ كەتەدى. ءار بۋدكانىڭ ەسىگىندە ول كيىمدەردىڭ قايدا جىبەرىلەتىنى تۋرالى اقپارات كورسەتىلگەن. مۇنىمەن قوسا, قايىرىمدىلىق دۇكەندەرى دە كەڭىنەن تانىمال. وندا اياق كيىمنەن باستاپ, ىدىس-اياق, بالالاردىڭ ويىنشىعى, ءتىپتى, كىتاپ-ديسكىلەرگە دەيىن قابىلداپ الادى دا, جۋىپ-تازالاپ, وتە ارزان باعامەن ساتىلىمعا شىعارادى. ال تۇسكەن تابىستىڭ ءبارىن قايىرىمدىلىققا اۋدارادى. سۋپەرماركەتتەردە دە ءبىر بۇرىشتا ۇلكەن قوراپ تۇرادى. مۇقتاج جاندارعا ازىق-تۇلىكپەن كومەكتەسكىڭىز كەلسە, مارحابات!
بوتاگوز ماراتقىزى,
شەففيلد قالاسى, ۇلىبريتانيا
