ەلوردادا جەڭىلدىكپەن جۇرەتىن ازاماتتار اراسىندا ەلەكتروندى تولەۋ جۇيەسىنە كوشۋگە بايلانىستى بىرقاتار تۇسىنىسپەۋشىلىك تۋىنداعان ەدى. كەشە «استانا LRT» كومپانياسىنىڭ باسشىسى بەكمىرزا يگەنبەردينوۆ جۋرناليستەرگە ارناپ بريفينگ وتكىزىپ, ماسەلەگە نۇكتە قويدى.
2018 جىلدىڭ باسىندا جاڭارتىلعان مالىمەتكە سايكەس, ەلوردادا 114 مىڭعا جۋىق استانالىق قوعامدىق كولىكتەگى الەۋمەتتىك جاردەماقى كىتاپشاسىن پايدالانادى. ولارعا زەينەتكەرلەر, كوپ بالالى جانە الەۋمەتتىك جاعدايى تومەن وتباسىلار, سوعىس ارداگەرلەرى جانە مۇمكىندىگى شەكتەۋلى ازاماتتار كىرەدى. بۇگىندە 76 مىڭ ادام عانا ەسىمدەرى جازىلعان كىتاپشانى اتاۋلى كولىك كارتاسىنا الماستىرعان. الايدا ونىڭ تەك 50 مىڭى عانا ءىس جۇزىندە پايدالانىپ كەلەدى. جەڭىلدىكپەن جۇرەتىن ازاماتتاردىڭ كوبىسى كارتانى اۆتوبۋس تەرمينالىنا تيگىزبەيدى. سونىڭ سالدارىنان جولاۋشىلار لەگىن سارالاۋ, قاجەت بولعان جاعدايدا اۆتوبۋس مارشرۋتتارىن كوبەيتىپ, كولىك كەپتەلىسىن ازايتۋ قيىنداي تۇسەدى.
– كەيدە كوندۋكتورلار ءبىزدىڭ نۇسقاۋلاردى دۇرىس تۇسىنبەي جاتادى. ولار زەينەتاقى كىتاپشالارىن كورسەتكەن ازاماتتاردى ەلەكتروندى كارتالارىنىڭ جوقتىعىن ايتىپ, اۆتوبۋستان ءتۇسىرىپ تاستاعىسى كەلگەن جاعدايلار كەزدەستى. بۇل جونىندە اۆتوبۋس پاركتەرىنە بارىپ ءتۇسىندىرۋ جۇمىستارى جۇرگىزىلدى. ءبىز زەينەتاقى كۋالىكتەرىمەن جۇرۋگە شەكتەۋلى ۋاقىت بەرەمىز. ودان كەيىن تەگىن Astra Plat كارتاسىن الۋعا مىندەتتى. قوعامدىق كولىكتەگى جەڭىلدىككە يە ازاماتتاردان كارتالارىن ۆاليداتسيادان وتكىزۋدى سۇرايمىز. ءبىر ەسكەرتەتىن جايت, ەگەر ۆاليداتور ىستەن شىقسا, كەز كەلگەن جولاۋشى تەگىن جول جۇرۋگە قۇقىلى, – دەيدى بەكمىرزا يگەنبەردينوۆ.
ارناۋلى كولىك كارتالارى زەينەتكەرلەر مەن جاردەماقى الۋشىلارعا تەگىن بەرىلەدى. ال جەكە ادامنىڭ مالىمەتتەرى استانا قالاسىنىڭ زەينەتاقى تولەۋ جونىندەگى مەملەكەتتىك ورتالىقتان الىنادى. جاڭارتىلعان دەرەكتەر بازاسى ءۇش ايدا ءبىر رەت بەرىلەتىندىكتەن, جەڭىلدىگى بار ازاماتتار جەكە كولىك كارتاسىن زەينەتاقى كۋالىگىن العان ساتتەن باستاپ 3 اي وتكەن سوڭ عانا الا الادى.
سىزگە تيەسىلى جەڭىلدىك كارتاسىن قاجىمۇقان كوشەسى, 14 مەكەنجايى بويىنشا ورنالاسقان تولەم دەپارتامەنتى جۇيەسىنەن الۋعا بولادى. ول ءۇشىن زەينەتاقى كۋالىگىن كورسەتىپ, فوتوعا ءتۇسۋ كەرەك. كارتا 5 جىلعا دەيىن جارامدى.
سونىمەن قاتار, بەكمىرزا يگەنبەردينوۆ قوعامدىق كولىكتەگى جولاقىنىڭ كوتەرىلۋىنە قاتىستى سۇراققا دا جاۋاپ بەردى.
«90 تەڭگەلىك جولاقىنى كوتەرۋ-كوتەرمەۋ تۋرالى شەشىمدى قالالىق ءماسليحات قابىلدايدى. بيىل ءساۋىر ايىندا ناقتى ۇسىنىستاردى ءماسليحاتتىڭ قاراۋىنا جىبەرەمىز» دەگەن كومپانيا باسشىسى جاقىن ارادا جاڭا تاريفتەر سارالانعان جۇيە بويىنشا ەنگىزىلەتىنىن جەتكىزدى. دەمەك, استانا تۇرعىندارى ءۇشىن جول ءجۇرۋ اقىسىن قولما-قول تولەگەننەن گورى ەلەكتروندى كارتامەن تولەگەن تيىمدىرەك بولماق. جول اقىسىنىڭ قانشالىقتى كوتەرىلەتىنى ءالى بەلگىسىز. «ساراپشىلارمەن ءاردايىم كەڭەسىپ وتىرامىز. ولار ەلورداداعى جول اقىسىنىڭ نەگىزگى قۇنى – 500 تەڭگەگە تەڭ ەكەندىگىن ايتادى. ارينە, بۇل سوماعا ەشكىم كەلىسپەيدى. سوندىقتان ءبىز حالىق تاڭداۋىنا ءتۇرلى تاريفتەردى ۇسىنامىز. ماسەلەن, ءبىر ساعاتتىڭ ىشىندە كەلەسى اۆتوبۋسقا ءمىنۋ – تەگىن. 400 تەڭگەلىك AstraPlat كارتاسىنا 10 رەت جول جۇرۋگە ارنالعان تولەمدى ساتىپ الساڭىز, وعان 11-ءىنشى رەت جول ءجۇرىپ ءوتۋ – تەگىن» دەيدى ول.
سونداي-اق, بيىل اۆتوبۋستاردا تەگىن جۇرۋگە مۇمكىندىك بەرەتىن زەينەتاقى كىتاپشالارىن الىپ تاستاۋ كوزدەلگەن. ونىڭ ورنىنا اقىسىز جۇرۋگە ارنالعان ەلەكتروندى كارتالار بەرىلەدى. بۇل – ەلەكتروندى جۇيەگە تولىعىمەن كوشۋدىڭ العىشارتتارىنىڭ ءبىرى.
گۇلدانا تالعاتقىزى
